"Eurovision" yarışmasının iştirakçıları "Baku Crystal Hall"da ilk məşqlərini davam etdirirlər

"Eurovision-2012" mahnı müsabiqəsində 42 ölkəni təmsil edən ifaçılar artıq bir neçə gündür ki, Azərbaycan paytaxtında ilk məşqlərini keçirirlər. Hər bir ifaçı Xəzərin sahilində inşa edilmiş möhtəşəm "Baku Crystal Hall"da təşkil olunacaq bu möhtəşəm şouda ölkəsinə birincilik qazandırmaq üçün bütün imkanlarını səfərbər etmişdir. Arenadakı ilk məşqlər və keçirilən mətbuat konfransları da dediklərimizə əyani sübutdur.

AzərTAc xəbər verir ki, mayın 15-də "Baku Crystal Hall" səhnəsinə ilk olaraq "Eurovision-2012" mahnı müsabiqəsində Serbiyanı təmsil edən Zeljko Yoksimoviç çıxmışdır. Müğənni bu mötəbər yarışmada ölkəsini "Nije Lyubav Stvar" mahnısı ilə təmsil edir.

Müsabiqədə iştirakını özünə şərəf bilən Z.Yoksimoviç demişdir ki, qeyri-adiliyi, səs və işıq effektləri ilə seçilən "Baku Crystal Hall" Avropa səhnələrinin önündə getməyə layiqdir.

Bakının təbii gözəllikləri, xalqımızın qonaqpərvərliyi, tolerantlığı, adət-ənənələri və digər özünəməxsus müsbət keyfiyyətləri haqqında xoş sözlər söyləyən serbiyalı təmsilçi paytaxtımıza valeh olduğunu söyləmişdir.

"Eurovision-2012" yarışmasında Makedoniyanı təmsil edən Kaliopi Bukle Balkanlarda məşhur müğənnilərdəndir. O, vətənində 100-dən çox konsert vermiş, bir sıra teatr və filmlərdə rol almışdır. Doqquz yaşında musiqi sahəsində ilk qələbəsini əldə edən makedoniyalı təmsilçi 1996-cı ildə "Skopye" festivalında birinci yerə layiq görülmüşdür. Kaliopi Bukle müsabiqədə "Crno E Belo" mahnısını doğma dilində ifa edəcəkdir.

İlk məşqdən sonra K.Bukle jurnalistlərə Bakıda keçirilən "Eurovision-2012" mahnı müsabiqəsinin əvvəlki yarışmalardan daha gözəl olacağını bildirmişdir.

"Eurovision" müsabiqəsində ilk dəfə iştirak etdiyini bildirən makedoniyalı müğənni belə bir nüfuzlu yarışmanın Azərbaycanda keçirilməsini yüksək qiymətləndirmişdir. Qonaq Bakıda olmağından çox sevindiyini dilə gətirmişdir: "Burada qonaqpərvər və mehriban insanlarla tanış olmuşam, dostlar qazanmışam. Bu, mənim üçün çox xoşdur".

"Baku Crystal Hall" barədə təəssüratlarını bölüşən Makedoniya təmsilçisi demişdir: "Hər bir səhnə müğənninin özünü rahat hiss edəcəyi qədər sadə olmalıdır. Mən Bakı səhnəsinə çıxdığım zaman bu sadəliyi hiss etdim və sözün əsl mənasında, onun möhtəşəmliyinin bir daha şahidi oldum".

"Niderlandı Bakıda təmsil etməkdən qürur duyuram". Bu fikirlər isə Niderland təmsilçisi Joan Franka məxsusdur. O, Bakıdakı "Eurovision" şousunda "You and me" mahnısı ilə çıxış edəcəkdir.

Niderland təmsilçisi əslən türk olduğunu da diqqətə çatdırmışdır. Müsabiqəsinin möhtəşəmliyindən danışan Joan Franka bildirmişdir ki, musiqi həyatımızda müsbət rol oynayır.

Ölkəmizin milli mətbəxi ilə bağlı fikirlərini bölüşən Niderland təmsilçisi yeməklərimizin çox dadlı və ləziz olduğunu diqqətə çatdırmışdır.

"Baku Crystal Hall"un növbəti qonağı Malta təmsilçisi Kurt Kalleya olmuşdur. Bəstəkar və müğənni olan Kurt Kalleya 2010-cu ildə İtaliyada keçirilmiş "Orfeo" beynəlxalq festivalında qələbə qazanmışdır. Müxtəlif televiziya şoularında bek-vokalçı, solo ifaçı kimi çıxış edən Kurt Kalleya "Eurovision-2012" mahnı müsabiqəsində "This is the night" mahnısını ifa edir.

Malta təmsilçisi "Eurovision-2011" mahnı müsabiqəsinin qalibi, azərbaycanlı ifaçı Eldar Qasımovla duet oxumağı da planlaşdırır.

Bakıya ikinci dəfə gəldiyini bildirən Malta təmsilçisi paytaxtımızda gedən sürətli inkişafı yüksək qiymətləndirmişdir. Azərbaycanın gündən-günə inkişaf etdiyini vurğulayan müğənni ölkəmizin Avropaya sürətlə inteqrasiya etdiyini söyləmişdir. Malta təmsilçisi 25 min tamaşaçı üçün nəzərdə tutulmuş "Baku Crystal Hall"un səhnəsində ölkəsini layiqincə təmsil edəcəyinə söz vermişdir.

Belarusu təmsil edən "Litesound" rok qrupu 2005-ci ildə Dmitri və Vladimir Karyakin qardaşları tərəfindən yaradılmışdır. Belarusda və onun hüdudlarından kənarda xeyli populyar olan "Litesound" qrupu 2006-cı ildə İtaliyada "Internazionale di Maiori" festivalında birinci yerə layiq görülmüşdür. Qrupun səsləndirdiyi "Solo Per Te" mahnısı isə 20 həftə müddətində İtaliya hit-paradlarının zirvəsində yer almışdır.

"Litesound" qrupunun üzvləri "Eurovision-2012" mahnı müsabiqəsində "We are The Heros" mahnısı ilə çıxış edəcəklər.

"Baku Crystal Hall"da qurulmuş səhnənin müqayisəyəgəlməz dərəcədə gözəl olduğunu qeyd edən qrupun üzvü Dmitri Karyakin müsabiqənin iştirakçıları üçün yaradılmış şəraiti yüksək qiymətləndirmişdir.

"Litesound" qrupunun digər üzvü Vladimir Karyakin isə bildirmişdir ki, "Eurovision-2012" mahnı müsabiqəsində ifa edəcəkləri "We are The Heros" mahnısının tanıdılması üçün Avropa turuna çıxmasalar da, bəstə internet və televiziya vasitəsilə kifayət qədər səslənmiş və geniş tamaşaçı rəğbəti qazanmışdır.

Portuqaliya təmsilçi Filipa Sousanın da Bakı səhnəsindəki məşqləri uğurlu olmuşdur. 12 yaşında konservatoriyaya daxil olan Filipa Sousa bir sıra müsabiqələrin qalibidir. Onun səsindəki ahəngdarlıq müxtəlif musiqi üslublarında - fado, pop, rok janrlarında uğurlu ifaya imkan verir.

"Eurovision-2012" mahnı müsabiqəsində ölkəsinə qələbə qazandırmaq istəyən Portuqaliya təmsilçisi yarışmada "Vida Minha" ("Mənim həyatım") mahnısını ifa edəcəkdir.

Filipa Sousa jurnalistlərə müsahibəsində demişdi: "Bakının müasir görünüşü, XIX əsrin memarlıq üslubunu özündə əks etdirən bugünkü göydələnlər məni çox heyrətləndirir".

Portuqaliyalı təmsilçi bildirmişdir ki, musiqi ilə öz hisslərimi tamaşaçı auditoriyasına çatdırmağa çalışıram. Zənnimcə, musiqini təkcə eşitmək kifayət deyil, onu hiss etmək və yaşamaq lazımdır. Hər bir gənc müğənni "Eurovision" mahnı müsabiqəsində iştirak etmək istəyir. Səhnəyə daxil olduğum zaman buradakı işıq və səs effektinə valeh oldum.

Ukraynanın "Eurovision-2012" mahnı müsabiqəsində təmsilçisi Qaytana Essami ölkəsinin milli seçim mərhələsinin finalında 21 ifaçı ilə yarışmışdır. Ötən il "UEFA Avro-2012-nin rəsmi dostu" adına layiq görülmüş Qaytana Essami müsabiqədə Ukraynanı "Be my guest" mahnısı ilə təmsil edir.

Bakıya gəlməyi çoxdan arzuladığını deyən Ukrayna təmsilçisi paytaxtımızın hər bir guşəsini bəyəndiyini diqqətə çatdırmışdır. O vurğulamışdır ki, Bakıya gəldiyi andan bu günədək yalnız gülərüz insanlarla qarşılaşmışdır. Hər bir azərbaycanlı müsabiqə iştirakçılarına əlindən gələn köməyi göstərməyə çalışır.

"Baku Crystal Hall"da Bolqarıstan təmsilçisi Sofi Marinovanın ilk məşqi bu məkanda günün son ifası olmuşdur. 36 yaşlı bolqarıstanlı müğənni bir sıra festivalların iştirakçısı və qalibidir. Qaraçı mənşəli müğənni beş oktavadan artıq geniş səs diapazonuna sahibdir. Repertuarında pop-folklor və etnik musiqi janrlarının üstünlük təşkil etdiyi Bolqarıstan təmsilçisinin mahnılarından ibarət "Stari Rani" toplusu ən çox gəlir gətirən musiqi albomları siyahısındadır.

"Eurovision-2012" mahnı müsabiqəsində qalib gəlmək niyyətində olan Sofi Marinova yarışmada "Love Unlimited" mahnısı ilə çıxış edəcəkdir.

Azərbaycanda təşkil olunan müsabiqədə iştirak etmək üçün çətinliklərlə üzləşdiyini deyən müğənni ölkəsinin milli seçim turlarının gərgin mübarizə şəraitində keçdiyini vurğulamışdır. Bütün çətinliklərə baxmayaraq, bu müsabiqədə iştirak etmək hüququnu qazandığını qeyd edən Sofi Marinova Bolqarıstanı layiqincə təmsil edəcəyinə əminliyini bildirmişdir.

Sonda Bolqarıstan təmsilçisi repertuarından olan qaraçı mahnısını ifa etmişdir. Mahnı jurnalistlər tərəfindən alqışlarla qarşılanmışdır.

Mayın 16-da isə "Baku Crystal Hall"da Sloveniya, Xorvatiya, İsveç, Gürcüstan, Türkiyə, Estoniya, Slovakiya, Norveç, Bosniya və Herseqovina və Litva təmsilçiləri ilk məşqlərini keçirir, o cümlədən müsabiqəyə hazırlıq və Azərbaycanla bağlı təəssüratlarını bölüşürlər.

Azərbaycan.- 2012.- 17 may.- S. 8.