Gədəbəy start götürür

Dövlət Proqramının icrasında yeni mərhələ başlanıb

Müstəqil Azərbaycan həyatın hər sahəsində uğurla irəliləyir. Regionların 2009-2013-cü illərdə sosial-iqtisadi inkişafı Dövlət Proqramının icrasının üçüncü ilinin yekunlarına həsr olunmuş konfransda Prezident İlham Əliyev bu barədə ətraflı danışıb və qarşıya konkret vəzifələr qoyub. Konfransın mübariz ruhu dağlar diyarı Gədəbəydə də geniş əks-səda doğurmuşdur.

Soyuq qış ayları arxada qalır. Havalar get-gedə mülayimləşir, vadilərin, çöllərin qarı əriyir. Gədəbəy qışın sərt sınağından uğurla çıxır. İndi hamını yeni ilin vəzifələri, qayğıları düşündürür. Sahibkar yavaş-yavaş sahələrə çıxır. İcra orqanlarının işləri getdikcə çoxalır. Gərək hər yerdə qışın fəsadları tam aradan qaldırılsın, yeni ilin bol məhsulunun etibarlı bünövrəsi qoyulsun. Konfransda qarşıya qoyulan vəzifələrin uğurla yerinə yetirilməsi üçün rayonda təcrübəli mütəxəssislərdən, ağsaqqallardan ibarət İşçi Qrupu yaradılıb və onun ilk toplantısı keçirilib.

Tədbiri açan ağsaqqal Kərəm Məmmədovun sözləri hamının ürəyindən xəbər verdi: "Elə başlayaq ki, birinci gündən peşman olmayaq sonuncu gündə". Çıxış edən digər natiqlər də dedilər ki, ilk öncə gərək ötən illərin təcrübəsi davam etdirilsin.

Dövlət Proqramının icrası ilə əlaqədar olaraq üç ildə görülən işlər barədə isə rayon icra hakimiyyətinin başçısı Kamran Rzazadə ətraflı məlumat verdi. Qeyd olundu ki, Dövlət Proqramında nəzərdə tutulan tədbirlərin çoxu uğurla yerinə yetirilir. Ötən il rayon üzrə sahələrdən 975,8 ton taxıl, 201 min ton kartof götürülüb. İl ərzində 288 min manat ümumdaxili məhsul istehsal olunub ki, bu da 2003-cü ildə olduğundan 4,1 dəfə çoxdur. 2003-cü ildə adambaşına düşən məhsulun həcmi 773 manat təşkil edirdisə, 2011-ci ildə bu rəqəm 3049 manata çatmışdır.

Konfransdakı yekun nitqində Prezident İlham Əliyev demişdir: "Biz keçmişdə özümüzü heç vaxt ərzaq məhsulları ilə təmin etməmişdik. Sovet dövründə ümumxalq təsərrüfatı kompleksi var idi və bütün əsas ərzaq məhsulları başqa respublikalardan gəlirdi. Biz qısa müddət ərzində ciddi dönüş yarada bilmişik".

Fərəli haldır ki, indi Gədəbəy nəinki özü-özünü ərzaqla təmin edir, həm də müntəzəm surətdə bazarlara xeyli məhsul göndərir. Təkcə keçən il Bakı yarmarkalarına 433 ton kartof, 77,2 ton kök, 192,6 ton kələm, 22,4 ton pendir, 10,1 ton bal, 8,7 ton armud, 13,2 ton alma, 24,8 ton çuğundur yola salınıb. Bir zaman çox kasıb sayılan Gədəbəy bu gün respublikamızda ən iri kənd təsərrüfatı məhsulları istehsalçılarından biri kimi tanınır.

Digər sahələrdə də rayonun uğurları diqqəti cəlb edir. Xüsusən abadlıq və quruculuq sahəsində çox işlər görülür. Prezident İlham Əliyev bu yerlərə səfəri zamanı göstəriş vermişdi ki, Gədəbəy-Şəmkir magistral yolu əsaslı təmir olunsun, sərhəd bölgəsindəki kəndlərə təbii qaz xətti çəkilsin. Dövlət başçısının tapşırıqları uğurla yerinə yetirilir. Gədəbəy-Şəmkir yolunda əsaslı təmir işləri çoxdan başa çatıb. Qaradağ-Novosaratovka, Novosaratovka-Şınıx istiqamətinin xeyli hissəsində magistral qaz kəməri çəkilib. Böyük Qaramurad və Şınıx bölgələrindəki kəndlərin qazlaşdırılması işi davam edir.

Dövlət Proqramının icrası ilə əlaqədar olaraq son üç ildə onlarca küçəyə asfalt döşənib, səkilər düzəldilib, binalar təmir edilib, istinad divarları tikilib. "Şəhidlər xiyabanı", "Xatirə" kompleksi abadlaşdırılıb. Nərimankənddə seysmoloji stansiya üçün bina tikilib. Zəhmətkənddə gündəlik istehsal gücü 100 ton olan "Mineral su" fabriki işə salınıb. Təməli Prezident İlham Əliyev tərəfindən qoyulan "Aşıqlar evi"ndə, habelə Gədəbəy Rayon Məhkəməsində, statistika idarəsinin inzibati binasında, tutumu 10 min ton olan kartof emalı müəssisəsində son tamamlama işləri görülür.

Gədəbəy dağlı, dərəli təbiətə malikdir, burada körpü, yol təsərrüfatı böyük rol oynayır. Dövlət Proqramına uyğun olaraq İnəkboğan-Qasımlı, Çobankənd-Arabaçı kəndlərində körpü-keçidlər quraşdırılıb. Şahdağ, Söyüdlü, Novosaratovka, Daryurd, Çalburun, Qoşabulaq, Ərtəpə, Kərimli, Köhnəqışlaq, Arabaçı, Dəyəqarabulaq və sair kənd yollarında təmir-bərpa işləri aparılıb. 50 kəndi birləşdirən strateji əhəmiyyətli "Fındıqlı" körpüsü yaxın vaxtlarda istifadəyə veriləcək.

Hər yerdə yol təsərrüfatının salınması üçün qarşıda daha böyük vəzifələr durur. Prezident İlham Əliyev konfransdakı yekun nitqində demişdir: "2012-ci və 2013-cü illərdə bu sahəyə daha da böyük məbləğdə vəsait qoyulacaqdır. Kənd yollarının tikintisi birbaşa yerli icra orqanlarına tapşırılmışdır. Onlar bu işi böyük səmərə ilə və böyük keyfiyyətlə görməlidirlər. Bu, böyük məsuliyyətdir, çünki əvvəlki dövrdə bu işlərlə mərkəzi icra orqanları məşğul idi. Ancaq mərkəzi icra orqanlarının digər layihələri vardır. Onlar əsas diqqəti magistral, şəhərlərarası yollara yönəltməlidirlər. O ki qaldı kənd yollarına, yerli icra orqanları bu işləri daha yaxşı bilir".

Dövlət Proqramında sosial problemlərin həllinə xüsusi yer ayrılmışdır. Bununla bağlı rayonda xeyli iş görülmüşdür.

Son 30 ildə mərkəzi rayon poçtamtından başqa bir poçt binası tikilməmişdi. Əksər obyektlər yararsız otaqlarda yerləşirdi. Rayonun səkkiz kəndində poçt şöbələri üçün yeni binalar inşa edilib. 20 yerdə elektron ATS istifadəyə verilib. Hazırda Gədəbəy-Şəmkir arası FO-20 tipli kabel çəkilir.

Məktəb binalarının inşası sahəsində Gədəbəy öndə gedir. Son səkkiz ildə rayonda 30 yeni məktəb binası istifadəyə verilib, 49 məktəb binası əsaslı təmir edilib, 84-dən artıq əlavə sinif otaqları tikilib.

Keçən il Səbətkeçməz kənd tam orta məktəbi və uşaq gənclər idman məktəbi üçün yeni binalar inşa olunub, 2 saylı şəhər və Moruxlu kənd tam orta məktəbləri əsaslı təmir edilib, Qoşabulaq, Novosaratovka, Slavyanka kənd tam orta məktəbləri üçün müasir binalar tikilir.

Binalar təzədir, bəs təhsilin keyfiyyəti necə? Toplantıda bu məsələlər barədə geniş söhbət getdi. Qeyd olundu ki, hazırda rayonun ümumtəhsil məktəblərində 161 nəfər müxtəlif ixtisasdan olan müəllimlərə ciddi ehtiyac duyulur. Ən çox da coğrafiya, xarici dil, riyaziyyat-informatika, kimya-biologiya müəllimləri çatışmır. Səhiyyə sistemində də 40 nəfər həkimə ciddi ehtiyac var.

Dövlət Proqramına uyğun olaraq rayonda mədəniyyət müəssisələrinin maddi-texniki bazasının möhkəmləndirilməsi sahəsində müəyyən işlər görülüb. Son bir neçə ildə 17 mədəniyyət müəssisəsində təmir-bərpa işləri aparılıb, Gədəbəy şəhərində və Novosaratovka kəndlərində salınmış ulu öndər Heydər Əliyev adına mədəniyyət və istirahət parkları ziyarətgaha çevrilib.

Konfransın mübariz ruhuna uyğun olaraq toplantıda əsas diqqət həlli vacib problemlərə yönəldildi. Prezident İlham Əliyev Nazirlər Kabinetinin yanvarın 16-da keçirilən iclasında demişdi: "2012-ci il başlayır. 2012-ci ili də uğurla başa vurmaq üçün biz fəal işləməliyik. Bütün proqramlar vaxtında icra edilməlidir. Bizim bütün işlərimiz sistemli şəkildə, proqramlar əsasında aparılır. İlk növbədə strateji istiqamətlər müəyyən edilmişdir, düzgün müəyyən edilmişdir. Bu strateji hədəflərə çatmaq üçün konkret icra mexanizmləri də vardır - maliyyə resursları, icra mexanizmləri və əlbəttə ki, peşəkarlıq. Bu amillər istənilən məsələnin həlli üçün bizə imkan verəcəkdir".

Dövlət başçısının tapşırıqları yerlərdə fəaliyyət proqramına çevrilib. Qışın sərt günlərində yerlərdə səyyar qəbul keçirilib. İcra hakimiyyətində və digər idarə və müəssisələrdə mindən artıq sakinin müraciəti dinlənilib, qəsəbə və kəndlərdə icra nümayəndələri ilə, bələdiyyələrlə görüşlər olub. Vətəndaşlar tərəfindən yüzlərlə təklif irəli sürülüb. Bir sıra məsələlər yerində həll edilib. İşçi qrupu bütün təklifləri bir daha nəzərdən keçirərək qaldırılan problemlərin həlli üçün geniş tədbirlər planı hazırlanıb.

Bəs şikayət nədər yaranır? Obyektiv səbəblər çoxdur. Ötən əsrin altmışıncı illərində çəkilən və istismar müddəti çoxdan keçən elektrik xətləri və dayaqlar tez-tez xarab olur, uyğunlaşdırılmış binalarda yerləşən bəzi xidmət obyektləri günün tələblərinə cavab vermir. Dərələrdən, təpələrdən keçən yolları daim yaxşı saxlamaq heç də asan olmur. Şıdırğı yağışlar başlanan kimi problemlər yaranır. Bütün bunların həllinə respublika təşkilatlarının müdaxiləsi vacibdir. Şikayətlər isə əsasən rayonun icra orqanlarına ünvanlanır. İşçi qrupu aid təşkilatların köməyi ilə bütün bu məsələlərin vaxtında nizamlanmasına, xüsusən qəzalı vəziyyətdə olan binaların, xidmət xətlərinin, yolların, körpü və keçidlərin sahmanlanmasına çalışır.

İqtisadi məsələlər, abadlıq-quruculuq işləri isə həmişə olduğu kimi, yenə də ön plandadır. Gədəbəy yeni ildə yeni start götürüb. Kamran Rzazadə deyir ki, cari ildə də Dövlət Proqramına uyğun olaraq rayonun sosial-iqtisadi inkişafı daha sürətlə davam etdiriləcəkdir. Havalar açılan kimi, şəhərdaxili küçələr asfaltlaşdırılacaq, kənd yollarına çınqıl döşənəcək, "Dərə Qumlu" yaşayış massivindəki "keçilməz yol"da körpü-keçid inşa ediləcək. 57 kilometr uzunluğunda olan Gədəbəy-Qaravəlilər yolu əsaslı şəkildə təmir olunacaq.

Tədbirlər planında digər zəruri məsələlər də çoxdur. İl ərzində Heydər Əliyev prospektinin abadlaşdırılması, ulu öndərin adını daşıyan parkın yenidən qurulması, Heydər Əliyev Mərkəzinin əsasının qoyulması nəzərdə tutulub.

Hamının gözlədiyi xoş işlərdən biri də budur ki, rayonun mərkəzində Dövlət Bayrağı meydanı tikiləcək, Prezident İlham Əliyevin iştirakı ilə təməli qoyulan "Aşıqlar məktəbi" binası istifadəyə veriləcəkdir.

Qarşıda həlli vacib olan sosial məsələlər də az deyil. Sərhəd bölgələrindəki kəndlərin təbii qazla təmin edilməsi işi davam etdiriləcək. Elektrik enerjisi və təbii qaz sistemlərinin sayğaclaşdırılması başa çatdırılacaq.

Məktəb binalarının tikintisi yenə də ön plandadır. İşçi qrupunun növbəti toplantısının təhsil şöbəsində keçirilməsi nəzərdə tutulub. Cari ildə Qoşabulaq, Novosaratovka, Slavyanka və Samanlıq kənd tam orta məktəblərinin inşası başa çatdırılacaq və bir sıra digər işlər görüləcəkdir.

Bəli, dağlar diyarı Gədəbəyin daha xoş günləri hələ öndədir. Dövlət başçısı İlham Əliyevin dediyi kimi: "Bizim yolumuz ədalət yoludur. Yolumuz haqq yoludur, inkişaf yoludur, tərəqqi yoludur. Biz bu yolla uğurla gedirik və gedəcəyik".

Əhməd İSAYEV

Azərbaycan.- 2012.- 4 mart.- S. 4.