Azərbaycan qadını inkişaf edir, böyük nailiyyətlər qazanır

Martın 7-də "ÜNS" Yaradıcılıq Səhnəsində Ailə, Qadın və Uşaq Problemləri üzrə Dövlət Komitəsinin (AQUPDK) təşkilatçılığı, "Azərcell Telecom" MMC-in dəstəyi ilə 8 Mart - Beynəlxalq Qadınlar Gününə həsr olunmuş tədbir keçirilmişdir.

AzərTAc xəbər verir ki, tədbirdə AQUPDK-nın sədri Hicran Hüseynova Prezident İlham Əliyevin 8 Mart - Beynəlxalq Qadınlar Günü münasibətilə Azərbaycan qadınlarına təbrikini oxumuşdur.

H.Hüseynova bildirmişdir ki, hər il olduğu kimi, bu il də bir qrup qadın dövlət başçısı tərəfindən təltif edilmişdir. Komitə sədri Azərbaycan Respublikası Prezidentinin bununla əlaqədar martın 5-də imzaladığı sərəncamları oxumuş, mükafatları sahiblərinə təqdim etmişdir.

Təltif olunanlar Prezident İlham Əliyevə minnətdarlıqlarını bildirmişlər.

AQUPDK-nın sədri vurğulamışdır ki, bayram ərəfəsində qadınların yüksək təltiflərə və fəxri adlara layiq görülməsi ölkəmizdə onlara göstərilən diqqət və qayğının növbəti əməli ifadəsidir. Bu gün qadınlarımız ölkənin ictimai, sosial-iqtisadi, mədəni və mənəvi həyatında öndə gedərək, onlara göstərilən etimadı layiqincə doğruldurlar. Saflıq və müdriklik rəmzi olan Azərbaycan qadınlarının cəmiyyətdəki müasir mövqeyi onların bir çox nəsillərinin ardıcıl səylərinin nəticəsidir.

H.Hüseynova demişdir ki, bu gün qadınlarımızın fəallığından söz açarkən Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın çoxşaxəli fəaliyyətini xüsusi qeyd etmək lazımdır. Ötən bir ildə dövlət müstəqilliyimizin bərpasının 20 illiyi və digər mühüm məsələlərlə bağlı Mehriban xanım Əliyevanın rəhbərliyi ilə həyata keçirilən layihələr, Azərbaycanın dünyada tanıdılması istiqamətində reallaşdırılan önəmli tədbirlər xalqımızın, o cümlədən qadınlarımızın yüksək potensialını bir daha nümayiş etdirmişdir.

Qeyd olunmuşdur ki, dövlətimizin yürütdüyü məqsədyönlü siyasətin, eləcə də Prezident İlham Əliyevin apardığı dövlət qadın siyasətinin nəticəsi olaraq, bu gün Azərbaycan qadını inkişaf edir, ölkə daxilində və beynəlxalq aləmdə böyük nailiyyətlər qazanır, ictimai həyatın bütün sahələrində sözünü deyir.

H.Hüseynova bildirmişdir ki, bayram tədbirinin digər məqsədi sağlamlığı ilə bağlı müəyyən məhdudiyyətləri olmasına baxmayaraq, cəmiyyətin həyatına fəal şəkildə qoşulan qadınlara dəstək verilməsidir.

AQUPDK-nın sədri bütün qadınları bayram münasibətilə təbrik etmiş, onlara xoş arzularını çatdırmışdır.

Sonra ölkənin ictimai-siyasi, sosial-mədəni həyatında, milli-mənəvi dəyərlərin qorunması və gənc nəslə çatdırılmasında mühüm xidmətləri olan fəal qadınlara komitənin mükafatları təqdim edilmişdir.

Tədbirin bədii hissəsində xalq artisti, görkəmli bəstəkar Tofiq Quliyevin əsərlərindən ibarət "Bakı" musiqi kompozisiyası nümayiş olunmuşdur.

Azərbaycan.- 2012.- 8 mart.- S. 6.