Qara dəniz İqtisadi Əməkdaşlıq Təşkilatının Parlament Assambleyasına sədrlik Azərbaycana keçmişdir

Qara dəniz İqtisadi Əməkdaşlıq Təşkilatının Parlament Assambleyasında (QİƏT PA) sədrliyi qəbul edən Azərbaycan noyabrın 21-22-də Bakıda assambleyanın sayca 40-cı payız iclasını keçirəcəkdir.

AzərTAc xəbər verir ki, QİƏT PA-ya altı aylıq sədrlik Azərbaycana 39-cu plenar iclası təşkil edən Ermənistandan keçmişdir.

Qeyd edək ki, mayın 23-də QİƏT PA-nın 20 illiyi münasibətilə təşkilatın bəyanatı müzakirə edilmiş və yekdilliklə qəbul edilmişdir. Sənəddə o cümlədən təsdiq edilir ki, QİƏT çərçivəsində əməkdaşlığın əsas məqsədi region ölkələri arasında mehriban qonşuluq, dostluq və tərəfdaşlıq münasibətlərini inkişaf etdirmək, siyasi, iqtisadi və humanitar sahələrdə qarşılıqlı faydalı əməkdaşlıqdır.

Parlament Assambleyası belə bir faktı alqışlayır ki, nəqliyyat, ticarət, energetika, rabitə, turizm, ətraf mühitin mühafizəsi, səhiyyə, kənd təsərrüfatı, mütəşəkkil cinayətkarlığa qarşı mübarizə sahələrində səmərəli əməkdaşlıq aparılır. Bəyanatda əməkdaşlığın fəallaşdırılmasına, regionun dinc və sabit inkişafına hər cür dəstək göstərilməsinə hazırlıq ifadə olunur.

Azərbaycan.- 2012.- 25 may.- S. 4.