Azərbaycan “Eurovision-2012”yə 50 milyon manat ayırıb

 

 "Azad Azərbaycan" telekanalının "Telemarafon" verilişinin qonağı olan maliyyə naziri Samir Şərifov "Eurovision-2012" mahnı müsabiqəsinə çəkilən xərclərdən danışıb.

Lent.az-ın yaydığı məlumata görə, nazir bildirib ki, "Eurovision-2012" mahnı müsabiqəsinin keçirilməsi üçün 2012-ci ilin fevralında Azərbaycanın dövlət büdcəsindən 50 milyon manat məbləğində vəsait ayrılıb bu vəsaitin hamısı müsabiqənin işçi qrupuna çatdırılıb: "Hər il Nazirlər Kabineti Azərbaycanda keçiriləcək yerli beynəlxalq tədbirlərlə bağlı vəsaitlərin ayrılması barədə qərar verir. 2012-ci ilin fevralında xüsusi büdcə təşkil olunub. O cümlədən bundan əvvəl Avropa Yayımlar Birliyinə 8 milyon İsveçrə frankı ayrılıb. Həmin 8 milyon İsveçrə frankı depozit puludur və həmin pulun geri qayıdacağını gözləyirik".

Samir Şərifov qeyd edib ki, "Eurovision" mahnı müsabiqəsinin işçi qrupuna sponsorlardan da daxilolmalar varbütün bunlar ümumilikdə müsabiqənin büdcəsini təşkil edir: "İşçi qrupu tərəfindən bizə hesabatlar təqdim olunub. Ən çox vəsait televiziya şousunun hazırlanmasına sərf olunur. Həm şounun hazırlanmasına, həm də şounun hazırlanması üçün müvafiq avadanlıqların gətirilməsinə, nəqliyyat xərclərinə ümumilikdə 40 milyon manat vəsait sərf olunub. İnanırıq ki, ayın 26-da o vəsait özünü doğruldacaq. İşçi qrupu dəniz kənarında bir bina da kirayələyib, ona da vəsait  büdcədən gedir. İşçi qrupu işçilər də götürür. Digər tərəfdən, nümayəndə heyətləri üçün avtobuslar ayrılıb. Bir məqamı da deyim. Deməzdim ki, İşçi qrupu bizdən əlavə pul istəməyib. Ancaq demişik ki, ayırdığımız pul budur, istəyirsinizsə, sponsorlardan vəsait alın, reklamlar yerləşdirin".

Maliyyə naziri "Baku Crystal Hall"un tikintisindən də danışıb: "Dövlət Bayrağı Meydanı ətrafında böyük tədbirlərin keçirilməsi üçün bir obyektin tikilməsi "Eurovision-2012" mahnı müsabiqəsindən əvvəl nəzərdə tutulmuşdu. O cümlədən Tofiq Bəhramov stadionunda yenidənqurma işləri aparılması planlaşdırılmışdı. İndi 2017-ci ildə bu stadionda qadınlar arasında futbol üzrə Avropa çempionatının keçirilməsi gündəmə gəlib. Digər tərəfdən, dənizkənarı bulvarın uzadılması, Bakının çıxışında yeni yolun tikilməsi planlaşdırılmışdı, layihəsi vardı. Çünki bu yol çox dar idi. Çox gözəl yol tikilib. Mahnı müsabiqəsi olmasaydı da, o yol tikiləcəkdi. Yəni, bunlar əvvəldən planlaşdırılan işlər idi və "Eurovision-2012" mahnı müsabiqəsi ilə bağlı nəzərdə tutulmamışdı".

Samir Şərifov onu da qeyd edib ki, Avropanın mərkəzindəki ölkələrlə müqayisədə Azərbaycanda belə tədbirin keçirilməsi daha böyük vəsait tələb edir. Nazir bunu lazımi avadanlıqların Avropadan Azərbaycana gətirilməsinin daha böyük nəqliyyat xərcləri tələb etməsi ilə əsaslandırıb. Maliyyə naziri "Eurovision-2012" mahnı müsabiqəsindən gözlənilən qazancdan da söz açıb: "Qazanc gəlsə, etiraz etməyəcəyik. İctimai Televiziya bununla bağlı daxilolmaları bizə göstərəcək. Ancaq bir məsələ də var. İctimai Televiziya bu vəsait hesabına öz maddi-texniki bazasını möhkəmləndirmək niyyətində olduğunu da bildirib. Baxacağıq".

Maliyyə naziri müxtəlif nazirliklərin "Eurovision-2012" mahnı müsabiqəsi ilə bağlı tədbirlər keçirməsinin müsabiqə ilə bağlı xərclər sırasına daxil edilməsini  düzgün saymayıb. "Tutaq ki, Azərbaycanda keçiriləcək belə möhtəşəm yarışma ilə bağlı Mədəniyyət və Turizm Nazirliyi bir tədbir təşkil edirsə, biz bu vəsaiti "Eurovision-2012" mahnı müsabiqəsinə çəkilən xərcə daxil etməməliyik", - deyə Samir Şərifov bildirib.

 

 

Azərbaycan.- 2012.- 22 may.- S. 7.