Azərbaycan Hollandiyada keçirilən GRİD-2012 Beynəlxalq Fotoşəkil Biennalesində ilk dəfə təmsil olunur

 

 Mayın 16-da Hollandiyada "GRİD-2012" Beynəlxalq Fotoşəkil Biennalesi açılmışdır.

İyulun 1-dək davam edəcək Beynəlxalq Fotoşəkil Biennalesində ilk dəfə olaraq Azərbaycan da təmsil olunur.

 Sənət meydanına yenicə atılmış fotoqraf İlkin Hüseynov Azərbaycanda müasir incəsənətin inkişafı istiqamətində çalışan "YARAT!" qeyri-kommersiya təşkilatının dəstəyi ilə yuxarıda qeyd olunan tədbirdə çəkdiyi sənədli fotoların yeni silsiləsini təqdim etmişdir.

"YARAT!"dan AzərTAc-a bildirmişlər ki, kurasiyanı 2011-ci ildə 54-cü Venesiya Biennalesində Azərbaycan pavilyonunun həmkoordinatoru olmuş Suad Qarayeva yerinə yetirir.

İ.Hüseynovun şəkillərində Azərbaycanın paytaxtı Bakı şəhərinin ətrafında yerləşən qəsəbədə təşkil edilən toy mərasimində çəkilən kadrlar əks olunmuşdur. Xəzər dənizinin sahillərində yerləşən Nardaran qəsəbəsi yerli mədəniyyətin və icma ənənələrinin mühafizəsi ilə tanınır. Əsrlər boyu formalaşan ənənələr, məsələn, kişilər və qadınlar üçün ayrıca təşkil olunan toy mərasimləri indiyədək qorunur və bu, nardaranlıları sürətlə avropalılaşan və müasirləşən qonşu kəndlərin əhalisindən fərqləndirən cəhətdir. Odur ki, İ.Hüseynovun işlərində artıq köhnəlmiş, lakin hər şeyə rəğmən inadla qorunan şəhər reallıqlarına özünəməxsus baxış təqdim olunur.

"GRİD-2012" Beynəlxalq Fotoşəkil Biennalesində İ.Hüseynovun Nardaranda kişi toyu mərasimindən çəkdiyi iyirmi şəkildən on biri nümayiş olunacaqdır. Ənənəvi xeyir-şər mərasimləri sırf bu məqsədlə qurulmuş çadırlarda təşkil olunur; bu çadırlar yalnız yas və toy mərasimlərinin keçirilməsi üçün istifadə edilir. Bəşər övladının həyatında baş verən iki əsas hadisənin çadırlar vasitəsilə müəyyən mənada qovuşması çox zaman məşğul və kosmopolit şəhər həyat tərzinin kölgəsində qalan fərdi və sosial ünsiyyət təməllərinə qayıdış prosesini canlandırır.

Kurator S.Qarayeva Haydeqqerin "Yaşamaq məskunlaşmaq deməkdir" konsepsiyasına istinadla demişdir: "Biz çadırın təməl məskunlaşma vahidi kimi vacibliyini vurğulamaq məqsədilə işləri məhz şəkillərin çəkildiyi çadırda nümayiş etdirmək qərarına gəldik. Müasir şəhər mühitinə daban-dabana zidd olan İ.Hüseynovun installyasiyası şəhər həyatının fərqli aspektləri üzərində dərindən düşünmək üçün imkan yaradır".

Əlavə məlumat əldə etmək məqsədilə, Paget PR nümayəndəsi Uil Pecetlə will@pagetpr.com elektron ünvanına yazmaq və ya 020 7323 6963 nömrəli telefona zəng vurmaq mümkündür.

Təməli 2011-ci ildə Aida Mahmudova tərəfindən qoyulan "YARAT!" qeyri-kommersiya təşkilatı Azərbaycan müasir incəsənətinin milli və qlobal səviyyədə dəstəklənməsi və təbliği ilə məşğuldur. Onun 2011-ci ilin oktyabrında təşkil etdiyi "Ön söz" adlı ilk sərgini yalnız bir ay ərzində 20.000 nəfərdən artıq tamaşaçı ziyarət etmişdir. Təşkilat  bu layihənin uğurunu davam etdirərək 2012-ci ilin fevral ayından "012 Bakı Public Art" festivalını keçirir.

"YARAT!"ın əsas məqsədi Azərbaycanda və ölkədən kənarda qeyri-kommersiya incəsənət təsisatları ilə dialoqun qurulması və təcrübə mübadiləsinin aparılmasıdır. Təşkilat həmçinin incəsənətlə bağlı təhsil təşəbbüsləri və beynəlxalq proqramları dəstəkləyir.

Hollandiyada keçiriləcək "GRİD-2012" Beynəlxalq Fotoşəkil Biennalesində iştirak edən İ.Hüseynov Bakıda yaşayır. O, bir çox mükafatlarla təltif edilmiş fotojurnalistdir. İ.Hüseynov qonşu ölkələrdə sosial dəyişikliklər yaratmağa çalışan təşkilatlarla işləyərək son üç ildə sənədli fotoqraf kimi məşhurlaşmışdır. Öz işləri vasitəsilə müvafiq tarixçələr nəql etməklə, o, cəmiyyətin etinasız yanaşdığı məsələləri qabartmağa çalışır. 2011-ci ildə İ.Hüseynov "Doğma şəhər" layihəsinə görə Magnum Təsisatının Ehtiyat Fondu tərəfindən təltif olunmuşdur. İ.Hüseynovun işləri "Associated Press", "InvisiblePhotographer", "AFP", "Reuters", "Yahoo", "CNN International", "Globaljournalist" və "Media Paran" agentlikləri tərəfindən işıqlandırılaraq çap olunmuşdur.

İ.Hüseynov Manuel Rivera-Ortiz Fondunun təşkil etdiyi Winephoto müsabiqənin finalçısı olmuş, PowerHouse tərəfindən keçirilmiş kitablar müsabiqəsində ikinci yeri tutmuşdur. Bu yaxınlarda o, Roberto Villagraz Təqaüd Proqramının qalibi və World Press Joop Swart Masterclass tədbirlərinin iştirakçısı elan edilmişdir. İ.Hüseynov həmçinin London fotoşəkil festivalının finalçısıdır.

S.Qarayeva Londonda yaşayır. O, Londonun Ali İqtisadiyyat Məktəbinin fəlsəfə və dövlət siyasəti üzrə magistraturasını bitirdikdən sonra aparıcı investisiya banklarında maliyyə vəzifələrində işləyərək uğurlu karyera qurmuşdur. S.Qarayeva  Mərkəzi Sent-Martin Kollecində müasir incəsənətin tədqiqi və sonradan Qlazqo Universitetində Kristis Təhsil Proqramı üzrə aktual və müasir incəsənət üzrə magistr dərəcəsini almaqla incəsənət aləminə qədəm qoymuşdur. Hazırda Sotbisdə layihə meneceri işləyir.

Bu layihə Bakı Şəhər Mədəniyyət və Turizm İdarəsinin dəstəyi ilə həyata keçirilir.

 

 

Azərbaycan.- 2012.- 19 may.- S. 7.