Haaqada “İran, Azərbaycandan əlini çək!” şüarı altında etiraz aksiyası keçirilmişdir

Mayın 20-də Benilüks Azərbaycanlıları Konqresi (BAK) Niderland Krallığının Haaqa şəhərindəki parlament binasının qarşısında "İran, Azərbaycandan əlini çək!" şüarı altında etiraz aksiyası keçirilmişdir.

Konqresdən AzərTAc-a bildirmişlər ki, nümayişçilər İranın apardığı antiazərbaycan təbliğatını birmənalı şəkildə qınamış, bu siyasəti müstəqil Azərbaycan dövlətinin daxili işlərinə qarışmaq kimi qiymətləndirdiklərini bəyan etmişlər.

BAK-ın yaydığı bəyanatda İranın bəzi siyasi dairələrinin Azərbaycanda gedən sürətli inkişafdan və bunun Güney Azərbaycanda milli azadlıq hərəkatının başlanmasına stimul verə biləcəyindən narahat olduqları qeyd edilmişdir. "Bu baxımdan İranda Azərbaycan dövləti və dövlətçiliyi əleyhinə əsassız ittihamlar və bəyanatlar səslənməkdədir. Hətta Azərbaycanda guya dövlət tərəfindən dini etiqad azadlığının boğulduğu görüntüsünü yaratmağa səy göstərirlər. Halbuki İran özü Ümumdünya İnsan Hüquqları Bəyannaməsi, irqi ayrı-seçkiliyin bütün formalarının ləğv edilməsi haqqında Beynəlxalq Konvensiya milli və yaxud etnik, dini və dil azlıqlarına mənsub şəxslərin hüquqları haqqında BMT Bəyannaməsinin müddəalarına hörmətsizlik nümayiş etdirərək Güney Azərbaycanda yaşayan 35 milyon azərbaycanlının hüquqlarını pozur, onların ana dilində təhsil almaq, milli kimliyini yaşatmaq, adət və ənənəsini təbliğ etmək hüquqlarını əllərindən alaraq məqsədyönlü şəkildə bu xalqı məhv etməyə çalışır" - deyə bəyanatda vurğulanır.

Azərbaycan.- 2012.- 22 may.- S. 11.