Astaralıların yurdsevərlik nümunəsi

Astara qədim və zəngin tarixə malikdir. Eramızdan əvvəl də bura yaşayış məskəni olmuş, insanlar əkinçilik və heyvandarlıqla məşğul olaraq yaşayışlarını təmin etmişlər.

Tarixi qaynaqlardan məlum olur ki, qədim dövrdə Astarada sikkə (pul) kəsilmiş, həmin pullardan ticarətdə geniş istifadə edilmişdir. İndi yurdun zəngin tarixini öyrənməyi, təbliğ etməyi və gələcək nəsillərə çatdırmağı astaralılar özləri üçün başlıca vəzifə hesab edirlər. Rayondakı tarix-diyarşünaslıq muzeyində qədim tarixi dövrlərə aid əşyalar qayğı ilə qorunub saxlanılır. Eyni zamanda, daim axtarışlar aparılaraq yeni əşyalar tapılır, muzey yeni eksponatlarla zənginləşdirilir. Bu sahədə Astara sakinlərinin fəallığı, təşəbbüskarlığı təqdirəlayiqdir. Zəngin tariximizin təbliğində muzey əməkdaşlarının fəaliyyəti razılıq doğurur. Hər gün muzeyə çoxlu sayda tamaşaçı - ziyalılar, gənclər, məktəblilər gəlir, tariximizə dair məlumatlar alırlar.

Astara təbii gözəlliyə malikdir. Coğrafi mövqeyi, relyefi Astaranı yaxşı mənada fərqləndirən xüsusiyyətlərdən biridir. Azərbaycan Respublikasının Prezidenti cənab İlham Əliyev Astaraya səfəri zamanı buranın gözəlliyi, nadir xüsusiyyətə malik olması barədə fikrini belə ifadə etmişdir: "Astara Azərbaycanın qədim torpağıdır, Azərbaycanın gözəl guşələrindən biridir. Burada çox gözəl şərait var. Dəniz var, meşələr var, dağlar var, böyük nemətlər var."

Astaralılar təbiətin yurda bəxş etdiyi gözəlliklə kifayətlənmirlər, onu daha da artırmağa, rayonu yeniləşdirməyə, müasirləşdirməyə bütün səyləri ilə çalışırlar. Son bir neçə ildə Astara şəhərinin mərkəzi yenidən qurularaq göz oxşayan mənzərə yaradılmışdır. Burada ümummilli lider Heydər Əliyevin adını daşıyan park salınmış, sakinlərin istirahəti üçün hər cür şərait yaradılmışdır. Tikilib istifadəyə verilən "Uşaq Əyləncə Mərkəzi" balacalara gözəl hədiyyədir.

Astara şəhərinin küçələri, xüsusi ilə Heydər Əliyev prospekti yenidən qurulmuş, asfaltlaşdırılmış, zövq oxşayan hala salınmışdır. Tikilib istifadəyə verilən Dövlət bayrağı meydanı, "Gənclər evi", Astara Gömrük İdarəsi üçün bina şəhərə yeni gözəllik bəxş edir.

Astarada tikinti və quruculuq işləri səngimir, gündən-günə geniş vüsət alır. Olimpiya idman kompleksinin, kənd təsərrüfatı məhsulları üçün saxlama kamerasının, YAP rayon təşkilatının yeni inzibati binasının, Kijəbə qəsəbəsində 10 kilometrlik Kijəbə-Ojakəran, Kijəbə-Qəcimardə yolunun asfaltlaşdırılması, Dövlət bayrağı meydanının tikintisi başa çatmışdır. Azərbaycan Prezidenti cənab İlham Əliyevin sərəncamları ilə ayrılmış vəsait hesabına rayon mərkəzi xəstəxanasının binası əsaslı təmir edilərək yenidən qurulmuş, müayinə və müalicə üçün müasir tibbi avadanlıqlarla təchiz olunmuşdur. Bu ərazidə 1,5 hektar sahədə gözəl istirahət parkı salınmışdır. Rayon telekommunikasiya binasının fasadı yeniləşdirilmişdir. Şəhərdə 7 saylı məktəb üçün yeni bina inşa edilir. 5 orta məktəb binası, 2 saylı uşaq bağçası əsaslı təmir olunan obyektlər sırasına daxildir.

Tikinti və quruculuq işləri təkcə rayonun mərkəzində aparılmır. Görülən işlər nəticəsində kəndlər də simasını dəyişir. Ucqar dağ kəndi Toradidə 180 yerlik yeni məktəb binası tikilib istifadəyə verilmiş, 30-a yaxın kəndə təbii qazın verilməsi bərpa edilmişdir. Hazırda Suparibağ, Rudəkənar və Şuvi kəndlərində yeni məktəb binaları tikilir.

Yazın gəlişi, Novruz bayramı ərəfəsində Astarada abadlıq və təmizlik işləri yeni vüsət almışdır. Rayon sakinlərinin təşəbbüsü və yaxından iştirakı ilə rayon ərazisində, Astara-Bakı magistral yolu boyunca küçələr daha səliqəli hala salınmışdır. Hasarlar, evlərin fasadları yeniləşdirilmişdir. Qaldırılan təşəbbüslər rayon icra hakimiyyəti tərəfindən bəyənilir, keçirilən iməciliklərə dəstək verilir.

Astara müstəqil ölkəmizin cənubunda sərhəd xəttində yerləşir. Hər gün buradan yüzlərlə qonaq gəlib keçir. Turistlərin sayı da az deyil. Rayonda turizmin inkişafı üçün də hər cür şərait yaradılmışdır. "Şindan", "Savalan", "Abşeron" və digər hotel və istirahət mərkəzlərində qalan qonaqlar razılıqlarını bildirirlər.

Ulu öndər Heydər Əliyevin astaralılar haqqında dediyi sözləri həmyerlilərimiz minnətdarlıq hissi ilə qəbul etmişlər: "Mən məmnuniyyətlə qeyd edirəm ki, müstəqil Azərbaycanın həyatında astaralılar çox əhəmiyyətli rol oynayırlar, öz tarixi vəzifələrini yerinə yetirirlər və Azərbaycan dövlətçiliyinin inkişaf etməsi yolunda böyük xidmətlər göstərirlər".

Astaralılar yaxşı bilirlər ki, Azərbaycana qədəm qoyan hər bir qonaqda ilk təəssürat məhz burada formalaşır. Bu təəssüratın xoş, yaxşı mənada unudulmaz olması, Astaranın daha abad və daha gözəl görünməsi üçün rayon sakinləri cidd-cəhdlə çalışırlar. Yurdsevərlik isə astaralıları öz məqsədlərinə çatdırır.

Mərasim HACIYEV

Azərbaycan.- 2012.- 29 mart.- S. 3.