BMT baş katibi və UNESCO-nun baş direktoru Dünya Mətbuat Azadlığı Günü münasibətilə birgə müraciət yaymışlar

BMT-nin baş katibi Pan Gi Mun və UNESCO-nun baş direktoru İrina Bokova 3 may - Dünya Mətbuat Azadlığı Günü münasibətilə birgə müraciət yaymışlar.

BMT-nin Azərbaycandakı nümayəndəliyindən AzərTAc-a daxil olmuş müraciətdə ifadə azadlığının ən dəyərli insan hüquqlarından biri olduğu, bunun bütün digər azadlıqların əsası olub insan ləyaqətinin təməlini təşkil etdiyi qeyd olunmuşdur. Vurğulanmışdır ki, bu hüququn mövcudluğu üçün isə ən vacib amil azad, plüralist və müstəqil mediadır. İnsan Hüquqları haqqında Ümumi Bəyannamənin 19-cu maddəsində qeyd olunduğu kimi, mətbuat azadlığı hər kəsə əqidə azadlığı və onu sərbəst şəkildə ifadə etmək, dövlət sərhədlərindən asılı olmayaraq istənilən media vasitəsilə informasiya və ideyaları qəbul etmək və yaymağa icazə verir. Sağlam və dinamik cəmiyyətlər üçün məhz belə bir azadlıq vacibdir.

Müraciətdə qeyd olunmuşdur ki, Dünya Mətbuat Azadlığı Günü mətbuat azadlığı naminə mübarizə bayrağını qaldırmaq üçün verilmiş bir imkandır. Biz üzv dövlətlərə, dünyanın hər yerində fəaliyyət göstərən peşəkar media və qeyri-hökumət təşkilatlarına səslənərək onları həm internet, həm də digər yerlərdə beynəlxalq qəbul olunmuş prinsiplər əsasında özünü sərbəst ifadə etmək azadlığının inkişafına töhfə vermək üçün BMT ilə gücləri birləşdirməyə çağırırıq. Bu, fərdi hüquqlar üçün bir sütun, sağlam cəmiyyətlərin təməli və sosial dəyişiklik üçün gücdür.

Azərbaycan.- 2012.- 2 may.- S. 4.