Avropa İttifaqı Ermənistan-Azərbaycan, Dağlıq Qarabağ münaqişəsinin tərəfləri arasında etimad mühitinin möhkəmləndirilməsinə dair tədbirlər paketi hazırlamışdır

Avropa İttifaqı (Aİ) Ermənistan-Azərbaycan, Dağlıq Qarabağ münaqişəsinin tərəfləri arasında etimad mühitinin möhkəmləndirilməsinə dair tədbirlər paketi hazırlamışdır.

AzərTAc xəbər verir ki, bu sözləri Avropa İttifaqının Azərbaycandakı nümayəndəliyinin rəhbəri Roland Kobia demişdir.

Diplomat bildirmişdir ki, Avropa İttifaqı Dağlıq Qarabağ münaqişəsinin tərəfləri arasında qarşılıqlı etimadın möhkəmlənməsinə xidmət edə biləcək bəzi təkliflər hazırlamışdır. Lakin hələlik tərəflər bu təklifləri qəbul etməmişlər. Ümidvarıq ki, yaxın gələcəkdə tərəflər bu təkliflərimizi qəbul edəcəklər.

Avropa İttifaqının sülh yolu ilə nizamlanma prosesinə dəstəyini artırmaq niyyətində olduğunu deyən R.Kobia qeyd etmişdir ki, Aİ-nin region üzrə xüsusi nümayəndəsi Filipp Leforta həm də Dağlıq Qarabağ münaqişəsi ilə bağlı mandatın verilməsi, həmçinin qurumun tərəflər arasında etimad mühitinin möhkəmləndirilməsinə dair tədbirləri hazırlaması buna bariz nümunədir. Bu təkliflər Azərbaycan və Ermənistan ilə müzakirə olunur. Münaqişə həddən artıq uzun müddətdir davam edir və qoşunların təmas xəttində insanlar həlak olurlar. Biz ATƏT-in Minsk qrupunun fəaliyyətini dəstəkləyirik, lakin rəsmi danışıqlardan başqa, insanların qarşılıqlı etimadını bərpa etmək də çox vacibdir.

Azərbaycan.- 2012.- 18 may.- S. 9.