İcazələrin elektron informasiya portalının təqdimatı olmuşdur

Martın 15-də İqtisadi İnkişaf Nazirliyi (İİN) icazələrin elektron informasiya portalını dövlət orqanlarının, yerli və beynəlxalq təşkilatların nümayəndələrinə, sahibkarlara təqdim etmişdir.

AzərTAc xəbər verir ki, bu münasibətlə keçirilən mərasimdə iqtisadi inkişaf nazirinin müavini Niyazi Səfərov Azərbaycanda sahibkarlığın inkişafı, biznes və investisiya mühitinin daha da yaxşılaşdırılması istiqamətində görülmüş tədbirlər barədə məlumat vermişdir.

Sahibkarlığın inkişafının Azərbaycanda iqtisadi siyasətin prioritetlərindən olduğunu söyləyən nazir müavini bildirmişdir ki, hazırda istehsal olunan ümumdaxili məhsulun 80 faizindən çoxu özəl bölmənin payına düşür.

Nazir müavini demişdir ki, Prezident İlham Əliyevin "Müəyyən sahibkarlıq fəaliyyəti növləri ilə məşğul olmaq üçün tələb edilən xüsusi razılıq (lisenziya) və icazə sistemi ilə bağlı bəzi məsələlər haqqında" 2011-ci il 26 oktyabr tarixli fərmanına əsasən yaradılmış portal özəl bölmənin inkişafına dövlət dəstəyinin daha bir təzahürüdür. Yeni sayt informasiya-kommunikasiya texnologiyaları sahəsində qabaqcıl nailiyyətlərin geniş tətbiqi yolu ilə ölkə vətəndaşlarının, eləcə də sahibkarların icazələrlə bağlı məlumatlılıq səviyyəsinin yüksəlməsini və bu sahədə şəffaflığın daha da artırılmasını təmin edəcəkdir.

Tədbirdə bildirilmişdir ki, İİN və Beynəlxalq Maliyyə Korporasiyasının birgə əməkdaşlığı ilə yaradılmış www.icazeler.gov.az saytı İsveçrənin İqtisadi Məsələlər üzrə Dövlət Katibliyinin maddi yardımı ilə formalaşmışdır.

Tədbirdə çıxış edənlər icazə sənədləri ilə bağlı vahid məlumat portalının yaradılmasının sahibkarlıq fəaliyyətinin genişləndirilməsində, bu sahədə məlumatlılıq səviyyəsinin və şəffaflığın artırılmasında əhəmiyyətini vurğulamışlar.

Sonra İİN-in sahibkarlığın inkişafı siyasəti şöbəsinin müdiri Zaur Qasımov www.icazeler.gov.az saytı barədə ətraflı məlumat vermişdir.

Bildirilmişdir ki, sahibkarlara icazə sənədlərinin alınması prosedurları və bu sənədləri verən dövlət orqanları haqqında vahid mənbədən məlumat almaq imkanı verən internet saytı 7 bölmədən ibarətdir. Saytda icazə sənədlərinin növü üzrə axtarış sistemi yaradılmışdır ki, bu da məlumatın asan tapılmasına imkan verəcəkdir. Portaldakı "Sahibkarlıq sahəsinə aid qanunvericilik aktlarının layihələri" xidmət bölməsində yerləşdirilmiş mərkəzi və yerli icra hakimiyyəti orqanlarının sahibkarlıq sahəsinə aid hazırladığı qanunvericilik aktları layihələrinin mətni bir ay müddətində saxlanılacaqdır.

Sonda sahibkarların saytla bağlı sualları cavablandırılmışdır.

Azərbaycan.- 2012.- 16 mart.- S. 7.