Azərbaycan ilə Qazaxıstan, İran, Fələstin və Sudan arasında əməkdaşlığın perspektivləri müzakirə olunmuşdur

Mayın 9-10-da Misir Ərəb Respublikasının Şarm əl-Şeyx şəhərində Qoşulmama Hərəkatının Əlaqələndirmə Bürosunun nazirlər səviyyəsində keçirilən iclasında iştirak edən Azərbaycanın xarici işlər naziri Elmar Məmmədyarov Fələstinin xarici işlər naziri Riyad əl-Maliki, iranlı həmkarı Əli Əkbər Salehi və Qazaxıstanın xarici siyasət idarəsi başçısının müavini Kayrat Umarov ilə görüşlər keçirmişdir.

XİN-in mətbuat xidmətindən AzərTAc-a bildirmişlər ki, görüşlərdə ikitərəfli münasibətlər, regional məsələlər və beynəlxalq təşkilatlar çərçivəsində əməkdaşlığın perspektivləri müzakirə edilmişdir. Tərəflər qarşılıqlı maraq doğuran digər məsələlər barədə də fikir mübadiləsi aparmışlar.

Nazir Elmar Məmmədyarov, həmçinin Sudanın xarici işlər üzrə dövlət naziri Salah Vanasi ilə də görüşmüşdür. S.Vanasi BMT Təhlükəsizlik Şurasında sədrliyinin başlaması ilə əlaqədar Azərbaycanı təbrik etmiş, Sudanın ölkəmizlə əməkdaşlığını genişləndirmək əzmində olduğunu vurğulamış və ölkəsindəki vəziyyət barədə məlumat vermişdir. Görüşdə BMT Təhlükəsizlik Şurasının gündəliyində duran Sudanla bağlı məsələ ətrafında da geniş fikir mübadiləsi aparılmışdır.

Azərbaycan.- 2012.- 11 may.- S. 10.