Azərbaycanda reallaşdırılan dövlət qadın siyasəti yüksək qiymətləndirilmişdir

Mayın 17-də Azərbaycan Respublikasının Ailə, Qadın və Uşaq Problemləri üzrə Dövlət Komitəsinin (AQUPDK) sədri Hicran Hüseynova BMT-nin xüsusi məruzəçisi Anand Qrover ilə görüşmüşdür.

Ölkəmizdə həyata keçirilən dövlət qadın və uşaq siyasəti haqqında geniş məlumat verən H.Hüseynova qeyd etmişdir ki, Prezident İlham Əliyev gender balansının təmin edilməsi məsələlərinə, ailə və uşaq problemlərinin həllinə xüsusi diqqət yetirir.

Görüşdə Heydər Əliyev Fondunun Prezidenti, UNESCO-nun və İSESCO-nun xoşməramlı səfiri Mehriban Əliyevanın qadınların müxtəlif sahələrdə bərabərhüquqlu fəaliyyət imkanlarının genişləndirilməsinə, uşaq hüquqlarının həyata keçirilməsinə və ailə dəyərlərinin möhkəmləndirilməsinə yönəlmiş fəaliyyəti xüsusi vurğulanmışdır.

Komitə sədri AQUPDK-nın nəzdində yerləşən Uşaq və Ailələrə Dəstək Mərkəzlərinin fəaliyyəti barədə məlumat vermiş, "2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı" çərçivəsində reproduktiv sağlamlıq sahəsində aparılan maariflənmə işlərindən danışmışdır.

AQUPDK sədri müvafiq istiqamətlər üzrə xarici ölkələrlə əməkdaşlığın inkişafının əhəmiyyətini qeyd etmişdir.

A.Qrover Azərbaycanda reallaşdırılan dövlət qadın siyasətini, ailə və uşaq problemlərinin həlli sahəsində toplanılmış müsbət təcrübəni yüksək qiymətləndirmiş, gələcəkdə əməkdaşlığın daha da genişləndirilməsinin zəruriliyini qeyd etmişdir.

AzərTAc

Azərbaycan.- 2012.- 18 may.- S. 5.