Mərakeşin nüfuzlu “L'opinion” qəzetində “Qarabağ müharibəsi, uzun bir münaqişə” adlı geniş məqalə dərc edilmişdir

Mərakeşdə nəşr olunan fransız dilli "L'opinion" qəzetində "Qarabağ müharibəsi, uzun bir münaqişə" adlı geniş məqalə dərc edilmişdir.

Azərbaycanın Mərakeşdəki səfirliyindən AzərTAc-a bildirmişlər ki, məqalədə Ermənistan-Azərbaycan, Dağlıq Qarabağ münaqişəsinin 1988-ci ildən başladığı və indiyədək bu problemin öz ədalətli həllini tapmadığı vurğulanmışdır. Yazıda qeyd edilmişdir ki, bu problem keçmiş Sovet İttifaqı dağılandan sonra baş verən ən böyük etnik münaqişələrdən biridir.

Məqalədə iki ölkə arasında atəşkəs rejiminə nail olunduğu, münaqişənin sülh və dialoq yolu ilə həlli məqsədi ilə ATƏT-in Minsk qrupunun yaradıldığı qeyd edilmişdir. Müəllif erməni silahlı qüvvələrinin Azərbaycan ərazisinin 20 faizindən çox hissəsini işğal etdiyini və işğal edilmiş ərazilərdə beynəlxalq aləmdə tanınmayan qondarma "Dağlıq Qarabağ Respublikası"nın yaradıldığını bildirmişdir. Məqalədə Ermənistan-Azərbaycan, Dağlıq Qarabağ məsələsi regionun əsas və prinsipial problemlərindən biri olduğu vurğulanmış, münaqişənin həlli istiqamətində Madrid prinsiplərinin mahiyyəti və dövlət başçıları səviyyəsində danışıqlar aparıldığı qeyd edilmişdir. Dövlət başçılarının Soçidə keçirilən son görüşü də yazıda yer almış və tərəflər arasında ötən illərə nisbətən yaxınlaşmanın hiss olunduğu bildirilmişdir.

Məqalədə Azərbaycanın Mərakeşdəki səfirliyinin təşəbbüsü ilə İSESCO-nun Rabatdakı mənzil qərargahında Xocalı soyqırımının 20-ci ildönümü ilə bağlı anma mərasiminin yüksək səviyyədə qeyd olunması da bildirilmişdir. Müəllif İSESCO-nun baş direktoru Əbdüləziz bin Osman əl-Tüveycrinin Xocalı soyqırımı və dünyada baş verən bu kimi hadisələrə hüquqi qiymət verilməsinə çağırışını yüksək qiymətləndirmiş və tədbirlərin Azərbaycan həqiqətlərinin dünyaya çatdırılmasında mühüm rol oynayacağına əminlik ifadə etmişdir.

Azərbaycan.- 2012.- 15 mart.- S. 10.