BMT-nin gündəliyini indi Azərbaycan müəyyən edir

Çağdaş dünyanın sürətlə dəyişən siyasi nizamı bu prosesdə baş qaldıran nüfuz savaşından qalib çıxmaq, beynəlxalq miqyasda öz yerini möhkəm saxlamaq üçün çevik siyasət tələb edir. Hər ölkə bu proseslərin axarı ilə ayaqlaşa bilmir. Misal üçün, Ermənistan kimi asılı dövlətlər kiminsə ətəyindən yapışmaqla uçurumdan xilas olmağa can atırlar.

Azərbaycan da vaxtilə uçurumun bir addımlığında idi. Bir tərəfdən Ermənistanın havadarlarının köməyi ilə işğalçılıq siyasətini genişləndirməsi, kənardan Azərbaycanda etnik münasibətlərin süni şəkidə qızışdırılmasına yönəlik cəhdlər nəinki müstəqilliyimizi, dövlət kimi mövcudluğumuzu sual altında qoymuşdu. Belə bir vaxtda ulu öndər Heydər Əliyevin hakimiyyətə dönüşü ilə hər şey kökündən dəyişdi. Ulu öndərin uzaqgörənliyi ilə Azərbaycanın müstəqilliyinin və dövlətçiliyinin təməli möhkəmləndirildi. Heydər Əliyevin sayəsində inkişaf yoluna qədəm qoyan müstəqil Azərbaycan həm də tədricən beynəlxaq etimadı qazandı, diplomatik nailiyyətlərin əsası qoyuldu.

Ötən 8 ildə Prezident İlham Əliyevin sayəsində respublikamız beynəlxalq müstəvidə saysız-hesabsız diplomatik uğurlar əldə edib. Bu illər müstəqillik tariximizə Azərbaycanın beynəlxalq imicinin daha da yüksəlməsi, etibarlı tərəfdaş kimi dünya birliyindəki yerinin möhkəmlənməsi dövrü kimi daxil olub. Ötən ilin oktyabrında Azərbaycanın BMT Təhlükəsizlik Şurasına üzv seçilməsi isə müstəqilliyimizin 20 ili ərzində qazanılan siyasi-diplomatik nailiyyətlərin zirvəsi oldu. Erməni lobbisinin və antiazərbaycan şəbəkənin cəhdlərinə baxmayaraq BMT-nin 193 üzvündən 155-nin Azərbaycanı dəstəkləməsi ölkəmizin beynəlxalq nüfuzunun, uğurlu xarici siyasətinin təntənəsi idi.

Bu gün Azərbaycan BMT Təhlükəsizlik Şurasının həm də sədri olmaqla son dərəcə möhtəşəm və tarixi diplomatik uğurun təntənəsini yaşayır. BMT-dəki fəaliyyətinin 20-ci ildönümündə ölkəmizin bu təşkilatın əsas strukturuna rəhbərlik etməyə başlaması həqiqətən çox əlamətdar siyasi hadisədir. May ayı ərzində və eləcə də gələn ilin sentyabrında Azərbaycan BMT TŞ-ya sədrliyi zamanı bu qurumun gündəliyini müəyyən edəcək, proseslərin fəal iştirakçısı olacaq. BMT TŞ-ya həm üzvlüyü, həm sədrliyi zamanı Azərbaycan bu qurum qarşısında olan öhdəliklərinə sadiq qalacaq, dünyanın haqq səsinin bu yüksək tribunadan çatdırılmasına çalışacaq.

Mayın 4-də Nyu-Yorkda Azərbaycan Respublikasının Prezidenti İlham Əliyevin sədrliyi ilə keçirilən BMT Təhlükəsizlik Şurasının yüksək səviyyəli iclasında müzakirəyə təqdim edilən "Terror aktlarının beynəlxalq sülh və təhlükəsizliyə yaratdığı təhdidlər" mövzusu da göstərdi ki, Azərbaycan bu ali qurumda məhz sülhün və təhlükəsizliyin təmin olunması naminə konkret fəaliyyət ortaya qoyur. Həmin iclasda BMT-nin baş katibi Pan Gi Munun iştirakı və Prezident İlham Əliyevin təqdim etdiyi müzakirə ilə bağlı fikirlərini bildirməsi, həmçinin bu məsələ ilə əlaqədar ABŞ, Almaniya və digər ölkələrin təmsilçilərinin çıxış etməsi Azərbaycanın terrorla bağlı narahatlığına verilən beynəlxalq həmrəyliyin göstəricisidir. Prezident İlham Əliyev çıxışında Azərbaycanın BMT TŞ-ya sədrliyi zamanı ədalət ideallarının bərqərar olmasına öz töhfələrini verəcəyini bildirib: "Azərbaycan ədalət ideallarını, beynəlxalq hüququ və bütün ölkələr arasında sülh şəraitində əməkdaşlığı müdafiə edəcəkdir. Biz bölgəmizdə region ölkələrini bir araya gətirmək üçün çox çalışırıq. Təşəbbüslərimiz regional əməkdaşlığın dostluq, tərəfdaşlıq və yaxşı qonşuluq ruhunda genişləndirilməsinə yönəlib. Biz birmənalı olaraq Təhlükəsizlik Şurasında sədrliyimiz zamanı böyük töhfəmizi verəcəyik".

Bütövlükdə, Azərbaycanın BMT TŞ-da fəaliyyət göstərəcəyi iki il ölkəmiz üçün çox mühüm dövrlərdən biri olaraq tarixə düşəcək. BMT TŞ-da uğurlu fəaliyyət nəticəsində Azərbaycanın beynəlxalq nüfuzu daha da artacaq, ölkəmiz regionun lideri statusunu möhkəmləndirməklə yanaşı, dünya siyasətində söz sahibi olacaq. Şübhəsiz ki, bu uğurlar üzləşdiyimiz ağır problemin - Dağlıq Qarabağ münaqişəsinin Azərbaycanın maraqları çərçivəsində həlli istiqamətində mühüm rol oynayacaq.

Günel MƏLİKLİ,

Bakı Dövlət Universitetinin

Politologiya və sosiologiya

kafedrasının doktorantı

Azərbaycan.- 2012.- 17 may.- S. 3.