“The Washington Times”: “Azərbaycan yüksəlişdə və füsunkarlıq işığındadır”

AzərTAc xəbər verir ki, ABŞ-ın nüfuzlu "The Washington Times" nəşrində "Azərbaycan yüksəlişdə və füsunkarlıq işığındadır" sərlövhəli məqalə dərc etmişdir.

Məqalə müəllifi yazır: "Bakının dəniz kənarında axşamlar Avropa rəqs musiqisi səslənir və ailələr gəzintiyə çıxırlar. Konsertlər açıq səma altında olur. Şişə çəkilmiş ət təklif edən restoranlar yerli əhaliyə və əcnəbilərə xidmət göstərirlər".

Məqalədə bildirilir ki, keçmiş sovet respublikasının paytaxtı öz tutqun sənaye imicindən azad olmuş, Qədim dünyanın İstanbul cazibədarlığını və Dubayın lovğa memarlıq nailiyyətlərini özündə birləşdirən ciddi işgüzar mərkəzə çevrilmişdir. İndi isə bura islahatların nəticələrini nümayiş etdirmək üçün ideal səhnə əldə etmişdir. Çünki Bakıda "Eurovision" mahnı müsabiqəsi keçirilir".

Nəşr yazır: "Bu əfsanəvi şouya dünyada 125 milyon adam tamaşa edir. "Eurovision" 57-ci ildir keçirilir və 42 ölkədən populyar və plastik ifaçıların epik mübarizəsinə çevrilmişdir".

Müəllif yazır ki, Bakı gecələri bolluq və özünə inam əlaməti kimi gözqamaşdırıcı cəlalı ilə seçilir. Yenilənmiş arxitektura moderni və islam dövrünə aid binalar üç göydələndən ibarət olan və axşamlar işıqlanan, yaxud teleekranlara çevrilən "Flame Towers" kompleksi kimi müasir konstruksiyalarla diqqət uğrunda mübarizə aparır. Yüksək keyfiyyətli restoranlar və eksklüziv dizayner geyimlərinin satıldığı butiklər ölkədə 20 il davam edən neft bumu sayəsində güclənən, sürətlə artan zəngin elitadan xəbər verir.

Məqalədə deyilir: "Azərbaycan zənginləşir və 9 milyonluq türkdilli əhalisi olan bu ölkədə əksəriyyət sovet dövründə qadağan edilmiş islam köklərinə qayıdır. İslam çiçəklənir.

Qərb üçün Azərbaycan, əsasən, neft deməkdir. Ölkə hələ XIX əsrin sonlarında yeraltı sərvətlərin kəşfiyyatçılarını cəlb edirdi. Onların arasında amerikalılar da az deyildi. İlk müasir quyuların qazılmasından 1840-cı illərdə 60 il keçəndən və Nobel və Rotşild kimi əcnəbi maqnatların sərmayə yatırımından sonra dünya neftinin yarısından çoxu Bakıda hasil edilirdi. Sovet dövründə birinci bum zəifləmiş, lakin Azərbaycan 1990-cı illərdə müstəqillik əldə etdikdən sonra yenidən vüsət almışdır".

Məqalə müəllifi yazır ki, ölkədə neft ehtiyatları müxtəlif cür qiymətləndirilir, lakin hamı neft ehtiyatlarının 7 milyard barreldən çox olması ilə razıdır. Üstəlik Azərbaycanda təxminən 850 milyard kubmetr qaz ehtiyatı da vardır. Azərbaycan Qərb üçün enerji ehtiyatları mənbəyi kimi daha cəlbedici olmuşdur.

Son 8 ildə yoxsulluq həddindən aşağı yaşayan insanların sayı da 5 dəfə azalmışdır. Hazırda həmin göstərici təxminən 7,6 faiz təşkil edir. Bu məlumatlar yanvar ayında Dövlət Statistika İdarəsi tərəfindən dərc edilmişdir. Rəqəmlər Dünya Bankının məlumatları ilə təxminən üst-üstə düşür.

Azərbaycan.- 2012.- 25 may.- S. 3.