Bəşəri və milli dəyərlərin harmoniyası

Mavi gözlü Xəzərlə daş geyimli Qız qalası İçərişəhərdə belə möhtəşəmliyin hələ çox şahidi olacaq

Xəzər dənizinin sahilində böyük amfiteatrı xatırladan əzəmətli paytaxtımız - Bakı şəhəri ilə hər bir azərbaycanlı qürur duyur, iftixar hissi keçirir. Milli eksteryerə malik tikililər paytaxtımıza xüsusi gözəllik verir. Ulu öndərin layiqli davamçısı Prezident İlham Əliyev paytaxta daim xüsusi diqqətlə yanaşaraq onun inkişafı, müasirləşməsi və gözəlləşməsi üçün bütün zəruri tədbirləri həyata keçirir.

Bakıya daxilən bağlı olan, onu varlığımızın rəmzi kimi sevən cənab İlham Əliyev ötən 9 ildə şəhərin milli üslubda inkişaf etməsi, təmizliyi, gözəlliyi, müasirliyi ilə göz oxşaması üçün əlingən gələni əsirgəmir. "Eurovision-2012" mahnı müsabiqəsi çərçivəsində paytaxtımıza gələn turistlər də bu əsrarəngiz gözəlliyin canlı şahidi kimi danışır və heyranlıqlarını gizlətmirlər.

Anri Tiqoridze,

Gürcüstandan gələn turist, musiqişünas:

- Azərbaycana gəlişim birinci dəfə deyil. Xalqınızın bəzi folklor nümunələri ilə yaxından tanışam. Bir atalar sözünüz var: yaxın qonşu uzaq qohumdan yaxşıdır. Bu mənada Azərbaycanın "Eurovision-2012" musiqi yarışmasına ev sahibliyi yaxın qonşu kimi bizi çox sevindirir. Bu beynəlxalq tədbirə Azərbaycan çox möhtəşəm hazırlaşıb. Hər şey əladır, istər qonaqların qarşılanması, istərsə də onlara ev sahibi kimi diqqət və qayğı göstərilməsi. Tədbirin yüksək şəkildə, yəni beynəlxalq və tələb olunan səviyyədə təşkili və keçirilməsi üçün Azərbaycan dövləti və xalqı nümunəvi hazırlaşıb. Bakını əvvəllər də görmüşdüm, lakin o, bu günlərdə özgə qiyafədədir. Demək, burada beynəlxalq miqyaslı tədbirlərin keçirilməsi təqdirəlayiqdir. Arzu edərdik ki, bizdə, Gürcüstanda da belə möhtəşəm, dünyaya səs salan mədəni kütləvi tədbirlər keçirilsin.

Bir peşəkar musiqiçi olaraq "Eurovision-2012" musiqi yarışmasının yarımfinalına qədər izlədiyim məşqlər göstərdi ki, ümumiyyətlə, iştirakçılarla tamaşaçıların maraq və həvəsi eyni dərəcədədir. 21 nəfərlik peşəkar musiqiçilərdən ibarət münsiflər heyətinin səsvermədə iştirakı olduqca təqdirəlayiqdir. Çünki onlar ifaçılara peşəkarcasına səs verəcəklər. Onların ümumi səsin 50 faizini verməyə səlahiyyətləri vardır. Demək, ən yaxşı ifaçını seçmək imkanı var.

Mənə yarımfinalda daha xoş gələn Azərbaycan mədəniyyətinin möhtəşəmliyinin bir daha yüksək səviyyədə nümayişi oldu. "Natiq" ritm qrupunun qurduğu kompozisiya ilə Azərbaycan xalqının daş dövründən gələn mədəniyyətinin şahidinə çevrildik. Ona görə də hesab edirəm ki, Azərbaycan bu dəfə də yarışmanın qalibləri sırasındadır. Xalqınıza uğurlar və əsrarəngiz gözəllikləri qoruyub saxlamağı arzulayıram.

Yuliya Kosok,

Ukraynadan olan turist:

- Jurnalist həmkarım və həyat yoldaşım Viktorla Bakıda olmaqdan məmnunuq. Bu şəhərin gecələrinə vurulmamaq olmur. Çalışırıq ki, yaddaşımıza daha çox fakt yazaq. "Eurovision-2012"nin təmsilçiləri arasında bizim xalqın da nümayəndələri var. Əlbəttə, ilk növbədə biz bu yarışmada, sözün əsl mənasında, qalibliyə layiqlərin yer tutmasını istərdik. Təmsilçilərimizin də qələbəsinə əminlik hissi bizdə güclüdür. Bu, adi yarışma, hansısa bir istedadlı gəncin Avropaya, daha geniş mənada dünyaya təqdim olunması demək deyil. Hər bir iştirakçı ilk növbədə öz vətənini və xalqını təmsil edir. Ona görə də "Eurovision-2012" musiqi yarışması sivilizasiyaların və mədəniyyətlərin qovuşması, inteqrasiyası deməkdir. Azərbaycan dövlətinin belə möhtəşəm mədəniyyət tədbirlərinə ev sahibliyi onun inkişafının və burada demokratik cəmiyyətin formalaşmasına münbit zəmin yaradılmasının təsdiqidir. Bütünlüklə təhlükəsizlik məsələləri də yüksək səviyyədədir.

İlk məşqlərdən burada birlik, əzmkarlıq, bərabərlik, həmrəylik, qonaqpərvərlik, mədəni duyğularla yaşamaq həvəsi gördük. Viktorla çox istərdik ki, Azərbaycan bu dəfə də birinciliyə layiq görülsün. Tədbirə hazırlıq çox gözəldir. Səbinə Babayeva ilə səhnədə muğamdan bir parça ifa edən xalq artistiniz Alim Qasımovun hələ məşqlərdə yaratdıqları kompozisiyanı çox bəyəndik. Ümumiyyətlə, hər bir ifaçı təmsil etdiyi xalqın mahnılarından və ya musiqilərindən istifadə etsə, daha yaxşı sintez alınar. Axı bura beynəlxalq səhnədir və hər kəs ilk növbədə öz xalqını təmsil edir.

Mayk Livais,

Böyük Britaniyadan gəlmiş rok qrupunun üzvü:

- Musiqi, doğrudan da, sərhəd tanımır. Bu xoş sədanın arxasınca Avropa məkanına daxil olan dövlətlərdən gəlmiş istər musiqiçi, istərsə də onların azarkeşləri bir neçə gündür Azərbaycanın qonağıdır. Təyyarədən enən kimi bizi açıq səma, gülərüz insanlar, xoş ovqatlı xidmətçilər qarşıladı. İnanmazdım ki, nə zamansa Bakıya gəlim və onun əfsanəvi dünənindən, bugünkü həqiqətlərindən xəbərdar olum. Bilirsiniz, biz insanları təkcə əmək fəaliyyəti, siyasət birləşdirə bilməz. Siyasət dövlətlərarası lazım olan amillərdəndir. Xalqları birləşdirən isə anlaşıqlı dil, hər kəsin duyub dərk etdiyi musiqidir. Azərbaycanın musiqili günlərində olmaq bizim üçün çox xoşdur.

Bilirik ki, bu ölkənin ərazisinin bir hissəsi Ermənistanın təcavüzü nəticəsində zəbt olunub. Belə bir problem yaşasa da, Azərbaycan dünyanın mədəniyyət xəzinəsinin zənginləşməsinə öz töhfəsini verir. Dünya qloballaşır, sərhədlər şəffaflaşır, lakin Ermənistan qonşu dövlətin və mehriban xalqın torpaqlarını işğal edir. Bu, çox pisdir və belə siyasətə dünya xalqları nifrətlə yanaşır. Ermənilərin bu yarışmaya qatılmaması onların təkcə mədəniyyətinin deyil, siyasətinin də məğlubiyyətidir. Bununla onlar öz antiinsani münasibətlərini ortaya qoymuş oldular. Onların bu yarışmaya qatılmaqdan imtina etmələri dünya mədəniyyətinə laqeydlikdir.

Azərbaycan xalq musiqisi çox zəngindir. Bu zənginlik özünü təkcə "Eurovision-2012" musiqi yarışmasında göstərmir. Ötənilki qalibiyyət bayrağını qoruyub saxlamağa Azərbaycanın hərtərəfli şansı vardır.

Nan Rodd,

avstraliyalı turist:

- Avstraliyadan, daha dəqiq desək, Sidneydən gəlmişik. Anam Sally Rodd mənə Azərbaycan və Bakı haqqında bəzi məlumatları vermişdi. "Eurovision-2012" isə bizim Bakıya gəlişimizə səbəb oldu. Bakı gözəlliyi ilə yanaşı, həm də qədim şəhərdir. Əsrlərdən gələn səslər bu diyarda imiş. Qobustan qayalarından insan əcdadının ilk musiqi sədaları gəlir. Bu nədir - ecazkarlıq, yoxsa inanılması mümkün olmayan əfsanə?! Yox! Biz həqiqətlərin şahidiyik! Deyirdilər ki, dünyada yeddi möcüzə var, inanmırdım, çünki görməmişdim. Bakıya gəlişimizdən bu möcüzələrin sayının daha çox olduğunu gördüm və inandım. İçərişəhərdə, Qız qalasının ətrafında, Dənizkənarı Milli Parkda gördüklərimiz bizi necə heyran etməsin?! Şirvanşahlar sarayında bələdçilər bizi bu xalqın tarixən yaşadıqlarını anlatdılar. Necə də zəngin və zövqlü əl işləri var imiş. Demək, Azərbaycan xalqı qədim mədəniyyətə malikdir. Beynəlxalq musiqi yarışmasında, eləcə də sahil boyunca keçirilən mədəni-kütləvi tədbirlər bir daha təsdiqləyir ki, bu xalq bəşəri və milli dəyərlərə çox sadiqdir. Mənəviyyatı zəngin xalqın mədəniyyəti daim nümunəyə çevrilir. Ona görə də Azərbaycan xalqının mədəniyyətə verdiyi qiymət onun özünün mənəviyyatını qoruyub saxlaması deməkdir.

Turizm üçün çox gözəl məkandır bu yerlər. Tərtib olunmuş bukletlər və xəritələrdə görmədiyimiz və eşitmədiyimiz yerlərlə tanış olmaq imkanı qazandıq. Böyük Qafqaz sıra dağlarının, o cümlədən Şahdağın ətəklərinə sığınmış insanlar, xüsusən İsmayıllının sənətkarları, Qəbələ və Oğuzun, necə deyərlər, alban dövlətinin yadigarları olan qədim yaşayış məntəqələri ilə tanışlıq arzusundayıq. Bu yerlərdən ayrılıb gedəndə aparacağımız hədiyyə adi bir əşya olmayacaq. İçərişəhərdə həmin əl işləri ilə yaxından maraqlandıq. Daha çox xoşuma gələn Azərbaycan xanımlarının milli geyimləri oldu. Araqçın qoyub, tuman-kofta geyinərək çəkdirdiyimiz şəkil hələlik ən əziz xatirə və yadigardır. Burada müasir qadınlar daha çoxdur, nəinki Şərq üslubunda geyinən, çadra örtənlər. Milli geyimə hörmət və əcnəbi xalqların dilini bilmək mədəniyyətdir. Diqqətimizi daha çox çəkən isə Bakı sakinlərinin əksəriyyətinin gənclərdən ibarət olmasıdır.

Həmsöhbət olduğumuz qonaqlar Bakını sanki doğma vətənlərinin mərkəzi kimi sevdiklərini dilə gətirdilər. Turistlərdən biri, hindli Amarati Paçi onu obrazlı şəkildə belə ifadə etdi: "Azərbaycanda son illərin inkişafı özünü Bakıda çox möhtəşəm formada göstərir. Dünyanın ən məşhur paytaxtları ilə müqayisə olunur Bakı. Dəniz onun anası, sahil bağı isə gənclərin sevgi dünyasıdır. Bizim rejissorlar gərək sevgi macəralı filmləri burada çəksinlər. Bir qədər əvvəl mavi ekranlardan Bakının gül bayramını izlədikdən sonra bu cənnətməkan diyara gəlmək istədim. "Eurovision-2012" isə buna səbəb oldu. Məni maraqlandıran yalnız bu yarışmada hansı ölkənin qalib olacağı deyildi. Mən bu yarışmaya qatılan 42 ölkənin hər birini qalib hesab edirəm. Əsas odur ki, onlar bir amal uğrunda mübarizə aparırlar. Qoy kim birinciliyə layiqdirsə, onu dünya söyləsin. Biz turistlər Azərbaycanın füsunkar gözəlliyini gözlərimizlə görmək istədik və buna nail olduq. Yəqin ki, bundan sonra onun gözəlliyinə heyran olanların sayı durmadan artacaq. Axı biz buradan çox yüksək əhval-ruhiyyədə qayıdacağıq".

Bakı, onun daimi sakinləri və qonaqlarından ayrılmaq o qədər də asan olmayacaq. Mavi gözlü Xəzərlə daş geyimli Qız qalası İçərişəhərdə belə möhtəşəmliyin hələ çox şahidi olacaq.

Elnur HACALIYEV,

Məhəmməd NƏRİMANOĞLU

Azərbaycan.- 2012.- 26 may.- S. 9.