ATƏT DTİHB, ATƏT PA, AŞ PA və Avropa Parlamenti Ermənistanda keçirilmiş parlament seçkilərini pisləyən birgə bəyanat yaymışlar

Ermənistanda keçirilmiş parlament seçkiləri zamanı ciddi qanun pozuntuları aşkar olunmuş, seçki məcəlləsinin tələblərinə əməl olunmamış, seçicilərə qarşı təzyiqlər qeydə alınmış, şikayətlərə baxılmamışdır.

AzərTAc xəbər verir ki, bu fikirlər ATƏT-in Demokratik Təsisatlar və İnsan Haqları Bürosu (ATƏT DTİHB), ATƏT-in Parlament Assambleyası, Avropa Şurasının Parlament Assambleyası (AŞ PA) və Avropa Parlamentinin mayın 6-da Ermənistanda keçirilmiş parlament seçkiləri ilə bağlı birgə bəyanatında əksini tapmışdır. Bəyanata əsasən, səsvermə günü çoxlu qayda pozuntusu aşkar olunmuş, iqtidar partiyasının nümayəndələrinin seçki prosesinə müdaxilələri qeydə alınmışdır. Siyasi partiyaların bir-birinə inamsızlığı seçki prosesində narahatlıq doğurmuşdur.

Bəyanatda həmçinin bildirilir ki, yerli hakimiyyət orqanlarının və bəzi partiyaların Seçki Məcəlləsinin qaydalarına əməl etməməsi, məktəb müəllimlərinin dərs zamanı seçkiqabağı kampaniyalarda iştirak etməyə məcbur edilmələri, siyasi partiyaların nümayəndələrinin seçicilərə hədiyyələr paylamaları və məktəb divarlarında reklam xarakterli materialların yapışdırılması faktları qeydə alınmışdır. Bütün bunlar ATƏT-in 1990-cı il tarixli Kopenhagen sənədinə ziddir.

Azərbaycan.- 2012.- 9 may.- S. 14.