Mərakeşdə 8 mart - Beynəlxalq Qadınlar Günü münasibətilə açılan sərgidə Azərbaycanın mədəniyyəti uğurla təmsil olunur

 

 Mərakeşin Məhəmmədiyə şəhərində kral VI Məhəmmədin himayəsi ilə 8 mart - Beynəlxalq Qadınlar Günü münasibətilə qadın sənətkarların beynəlxalq sərgi-yarmarkasının rəsmi açılış mərasimi olmuşdur.

Azərbaycanın Mərakeş Krallığındakı səfirliyindən AzərTAc-a bildirmişlər ki, açılış mərasimində ölkəmizin səfiri S.Ağabəyov, Məhəmmədiyə şəhərinin meri A.Dadis, burada akkreditə olunmuş diplomatik korpusun nümayəndələri, incəsənət xadimləri, KİV-lərin təmsilçiləri iştirak etmişlər.

Azərbaycanın da təmsil olunduğu sərgi-yarmarkada Pakistan, Oman, Fələstin, Rusiya, Hindistan, Venesuela və digər ölkələrdən sənətkar qadınların əl işləri nümayiş etdirilir.

Martın 11-dək davam edəcək sərgi-yarmarkada Azərbaycanı Ailə, Qadın və Uşaq Problemləri üzrə Dövlət Komitəsinin əməkdaşı Kamilə Əliyeva, Sahibkar Qadınlar İctimai Birliyinin sədri Zemfira Ağayeva, sahibkar qadın Afina Babayeva təmsil edirlər.

Sərgidə nümayiş etdirilən Azərbaycanın müxtəlif rayonlarından olan tətbiqi sənət ustalarının əl işləri, Nizami Gəncəvinin əsərlərinə həsr olunmuş bəzək əl işləri, kiçik xalçalar, milli yaradıcılıq nümunələri, "Azərbaycan xalçaları öz qrupları" ilə silsiləsindən Naxçıvan, Quba, Təbriz qruplarına aid olan broşürlər böyük maraqla qarşılanmışdır.

 

 

Azərbaycan.- 2012.- 8 mart.- S. 9.