Azərbaycan xalqı tolerantlığı ilə digər xalqlara nümunədir

Stiv KOEN,

ABŞ Konqresinin üzvü

- ABŞ ilə Azərbaycan arasında əlaqələr çox vacibdir. Bu 20 il çox tez keçmişdir. Şadam ki, bu gün Azərbaycan Avropaya və Qərbə üz tutmuşdur. Bizim münasibətlərimizin bir hissəsi bu gün dünyanın ciddi ehtiyac duyduğu enerji resurslarına əsaslanır. Lakin mənim üçün ən əhəmiyyətli olan Azərbaycanda insanlar arasında gördüyüm xoş münasibətlərdir. Azərbaycan müsəlman ölkəsi olsa da, öz cəmiyyətinin xristian və yəhudi üzvlərinə heç bir fərq qoymur. Dünyanın bir çox başqa yerlərində olan problemlər burada yoxdur. Azərbaycan xalqı tolerantlığı ilə digər xalqlara nümunədir.

Mən Azərbaycanın xəritəsinə bir daha nəzər saldım. Bu ölkənin torpaqlarının bir hissəsi işğal olunmuşdur. Münaqişənin davam etməsi bölgənin inkişafını çətinləşdirir. Azərbaycanın yaxın və uzaq qonşuları ilə gözəl münasibətləri vardır. Azərbaycan ilə İsrailin münasibətləri də yüksək səviyyədədir. Azərbaycanda yəhudi icmasına tarix boyu xoş münasibət olmuşdur və bu, indi də belədir. Azərbaycan xalqı tolerantlıq ənənələrindən qürur duymalıdır. Tolerantlıq Azərbaycanın güc mənbəyidir. Buna görə də Azərbaycana minnətdarlığımı bildirir və konfransın işinə uğurlar arzulayıram.

Azərbaycan ilə ABŞ arasında müttəfiqlik ənənələri yeni dəyərlərlə zənginləşəcəkdir.

Azərbaycan.- 2012.- 17 may.- S. 4.