Niderlandın məşhur “Telegraf” qəzetində Azərbaycandan və “Eurovision-2012” mahnı müsabiqəsindən bəhs edən geniş məqalə dərc olunmuşdur

Niderlandda böyük oxucu auditoriyasına malik nüfuzlu "Telegraf" qəzetinin 19 may tarixli nömrəsində Bakıda keçirilən "Eurovision" mahnı müsabiqəsi barədə məqalə dərc edilmişdir.

Azərbaycanın Niderland Krallığındakı səfirliyindən AzərTAc-a bildirmişlər ki, məqalədə Bakı şəhərinin qeyri-adi gözəlliyi, buradakı tarixi abidələr, insanların qonaqpərvərliyi, ləziz milli mətbəximiz haqqında geniş məlumat verilir. Həmçinin Bakının "Eurovision-2012" mahnı müsabiqəsinə ev sahibliyi edəcəyi və şəhərin çoxsaylı turistlər üçün hazır olduğu bildirilir.

Bakı şəhərindən və azərbaycanlıların səmimi qonaqpərvərliyindən bəhs edən bu məqalədə ölkəyə hollandiyalıların gözü ilə baxılaraq zəngin mədəniyyətə malik Azərbaycan xalqının öz milli adət-ənənələrinə nə qədər sıx bağlı olduğundan, lakin bununla yanaşı, azərbaycanlıların daim yeniləşməyə, müasirləşməyə və inkişaf etməyə can atan millət olmasından söhbət açılır.

Bakının ecazkar gözəlliyini və ecazkarlığını tərənnüm edən müəllif hollandların Azərbaycana səfər etmələrinin onların yaddaşlarında unudulmaz xatirə kimi qalacağını diqqətə çatdırır.

Azərbaycan.- 2012.- 23 may.- S. 4.