Tbilisidə 11-ci Beynəlxalq neft-qaz, energetika konfransı işə başlamışdır

Tbilisidə 11-ci Beynəlxalq neft-qaz, infrastruktur və energetika konfransı işə başlamışdır. İki gün davam edəcək konfransda Gürcüstan, Azərbaycan, Türkiyə, ABŞ və Ukraynadan nümayəndələr iştirak edirlər.

Azərbaycan Respublikasının Prezidenti yanında Strateji Araşdırmalar Mərkəzinin elmi işçisi, energetika üzrə mütəxəssis Gülmirə Rzayeva konfransın hər il keçirildiyini və burada Cənub qaz dəhlizi, bölgənin enerji ehtiyatları və s. aktual məsələlərin müzakirə olunduğunu bildirmişdir. Biz konfrans iştirakçılarına Cənub qaz dəhlizinin seçim mərhələsinin mövcud durumu, bu qaz dəhlizinin reallaşması yönümündə görülən işlər, həyata keçirilən layihələr barədə ətraflı məlumat verdik. Azərbaycan xüsusi mövqeyə malik olduğundan bütün proseslərdə önəmli yer tutur. Belə ki, Azərbaycan "Şahdəniz" konsorsiumunun üzvüdür, qazın sahibidir, buna görə də əsas qərarı Azərbaycan verir. Söhbət "Şahdəniz-2" layihəsindən gedir. Belə ki, bu layihənin gerçəkləşdirilməsi nəticəsində 2017-ci ildən Avropaya 10 milyard kubmetr qaz ötürüləcəkdir. Gələcəkdə, uzunmüddətli perspektivdə çox güman ki, Mərkəzi Asiya qazı da, yəqin ki, Türkmənistan qazı da bizim infrastruktura qoşula bilər. Lakin bu, bir sıra məqamlardan, o cümlədən Transxəzər qaz layihəsinin reallaşdırılmasından, həmçinin bu ölkələrdə qaz infrastrukturunun, qaz mənbələrinin inkişafından, Avropa şirkətlərinin investisiya yatırımından və s. məqamlardan asılıdır.

Azərbaycanın Gürcüstandakı səfiri Azər Hüseyn Avropanın enerji təchizatının təhlükəsizliyində, Cənubi Qafqazda sabitliyin təmin olunmasında Azərbaycanın və Gürcüstanın böyük rolunu diqqətə çatdırmış, Azərbaycanın zəngin neft-qaz ehtiyatından, onun xarici bazarlara nəqlindən danışmışdır. Diplomat Azərbaycanın əlavə marşrutların işlənilməsinə mühüm diqqət verdiyini, ARDNŞ-in Gürcüstan yanacaq bazarında rolu, bu ölkənin qazlaşdırılmasında fəaliyyəti və s. məsələlərdən söhbət açmış, olduqca köhnə avadanlığa malik Metsamor Atom Elektrik Stansiyasının bölgə üçün böyük təhlükə yaratdığını vurğulamışdır.

Gürcüstan energetika və təbii ehtiyatlar nazirinin birinci müavini Məryəm Valişvili qeyd etmişdir ki, bu tədbirin hər ilin mart ayında Tbilisidə keçirilməsi ənənəyə çevrilmişdir və konfransda, adətən, layihələr, onların yerinə yetirilməsi sahəsində görülən işlər, qarşıda duran vəzifələr müzakirə olunur. Həmçinin iştirakçılar energetika sahəsində mövcud vəziyyət, perspektivlər barədə fikir mübadiləsi aparırlar. Nazir müavini demişdir ki, neft-qaz sahəsi Avropa İttifaqı üçün də mühüm əhəmiyyət daşıyır. Biz Azərbaycan və Türkiyə ilə birlikdə Cənub dəhlizinin inkişafı perspektivlərini müəyyənləşdiririk. Bu, Xəzər regionundan neft-qazın nəqli ilə bağlı böyük layihədir. Bir sözlə, tərəfdaşlığın daha da dərinləşdirilməsi baxımından bu tədbir mühüm əhəmiyyət kəsb edir. "Şahdəniz-2" böyük layihədir və biz hamımız onun reallaşmasını gözləyirik. Burada hasil olunacaq qazın 2017-ci ildə Gürcüstan vasitəsilə Avropaya nəqli planlaşdırılır.

İslam ƏLİYEV

Azərbaycan.- 2012.- 29 mart.- S. 2.