Romada EANA-nın illik konfransı keçirilmişdir

Mayın 10-da İtaliya paytaxtında Avropa Xəbər Agentlikləri Alyansının (EANA) illik konfransı keçirilmişdir. Konfransın işində bu təşkilatın üzvləri, o cümlədən 2008-ci ildən qurumun üzvü olan Azərbaycan Dövlət Teleqraf Agentliyi (AzərTAc) də iştirak edir. Konfransda AzərTAc-ı agentliyin baş direktoru Aslan Aslanov, xarici dillərdə xəbərlər baş redaksiyasının baş redaktoru Orxan Muradov və agentliyin Almaniyadakı xüsusi müxbiri Vüqar Seyidov təmsil edirlər.

Finlandiyanın STT-Lehtikuva agentliyinin baş redaktoru Mika Peterson konfransı açaraq gündəliyi elan etmişdir. Sonra moderatoru Mika Peterson olan birinci paneldə İtaliyanın

ANSA agentliyinin icraçı direktoru Cüzeppe Çerbone multimedia vasitələrinin gələcək nəsli mövzusunda, Frans-Press agentliyinin (AFP) prezidenti Emanuel Huq internetdən xəbər agentliklərinin maliyyələşdirilməsi mənbəyi kimi istifadə edilməsi haqqında, Almaniyanın DPA agentliyinin vitseprezidenti Matias Maan və DPA-nın layihə meneceri Yoahim Vaydeman həmin agentliyin Avropa kontekstində işinin yeni istiqamətləri haqqında məruzələrlə çıxış etmişlər.

Avstriyanın APA - Austria Presse Agentur agentliyinin icraçı direktoru Piter Kropşun moderator olduğu ikinci paneldə Çexiyanın ÇTK agentliyinin baş direktoru Yirji Maystr xəbərlər bazarında tərəfdaşlıq və rəqabət mövzusunda, Assoşieyted Press agentliyinin icraçı direktoru Klayv Marşal milli xəbər agentliklərinin maliyyələşdirilməsi haqqında, PricewatehouseCoopers şirkətinin direktoru Corcina Hudzon Avropanın yeni media bazarlarının öyrənilməsi və alternativ maliyyələşdirmə ssenarilərinin təhlili haqqında məruzələrlə çıxış etmişlər. Bundan əlavə, konfransa sponsorluq edən Mainstream Data təşkilatının rəhbərləri - şirkətin prezidenti Skot Kalder və media xidmətləri məsələləri üzrə vitse-prezident Qreq Uiks də təqdimat məruzələri ilə çıxış etmişlər.

Fasilədən sonra üçüncü paneldə Hollandiyanın ANP - Algemeen Nederlands Persbureau agentliyinin direktoru Erik van Qruytuysen Niderlandın xəbərlər bazarında rəqabət mübarizəsi və həmin agentliyin İnternet vasitəsilə qazanc əldə etməsi üsulları mövzusunda, Polşanın PAP agentliyinin icraçı direktoru Lidiya Sobanska və bu təşkilatın kommersiya direktoru Piotr Ambrozyak dövlət xəbər agentlikləri tərəfindən kommersiya əməliyyatlarının tənzimlənməsi yolları haqqında, Serbiyanın Tanyuq agentliyinin baş direktoru Branka Cukiç və agentliyin xarici əlaqələr departamentinin rəhbəri Draqana Milutinoviç bu media strukturunun maliyyələşdirilməsi sahəsində gələcək planlar haqqında məruzələrlə çıxış etmişlər.

Nəhayət, yenə Mika Petersonun moderatorluq etdiyi dördüncü paneldə Portuqaliyanın LUSA xəbər agentliyinin baş direktoru Afonso Komeasın agentliyin qarışıq, özəl-dövlət mülkiyyət forması haqqında və Yunanıstanın ANA agentliyinin xarici əlaqələr departamentinin direktoru Dimitra Letsanın

EANA tərəfindən media bazarında aparılan illik sorğu barədə məruzələri dinlənilmişdir.

Sonra məruzələr ətrafında müzakirələr aparılmışdır.

AzərTAc-ın nümayəndə heyəti konfrans çərçivəsində digər agentliklərdən olan həmkarları ilə bir sıra görüşlər keçirmiş, ikitərəfli əməkdaşlıq və əlaqələrin genişləndirilməsi məsələlərini müzakirə etmişdir.

Konfrans öz işini mayın 11-də başa çatdıracaqdır.

Vüqar SEYİDOV

Azərbaycan.- 2012.- 11 may.- S. 10.