Böyük qayğıdan doğan uğurlu diaspor missiyası

Bəşər sivilizasiyasının ən qədim beşiklərindən sayılan Azərbaycan bu gün beynəlxalq hüququn müstəqil subyekti olaraq inkişaf yolunda böyük uğurlara imza ataraq inamla irəliləyir. Yeni müstəqillik tarixinin qısa zaman kəsiyini əhatə etməsinə baxmayaraq, bu müddət ərzində vətənimiz dünya birliyində öz layiqli yerini tutmağı bacarmışdır. Xalqımızın öz hüquqlarını suveren şəkildə reallaşdırması artıq dönməz xarakterə malikdir və bu, hər bir həmvətənimizə müstəqil Azərbaycanın xoşbəxt gələcəyinə daha böyük nikbinliklə, inamla baxmağa əsas verir. Azərbaycan iqtidarının müəllifi olduğu möhtəşəm müvəffəqiyyətlər dünyanın hansı bölgəsində yaşamalarından asılı olmayaraq bütün soydaşlarımızın qəlbində böyük qürur və iftixar hisləri doğurur. Onlar dünya azərbaycanlılarının tarixi vətəni olan Azərbaycanla bağlılıqlarını daha güclü hala gətirir, ölkəmizin daha da qüdrətlənməsinə töhfə verməyi fəaliyyətlərində prioritet istiqamətlərdən birinə çevirirlər.

Birmənalı şəkildə qəbul olunmuş həqiqətdir ki, ölkəmizin dinamik inkişaf yolunda qazandığı uğurlarda Azərbaycan amalını hər zaman ən ülvi dəyər olaraq qəbul edən həmvətənlərimizin də özünəməxsus payları var. Dünyanın dörd bir yanında yaşayan soydaşlarımızın müstəqil Azərbaycan uğrunda fəaliyyət göstərmələri, bu məqsədlə təşkilatlanaraq daha güclü olmaları isə xoş əməllərilə adını xalqmızın qəlbinə əbədilik həkk edən ümummilli lider Heydər Əliyevin adı ilə bilavasitə bağlıdır. Məhz ulu öndərin məqsədyönlü siyasəti son 19 il ərzində dünya azərbaycanlılarının tarixi vətənləri ilə bağlılığının yaranmasını və daha möhkəm özüllər üzərində qurulmasını təmin edib. Eyni zamanda, yenə ümummilli liderin konkret hədəflərə hesablanan əməli fəaliyyəti bu gün beynəlxalq miqyasda öz sözünü deyə bilən güclü Azərbaycan diasporunun formalaşması ilə nəticələnmişdir.

Ulu öndərin böyük irsinin ən görkəmli nümayəndəsi kimi Prezident İlham Əliyevin həyata keçirdiyi siyasət ötən müddət ərzində Azərbaycan diasporunun daha da güclənməsi ilə müşayiət olunmuşdur. Ölkəmizin əldə etdiyi və günü-gündən miqyası genişlənən nailiyyətləri bütün dünya azərbaycanlılarının milli şüurunu, özünüdərkini, Azərbaycanla bağlılıqlarını daha da möhkəmləndirir. Məhz bunun nəticəsidir ki, indi sayı 50 milyondan artıq olan dünya azərbaycanlıları cənab İlham Əliyevi özlərinin alternativsiz lideri olaraq qəbul edirlər.

Prezident İlham Əliyevin rəhbərliyi altında inkişafının daha sürətli yüksəliş mərhələsini yaşayan Azərbaycan Respublikası üzərinə düşən tarixi missiyanı -dünyadakı soydaşlarımızın arasında milli həmrəyliyin əldə olunmasını uğurla həyata keçirməkdədir. Azərbaycanın dünyadakı elçiləri, təmsilçiləri, həmvətənlərimizin ayrı-ayrı ölkələrdə fəaliyyət göstərən cəmiyyətləri, təşkilatları, dərnəkləri və formalaşdırdıqları digər qurumlar bu gün beynəlxalq ictimaiyyətin respublikamızla daha yaxından tanış olmasında, onun barəsində əsl həqiqətlərdən, keçdiyi inkişaf yolundan xəbər tutmasında müstəsna rol oynayır.

Müstəqil Azərbaycanı onun sərhədləri çərçivəsindən kənarda layiqincə təmsil edən, tanıdan belə təşkilatlardan biri də real fəaliyyəti ilə mühüm uğurlar qazanmış Ümumrusiya Azərbaycan Konqresidir. Rusiyada yaşayan soydaşlarımızın ən böyük təşkilatlarından biri olaraq qəbul edilən bu qurum ölkələrimiz arasında qarşılıqlı münasibətlərin daha da dərinləşməsinə özünəməxsus böyük töhfələr verməkdədir. Rusiya vətəndaş cəmiyyətinin ayrılmaz hissəsinə çevrilən Ümumrusiya Azərbaycan Konqresinin (ÜAK) fəaliyyəti təşkilatın ötən il keçirilən üçüncü qurultayından sonra yeni keyfiyyət mərhələsinə qədəm qoymuşdur. Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının (RAGT) sədri Leyla Əliyevanın təşkilatın Mərkəzi Şurasının Rəyasət Heyətinin üzvü seçilməsi ÜAK-ın fəaliyyətinin daha aktiv hala gəlməsinə, sıralarının isə böyük sürətlə genişlənməsinə səbəb olmuşdur.

Azərbaycan tarixinin, mədəniyyətinin və digər vacib milli xüsusiyyətlərinin Rusiyada təbliğində böyük rol oynayan Konqres bu ölkənin ictimasi-siyasi həyatında fəal iştirak edir. Elə cari ilin martın 4-də Rusiyada keçirilən prezident seçkiləri ilə bağlı ÜAK bu ölkədə yaşayan azərbaycanlıların seçimi olan indiki Baş nazir Vladimir Putinin Rusiya Federasiyasının Prezidenti vəzifəsinə namizədliyini dəstəkləmək üçün möhtəşəm konsert təşkil etdi. "Bahar gəldi" adlanan konsert tamaşaçıların yaddaşında təkcə Rusiya və Azərbaycan incəsənət ulduzlarının təkrarsız çıxışları ilə deyil, həm də bu tədbirin kütləviliyi və bahar əhval-ruhiyyəsi ilə yadda qaldı.

Rusiyanın, demək olar ki, bütün regionlarında öz strukturlarını yaratmış Konqresin Həştərxan regional bölməsi də ötən dövr ərzində cəmiyyətə inteqrasiya, burada yaşayan azərbaycanlıların təşkilatlanması, hüquq və azadlıqlarının müdafiəsi, milli-mənəvi dəyərlərinin qorunması, ictimai-siyasi fəallığının artırılması istiqamətində mühüm işlər görmüşdür. Xəzər dənizində Azərbaycanla sərhəd qonşuluğuna malik Rusiyanın Həştərxan vilayətində yaşayan azərbaycanlılar fəaliyyətləri ilə artıq sanballı bir qüvvəyə çevrildiklərini sübuta yetirmişlər. Həştərxan şəhərində yaşayan 25 mindən çox azərbaycanlının formalaşdırdığı diaspor üzvləri kifayət qədər fəallıq nümayiş etdirir, Azərbaycan reallıqlarının, burada yaşanan inkişafın həm Rusiya, həm də dünya ictimaiyyətinə çatdırılmasında mühüm bir missiyanı layiqincə yerinə yetirirlər. Eyni zamanda, Azərbaycan diasporu Həştərxanın vilayət rəhbərliyi və ictimaiyyəti tərəfindən ən etibarlı tərəfdaş və yaşanan inkişafa böyük töhfələr verən təbəqə kimi qəbul olunur.

Artıq Həştərxanda güclü Azərbaycan diasporunun mövcudluğu burada yaşayan soydaşlarımızın milli və vətəndaş hüquqlarının qorunmasında səylərin birləşdirilməsinə əlverişli zəmin yaradır. Bu birlik öz növbəsində tarixi vətənindən ayrı düşmüş insanların milli-mənəvi dəyərlərə bağlılığını qoruyan vasitə kimi çıxış etməkdədir. Digər tərəfdən, Həştərxan vilayəti ilə Azərbaycan arasında səmərəli dostluq və əməkdaşlıq münasibətlərinin daha da inkişaf etdirilməsində də buradakı diaspor qüvvələrimiz mühüm rol oynamaqdadırlar. Azərbaycan üçün çox vacib olan lobbiçilik fəaliyyətinin formalaşdırılmasında və onun ölkənin həyati maraqlarına yönəldilməsində də ÜAK-ın Həştərxan regional bölməsi üzərinə düşən missiyanı layiqincə yerinə yetirir. Ona bəslənən ümidləri tam doğrultmağa çalışan Həştərxanın azərbaycanlı diasporu vilayətin ictimai-siyasi həyatında fəal iştirak edir, şəhər hökuməti və hakimiyyətin digər şaxələri ilə sıx əməkdaşlığa xüsusi önəm verir, müxtəlif partiyalar və ictimai təşkilatlarla qarşılıqlı fəaliyyət göstərir, ən mühüm ictimai tədbirlərdə yaxından iştirak edir.

Həştərxanda yaşayan azərbaycanlıların müstəqil Azərbaycan dövləti ilə mədəni, ictimai-siyasi, iqtisadi və digər əlaqələrinin daha da gücləndirilməsi xüsusi diqqət mərkəzində yer alır. Çünki burada yaşayan hər bir azərbaycanlı digər dünya ölkələrində məskunlaşan həmvətənlərimiz kimi yaxşı bilir ki, tarixi vətənləri olan Azərbaycan dünyanın harasında məskunlaşmasından asılı olmayaraq bütün soydaşlarımızın mənəvi dayağı, milli-mədəni maraqlarının ifadəçisidir. Prezident İlham Əliyevin Dünya Azərbaycanlılarının III Qurultayında səsləndirdiyi aşağıdakı fikirlər isə onların fəaliyyətini yönləndirən əsas şüara çevrilmişdir: "Dünyada yaşayan azərbaycanlıların bir vətəni var - o da Azərbaycandır! Dünyada yaşayan azərbaycanlıların arxasında Azərbaycan dövləti dayanır".

Ədalət Hüseynovun rəhbərliyi altında fəaliyyət göstərən ÜAK-ın Həştərxan regional bölməsi güclü Azərbaycan dövlətinin dəstəyini hər zaman öz üzərində hiss edir. Bu kontekstdə doğma dilimizi, milli-əxlaqi dəyərlərimizi, azərbaycanlıların bir xalq, millət kimi formalaşdırdığı şanlı tarixi və vətənimizin şərəfini qorumaq kimi üzərimizə düşən müqəddəs vəzifəni layiqli şəkildə yerinə yetirməyə çalışırıq. Həmçinin Həştərxan icmasına sıx inteqrasiya fonunda vilayətlə Azərbaycan arasında qarşılıqlı əlaqələrin daha intensiv şəkildə inkişafına nail olmaq fəaliyyətimizin prioritet istiqamətlərindəndir. Bunu şərtləndirən əsas səbəblərdən biri isə həm də müasir dünyanın inteqrasiya, intensiv millətlərarası əlaqələr, qlobal münasibətlər, milli sərhədləri aşıb keçən hadisələrlə zəngin olmasıdır. Hadisələrin belə inkişaf axarının fəaliyyət zamanı nəzərə alınmaması isə diaspor missiyasının lazımi şəkildə yerinə yetirilməsini mümkünsüz edir.

Digər tərəfdən o da xüsusi qeyd olunmalıdır ki, dünyanın müxtəlif ölkələrinə səpələnmiş azərbaycanlıların mədəni-siyasi birliyi, həmrəyliyi müstəqil Azərbaycanın və bütün dünya azərbaycanlılarının mənafeyinə uyğundur, eləcə də onun əsas strateji məqsədlərindən birini təşkil edir. Bu mənada azərbaycançılıq amalı və müstəqil dövlətçilik ideyası ətrafında yaranan milli birlik, həmrəylik harada yaşamasından asılı olmayaraq hər bir azərbaycanlının mənafeyinə tam uyğundur. Bütün bunları əldə rəhbər tutan Həştərxandakı Azərbaycan diasporu da tarixi vətənləri ilə nəfəs alır, daim onun təəssübkeşliyini çəkir və qayğıları ilə yaşayır. Daha bir mühüm həqiqət isə ondan ibarətdir ki, vətəndaşlıq borcu bizi yaşadığımız ölkə qarşısında hansı məsuliyyətə təhkim edirsə, milli mənsubluq hissi, azərbaycançılıq amalı hər birimizi müstəqil Azərbaycan dövləti qarşısında eyni məsuliyyətə sövq edir. Odur ki, azərbaycanlı adını biz həm Həştərxanda, həm də müstəqil Azərbaycan qarşısında layiqincə doğrultmağa çalışırıq.

Prezident İlham Əliyevin Dünya Azərbaycanlılarının III Qurultayında tarixi əhəmiyyət kəsb edən və proqram xarakteri daşıyan çıxışında səsləndirdiyi fikirlər, qarşıya qoyduğu vəzifələr isə fəaliyyətimizin əsas istinad nöqtələrini təşkil edir. Bütövlükdə ölkəmizin diaspor təşkilatları üçün çox böyük əhəmiyyət kəsb edən bu qurultayda cənab İlham Əliyev onların fəaliyyətinin gələcək istiqamətini müəyyən etmişdir. Azərbaycan Prezidenti soydaşlarımızın həm ölkə daxilində, həm də onun hüdudlarından kənarda əlbir olmasının zəruriliyini xüsusi vurğulamışdır. Dünya Azərbaycanlılarının III Qurultayı isə Azərbaycan diasporunun daha mütəşəkkil bır qüvvəyə çevrilməsi mərhələsinin başlanğıcını qoymuşdur.

Azərbaycanın müstəqilliyinin və dövlətçiliyinin möhkəmləndirilməsi, onun mövqeyinin dünya müstəvisində gücləndirilməsi, erməni təcavüzünə məruz qalmış Azərbaycan xalqının haqq səsinin dünyaya çatdırılması, Dağlıq Qarabağ probleminin ədalətli həllinə nail olunması və digər ümummilli məsələlərin həlli dünyada yaşayan bütün soydaşlarımız kimi, Həştərxan azərbaycanlılarının da birliyini və həmrəyliyini daha zəruri edən amilə çevrilmişdir. Fəaliyyətimizdə biz bu məqama hər zaman xüsusi diqqət yetiririk. Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış "Xocalıya ədalət" kampaniyası Həştərxanda da keçirildi. Şəhər ictimaiyyəti erməni cəlladlarının dinc azərbaycanlılara qarşı hansı vəhşiliklərlə müşayiət olunan soyqırımı törətməsindən daha yaxından agah oldu. Ümumiyyətlə, Ermənistan-Azərbaycan, Dağlıq Qarabağ münaqişəsi ilə bağlı əsl həqiqətlərin nədən ibarət olması, Azərbaycan torpaqlarının beynəlxalq hüquq normalarının kobud şəkildə pozularaq indiyə qədər işğal altında qalması faktoru, bu barədə Həştərxan vilayətinin çoxsaylı ictimaiyyətinin daha dolğun şəkildə məlumatlandırılması istiqamətində fəaliyyətimiz davamlı olaraq genişlənir.

Ümumi məqsədlər ətrafında birləşmək, təşkilatlanmaq, Həştərxandakı müxtəlif icmalarla, qurumlarla sıx təmas qurmaq, vilayətin siyasi və mədəni həyatında fəal iştirak etməklə artıq ÜAK-ın Həştərxan regional bölməsi burada aparıcı diaspor qüvvəsinə çevrilmişdir. Bunun real sübutlarından biri isə ondan ibarətdir ki, Həştərxanın azərbaycanlı diasporu vilayətlə Azərbaycan arasında münasibətlərin daha sürətlə inkişafına təsir göstərən güclü amil kimi çıxış edir. Burada bizim hamımızı azərbaycanlı olmaq kimi böyük bir məsuliyyət hissi, amalı birləşdirir. Qeyd etdiyim kimi, azərbaycanlı adını həm öz ölkəmiz, həm də müstəqil Azərbaycan qarşısında layiqincə doğrultmağa çalışırıq və bu, 2010-cu ilin oktyabrında Prezident İlham Əliyevin Həştərxana səfəri zamanı bizimlə görüşündə verdiyi əsas tövsiyələrdən biridir. Cənab İlham Əliyev vilayətin azərbaycanlı diasporuna Həştərxan ictimaiyyətinə daha sıx inteqrasiya olunmağı, ictimai-siyasi, sosial-mədəni həyatın fəal subyektlərindən birinə çevrilməyi məsləhət bilmişdir. Elə bu məqsədlə də biz sıx birləşərək, təşkilatlanaraq mütəşəkkil qüvvəyə çevrilmək istiqamətində daha böyük inamla fəaliyyət göstərməyə başlamışıq. Azərbaycan dövləti tərəfindən hər cür zəruri dəstək göstərilməsi isə Həştərxanın azərbaycanlı diasporunun mütəşəkkil qüvvəyə çevrilməsində böyük rol oynamışdır.

O da sevindirici haldır ki, fəaliyyətimiz Azərbaycan dövləti, onun rəhbəri cənab İlham Əliyev tərəfindən layiqincə qiymətləndirilir. ÜAK-ın Həştərxan regional bölməsinin sədri Ədalət Hüseynovun Azərbaycan Respublikası ilə Rusiya Federasiyası arasında dostluq əlaqələrinin inkişafındakı xidmətlərinə və diaspor quruculuğu sahəsindəki səmərəli fəaliyyətinə görə bu günlərdə Prezident İlham Əliyev tərəfindən 3-cü dərəcəli "Vətənə xidmətə görə" ordeni ilə təltif edilməsi haqqında sərəncam verilməsi bunun real təsdiqidir. Xatırlatmaq yerinə düşərdi ki, Azərbaycan Prezidenti xalqlar arasında dostluğun möhkəmləndirilməsi və Azərbaycan diasporunun inkişafı sahəsindəki xidmətlərinə görə ötən il iyulun 4-də Ədalət Hüseynovu "Tərəqqi" medalı ilə də təltif etmişdi. Bu, dünyanın digər ölkələrində yaşayan soydaşlarımız kimi, Həştərxan azərbaycanlılarına da göstərilən yüksək diqqət və qayğının daha bir bariz nümunəsidir. ÜAK-ın Həştərxan regional bölməsi sədrinin təltif olunduğu medal və orden bizə böyük qürur bəxş etməklə yanaşı, eyni zamanda Ə.Hüseynovun timsalında Həştərxandakı azərbaycanlı diaspora dövlətimiz tərəfindən verilən ali dəyər, yüksək qiymətdir.

Digər formalarda da göstərilən dəstək, həmçinin atılan addımlar azərbaycanlıların Həştərxanda ən etibarlı tərəfdaşlardan birinə çevrilməsində, vilayətin bütün iqtisadi və sosial layihələrində iştirak etməsinə təsirsiz ötüşməmişdir. Danılmaz həqiqətdir ki, istər sovetlər, istərsə də postsovet dövründə Rusiya, eləcə də onun konkret vilayətləri, o cümlədən Həştərxanla Azərbaycan arasında qarşılıqlı münasibətlərin inkişafında ümummilli lider Heydər Əliyevin misilsiz xidmətləri olmuşdur. Bu mənada dünya tarixinə ən görkəmli şəxsiyyətlərdən biri kimi daxil olan böyük siyasi xadim Heydər Əliyevin Həştərxan vilayətində ucalan abidəsi həm rusiyalıların, həm də azərbaycanlıların qardaşlığının, dostluğunun, onların ruhən və qəlbən birliyinin rəmzi kimi qiymətləndirilir. Abidənin yerləşdiyi parkın yenidən qurulması isə Həştərxan sakinləri tərəfindən böyük məmnunluq və minnətdarlıq hissi ilə qarşılanmışdır.

Ötən il mayın 19-da isə "Rusiya və Azərbaycan: regionlararası əməkdaşlığın yeni üfüqlərinə doğru" mövzusunda keçirilən forum çərçivəsində Həştərxanın mərkəzində, Naberejnaya Privoljskovo Zatona küçəsində Heydər Əliyev adına parkın təntənəli açılışı olmuşdur. 3,5 hektar ərazidə salınmış istirahət parkında geniş abadlıq və yaşıllaşdırma işləri aparılmış, mindən artıq ağac əkilmişdir. Burada müasir işıqlandırma sistemi quraşdırılmış və gözəl fəvvarə yaradılmış, oturacaqlar qoyulmuşdur. Elə həmin gün Rusiya və Azərbaycan Dostluğu körpüsünün təməli qoyulmuşdur. Körpü Heydər Əliyev adına park ilə Birinci Pyotrun abidəsi ucaldılmış parkı birləşdirəcəkdir.

Xatırlatmaq yerinə düşərdi ki, 2010-cu il oktyabrın 27-də ümummilli lider Heydər Əliyevin abidə kompleksinin Prezident İlham Əliyevin iştirakı ilə təntənəli açılış mərasimi zamanı Həştərxan vilayətinin qubernatoru A.Jilkinin xahişini nəzərə alaraq, Azərbaycanın dövlət başçısı park boyu axan Volqa çayının qolunun digər tərəfində yaşayan əhalinin istirahətini təmin etmək məqsədilə qolun üzərindən piyada keçid körpüsünün tikintisinin həyata keçirilməsini qərara almış və bununla bağlı müvafiq göstəriş vermişdir. Sözügedən tapşırığın yerinə yetirilməsi üçün körpünün layihəsini hazırlamaq məqsədilə dünyada aparıcı layihə institutlarından biri olan "VolqoMostStroyProyekt" institutuna sifariş verilmiş və sözügedən layihə institutunun mütəxəssisləri tərəfindən işlənib hazırlanmışdır. Artıq cari ilin fevralında sözügedən körpünün tikintisinə başlanmışdır. Layihənin sifarişçisi Ümumrusiya Azərbaycan Konqresinin Həştərxan regional bölməsidir. Körpünün tikintisi cari ilin sonunadək başa çatdırılacaqdır. 50 metrdən artıq uzunluğa və 6 metr enə malik olacaq körpünün metal konstruksiya şəklində tikilməsi nəzərdə tutulur. Körpünün bədii tərtibatı Azərbaycan və Rusiya milli elementlərini əks etdirən ikili ornamentlə bəzədiləcək. "Rusiya və Azərbaycan: regionlararası əməkdaşlığın yeni üfüqlərinə doğru" mövzusuna həsr edilən forum çərçivəsində keçirilən təməlqoyma mərasimi zamanı Azərbaycan və Rusiya nümayəndə heyətlərinin rəhbərləri Əli Həsənovun və Sergey Vinokurovun birgə bəyanatında deyilir ki, bu körpü Rusiya və Azərbaycan xalqlarının möhkəm dostluq münasibətlərinin əyani göstəricisi olacaqdır. Bu mühüm layihənin birbaşa müəllifi olan Prezident İlham Əliyevə Həştərxandakı Azərbaycan diasporu olaraq dərin təşəkkürümüzü bildiririk.

Bundan əlavə, yenə ötən ilin oktyabrında Həştərxanda ulu öndər Heydər Əliyevin adını daşıyan 11 nömrəli məktəbin təntənəli açılış mərasimi olmuşdur. Bakı küçəsində yerləşən təhsil ocağı Heydər Əliyev Fondunun təşəbbüsü və Azərbaycan dövlətinin maliyyə dəstəyi ilə yenidən qurulmuş, yeni korpuslar inşa edilmişdir.

Bu məktəbin açılması Azərbaycan-Rusiya humanitar əlaqələrini möhkəmləndirən mühüm hadisələrdən birinə çevrilmişdir və vilayət icması tərəfindən böyük razılıqla qarşılanmışdır. Əsaslı təmirdən sonra məktəbin siması büsbütün dəyişmişdir. 1937-ci ildə inşa edilmiş binanın özülü möhkəmləndirilmiş, iki yeni korpus tikilmişdir. Korpuslarda müasir idman kompleksi, iclas salonu və yeməkxana yerləşmiş, istilik sistemi və elektrik xətləri təzələnmişdir. Elektrik təchizatını daha etibarlı etmək üçün dörd transformator qoyulmuş, dərnək fəaliyyəti üçün kabinet açılmışdır. Təhsil müəssisəsi yeni kompyuterlər, mebel, yeməkxana avadanlığı ilə təchiz edilmişdir.

Həştərxan şəhər təsərrüfatının və infrastrukturun yenidən qurulmasında, təhsil sahəsinin inkişaf etdirilməsində Azərbaycandan olan iş adamlarının iştirakı davamlı surətdə artır və bütün bunlar olduqca yüksək qiymətləndirilir. Qeyd edilənlərin məntiqi nəticəsidir ki, Həştərxan Şəhər Duması əsası ümummilli lider Heydər Əliyev tərəfindən qoyulan Rusiya-Azərbaycan dostluğunun və strateji tərəfdaşlığın inkişafı və möhkəmlənməsində xidmətlərinə, Həştərxanda iri sosial-mədəni və iqtisadi layihələrlə bağlı təşəbbüslərinə, bu layihələri və Rusiyadakı Azərbaycan diasporunun fəaliyyətini dəstəkləməsinə görə Prezident İlham Əliyevi "Həştərxan şəhərinin fəxri vətəndaşı" adına layiq görmüşdür. Ötən il noyabrın 30-da Azərbaycanda səfərdə olan Həştərxan şəhərinin meri Sergey Bojenov "Həştərxan şəhərinin fəxri vətəndaşı" diplomunu və medalını cənab İlham Əliyevə təqdim etmişdir.

Bütün bunlar müstəqil Azərbaycanın, azərbaycanlı diasporun Həştərxanda böyük nüfuz sahibi olmasının real təsdiqidir. Təsadüfi deyildir ki, Azərbaycan diasporunun təmsilçiləri Həştərxanın iqtisadi-sosial həyatında da fəal mövqe tutur, vilayətin vacib infrastrukturlarının səmərəli və effektiv fəaliyyət göstərməsi üçün layiqincə çalışırlar. Həştərxanda azərbaycanlı sahibkarlara böyük etimad var və onların öz sahələrində peşəkar olmalarına əhali arasında inam mövcuddur. Bir zəruri faktı vurğulayım ki, rəhbərlik etdiyim N.Nərimanov adına Çörəkbişirmə Kombinatının normal fəaliyyət göstərməsi üçün vilayət rəhbərliyi tərəfindən hər cür dəstək göstərilir. Buna qarşılıq olaraq bizlər də işimizə daha məsuliyyətlə yanaşırıq və nəticə etibarilə kombinatımızın istehsal etdiyi çörək və çörək məhsulları bütün vilayətdə keyfiyyət sarıdan öndədir və bu sahədə bizimlə rəqabət aparacaq digər müəssisə yoxdur. Bütün bunlar isə ümumilikdə azərbaycanlıların vilayətdə nüfuzunu daha dayanıqlı edir.

Bu nüfuzun daha da yüksəlməsi, xalqlarımız arasında dostluq əlaqələrinin davamlı olaraq möhkəmləndirilməsi üçün fəaliyyətimizi qarşıdakı dövr ərzində daha da aktiv formada davam etdirmək başlıca məqsədimizdir. Qarşıdan gələn Novruz bayramı münasibətilə Həştərxanda müxtəlif tədbirlərin keçirilməsi, burada bir daha Azərbaycan reallıqlarının, mədəniyyətinin, azərbaycançılığın təbliği diqqət yetiriləcək əsas məqamlar olacaq.

Həştərxanda yaşayan hər bir soydaşımız yaxşı bilir ki, qarşısında duran mühüm vəzifələrdən biri də tarixi vətən - müstəqil Azərbaycanla sıx əlaqə saxlamaqla yanaşı, yaşadığı ölkədə azərbaycançılığı ehtiva edən milli dəyərləri qorumaq, tanıtmaq, yaşatmaq, inkişaf etdirməklə bağlıdır. Bundan başqa, harada yaşamasından asılı olmayaraq, sağlam milli adət və ənənələrin, mədəni dəyərlərin qorunub saxlanılması, yeni nəsillərə ötürülməsi dünya azərbaycanlılarının mənəvi borcudur. Qeyd edilən səpkidə ümumi məqsədlər ətrafında birləşmək, təşkilatlanmaq, Həştəxan ictimaiyyətilə sıx təmas qurmaq, siyasi və mədəni həyatda fəal iştirak etmək qarşımızda duran ümdə məsələlər sırasında yer alır. Bu da, öz növbəsində, ümumilikdə Azərbaycan-Rusiya əlaqələrinin genişlənməsinə böyük töhfələr verir.

Fəaliyyətimizə bundan sonra da Azərbaycan dövləti tərəfindən hər cür dəstək göstəriləcəyinə, görəcəyimiz işin isə layiqincə qiymətləndiriləcəyinə qətiyyən şübhə yoxdur. Bununla qarşıya qoyulmuş məqsədlərə daha tez nail olunacaq, dünyanın hər yerində olduğu kimi, Həştərxanda da milli diaspor hərəkatı daha da güclənəcək, onun fəaliyyəti daha yüksək nəticələr əldə olunmasına gətirib çıxaracaq.

İrahid MİRİŞOV,

Ümumrusiya Azərbaycan Konqresinin

Həştərxan regional bölməsinin sədr müavini

Azərbaycan.- 2012.- 10 mart.- S. 4.