“Eurovision-2012” Azərbaycanın dünya mədəniyyətinə inteqrasiyasının yeni səhifəsi olacaq

Bu gün Avropanın ən möhtəşəm mahnı yarışması hesab olunan "Eurovision-2012"nin final mərhələsidir. Bir həftədir ki, Azərbaycan dünyanın diqqət mərkəzinə çevrilib. Ölkəmizi istəyən də, istəməyən də ekran qarşısında əyləşərək Azərbaycandan birbaşa yayımlanan mahnı müsabiqəsini izləyərək mədəniyyətimiz, qədim tariximiz, milli mətbəximiz, qonaqpərvərliyimiz və bir dövlət olaraq bu yarışmaya hazırlığımızın canlı şahidi olurlar. Bu gün final günü olduğu üçün yenə də milyonlarla insanın qəlbi Azərbaycanda döyünəcək.

Bu müsabiqə bir mahnı yarışması olsa da, yalnız mədəni cəhətdən deyil, həm də siyasi və ideoloji baxımdan mühüm əhəmiyyət kəsb edir. Milli Məclisin deputatları, ziyalılar, elm xadimləri arasında apardığımız sorğudan da aydın oldu ki, "Eurovision-2012" mahnı müsabiqəsi Azərbaycanın beynəlxalq imicinə Avropa və dünyaya inteqrasiya prosesində öz müsbət təsirini göstərəcək. Eyni zamanda, bütün dünya erməni lobbisinin Azərbaycan və millətimiz barədə yaydığı xoşagəlməz, iftira dolu informasiyaların, əslində, uydurmadan başqa bir şey olmadığını anlayacaq.

Hadi RƏCƏBLİ,

Milli Məclisin Sosial siyasət komitəsinin sədri, siyasi elmlər doktoru, professor

- "Eurovision-2012" mahnı müsabiqəsinin ölkəmizdə keçirilməsi ilk növbədə Azərbaycanı dünyada məşhur edəcək. Bu bir daha özünü onda göstərəcək ki, Azərbaycanın mədəniyyəti olduqca inkişaf edib. Minlərlə qonağı bir anda qəbul edə bilən dövlətik. Bununla da bütün dünyaya mesaj göndərdik. Digər tərəfdən isə, bu tədbirlə bağlı nə qədər işlər görüldü. Bu müsabiqəyə görə vətəndaşlarımız nə qədər iftixar hissi keçirir. Müsabiqə bir daha göstərdi ki, Azərbaycan brend ölkəyə çevrilib. Dövlətimiz dünyada bəyənilir və tək siyasi, iqtisadi baxımdan deyil, eləcə də mədəniyyət sahəsi üzrə inkişaf edir. Bütün bunları Bakıya gələn hər bir turistin dilindən eşitmək bizim üçün çox xoş oldu. Azərbaycanın tarixi, mədəni abidələri, milli mətbəxinə heyran qalan müsabiqə iştirakçıları, çox güman ki, Bakını hələ uzun müddət unutmayacaq və yenidən Azərbaycana gəlmək üçün fürsət axtaracaqlar.

Əli MƏSİMLİ,

Milli Məclisin deputatı

- Mən inanıram ki, Azərbaycanda keçirilən "Eurovision" mahnı müsabiqəsi hələ uzun müddət yaddaşlardan silinməyəcək. Azərbaycan sayca 57-ci olan "Eurovision" mahnı müsabiqəsini çox möhtəşəm keçirir. 20 ildir müstəqilliyini qazanan bir dövlətin bu cür mötəbər mahnı müsabiqəsinə ev sahibliyi etməsinin özü böyük nailiyyətdir. Hesab edirəm ki, Azərbaycan "Eurovision-2012"ni ən azı bizim gördüyümüz və yaddaşımızda qalan mahnı müsabiqələri içərisində daha gözəlini və möhtəşəmini keçirdi. Həm "Baku Crystal Hall"un möhtəşəmliyi, həm təşkilati işlər, həm də bu yarışmada iştirak edən komandaların yerləşdirilməsi böyük zəhmət tələb edirdi və Azərbaycan bunu uğurla həyata keçirir. Bəlkə də "Eurovision-2012" nadir yarışmadır, kimin qalib olacağını əvvəlcədən müəyyənləşdirmək mümkün deyil. Çünki finala yüksələn bütün komandaların ifaları, səhnə tərtibatı çox gözəl hazırlanıb. Bu yarışma ilə Azərbaycan dünyanın rəğbətini qazandı və Qafqazı bir daha dünyaya tanıtdı.

İlyas İSMAYILOV,

Milli Məclisin deputatı, Ədalət Partiyasının sədri

Azərbaycanda keçirilən Avropanın ən möhtəşəm mahnı müsabiqəsinə hazırlıq işləri çox yüksək səviyyədə aparılıb. Bunu şəhərin hər yerində görmək mümkündür və bütün dünya kiçik bir ölkənin nəyə qadir olduğuna şahidlik edir. Azərbaycan "Eurovision-2011" mahnı müsabiqəsindəki qələbəsi ilə özünün zəngin mədəni irsə malik olduğunu bütün dünyaya sübut etdi. Hesab edirəm ki, bu yarışmanın Azərbaycanda keçirilməsi ölkəmizin Avropa və dünyada daha da yaxından tanınmasında bir vasitə oldu. İndi çalışmalıyıq ki, görülən işlər hədər getməsin və "Eurovision-2012" mahnı müsabiqəsi bu yarışmanın tarixinə qızıl hərflərlə yazılsın. Bunun üçün bütün Azərbaycan ictimaiyyəti birgə olmalı və ölkəmizin mənafeyi, beynəlxalq aləmdəki imicinin daha da yüksəlməsi üçün səylər göstərilməlidir. Musiqi sahəsi üzrə mütəxəssis olmasam da, deyə bilərəm ki, Azərbaycanı təmsil edən müğənnimiz Səbinə Babayeva öz vəzifəsinin öhdəsindən layiqincə gələcək və ölkəmizin qədim mədəniyyətinin bu yarışmada nümayişi ilə böyük uğur qazanmış olacağıq.

Fəzail İBRAHİMLİ,

Milli Məclisin deputatı, tarix elmləri doktoru, professor

- 2011-ci ildə Almaniyada keçirilən "Eurovision" mahnı müsabiqəsində Azərbaycanın qələbəsi ölkəmizə çox böyük uğur gətirdi. Bu qələbə Azərbaycan mədəniyyətinin qələbəsi idi və diplomatiyanın on illərlə qazana bilmədiyi bir yolu qısa müddətdə fəth etmiş oldu. "Eurovision" qələbəsi ilə Azərbaycanın dünyaya çıxışı üçün bir zəmin yarandı və bu qələbədən sonra ölkəmiz təşkilatçılıq işini öz üzərinə götürdü. Paytaxtımıza dünyanın bir çox ölkəsindən qonaqlar gəlməli idi. Bakıda isə insanların axını, nəqliyyatın çoxluğu belə bir təsəvvür yaradırdı ki, kifayət qədər çətinlik olacaq. Ancaq dövlətin gördüyü hazırlıq işləri hər kəsi heyran etdi. Şəhərdə mədəniyyət tariximizə düşəcək çox gözəl, heyranedici "Baku Crystal Hall" kompleksi inşa edildi. Qonaqların yüksək səviyyədə qəbulu və yerləşdirilməsi prosesi hər kəsdə böyük sevinc yaratdı. Bütün bunların hamısı Azərbaycanın dünyaya çıxışı, tanınması və aparılan məqsədyönlü siyasətin qazandığı uğurlardır. Bakıya gələn hər bir əcnəbi Azərbaycan həqiqətləri ilə tanış oldu və ölkəmiz onlarda böyük maraq yaratdı. İnanıram ki, bu yarışma Avropaya səs salacaq və bu, Azərbaycanın uğuru kimi tarixlərə yazılacaq.

Flora QASIMOVA,

Milli Məclisin deputatı

- Avropanın ən mötəbər mahnı müsabiqəsinin Azərbaycanda bu cür möhtəşəm keçirilməsi ölkəmizə, millətimizə qarşı xain münasibətdə olan dövlətlərə sarsılmaz zərbə vurdu. Bir çoxları bu yarışmanın Azərbaycanda keçirilməməsi üçün əllərindən gələni etsələr də, heç nəyə nail ola bilmədilər. Dünya, həqiqətən, Azərbaycanın Cənubi Qafqazda lider dövlətə çevrildiyinin şahidi oldu. Azərbaycana gələn minlərlə əcnəbi qonaq erməni lobbisinin millətimizlə bağlı Avropa və dünyada yaydığı həqiqətə uyğun gəlməyən məlumatların iftira, böhtan olduğunu ölkəmizlə bağlı söylədikləri xoş sözlərlə təsdiq etmiş oldular. Hesab edirəm ki, "Eurovision" mahnı müsabiqəsi ilə dünya dövlətləri qədim mədəniyyətə malik olan respublikamız haqqında xeyli bilgi əldə etdilər. Bakıya gələn hər bir turist millətimizin qonaqpərvərliyinə, gülərüzlüyünə heyran qaldılar. Hər bir azərbaycanlı kimi, mən də bundan qürur hissi duyuram. Hökumət bu yarışmanın yüksək səviyyədə keçirilməsi üçün böyük iş gördü və inanıram ki, "Eurovision-2012"nin finalı indiyədək keçirilən finallar içərisində ən yaddaqalanı olacaq və Azərbaycana, paytaxt Bakıya heyran qalan əcnəbi turistlər bundan sonra da ölkəmizə tez-tez səfər edəcəklər.

Musa QASIMLI,

Milli Məclisin deputatı, tarix elmləri doktoru, professor

- "Eurovision-2012" mahnı müsabiqəsinin Azərbaycanda keçirilməsi təsadüfi bir hadisə deyil. Çünki Azərbaycan sənətçilərinin keçən il keçirilən yarışmada qalib gəlməsi musiqimizin, mədəniyyətimizin dünyada tədqiqini sübut etdi. Hesab edirəm ki, indiyə qədərki tarixində heç bir zaman "Eurovision" Azərbaycandakı kimi möhtəşəm təşkil olunmayıb. Bütün cəhətləri ilə ən yüksək səviyyədə təşkilatçılıq işi aparılıb. "Eurovision" Azərbaycanın mədəniyyətinin dünyada təbliğinə kömək göstərməklə yanaşı, ölkəmiz haqqında doğru informasiyanın yayılmasına yardımçı olacaq. Ən azı Azərbaycana gələn qonaqların söylədikləri fikirlərə nəzər saldıqda, bu, açıq-aydın hiss olunur. Düşünürəm ki, Azərbaycanın kütləvi informasiya vasitələri bütün ölkələrdən gələn nümayəndələr və turistlərdən müsahibələr almalı və onları arxivləşdirməlidirlər. Onu da qeyd edim ki, "Eurovision"un Azərbaycanda keçirilməsi cənab Prezident İlham Əliyevin Azərbaycan mədəniyyətinə, beynəlxalq mədəni əlaqələrin inkişafına xüsusi qayğısının təzahürüdür və bu, eyni zamanda, ölkəmizin birləşdirici, qovuşdurucu bir məkan olduğunu göstərir.

Rasim MUSABƏYOV,

Milli Məclisin deputatı

- "Eurovision" mahnı müsabiqəsi yüz milyonlarla auditoriyası olan bir möhtəşəm yarışmadır. Bütün dünyanın diqqəti bu yarışmanı keçirən ölkəyə yönəlir. Avropanın bir parçası olan Azərbaycanın bu yarışmaya ev sahibliyi etməsi tarixi bir hadisədir. Bu gün ölkəmizə minlərlə xarici qonaq gəlib. Bu müsabiqə dövlətin tanınması, inkişafının təqdimatı üçün olduqca vacib bir tədbirdir. Onun bilavastə siyasi əhəmiyyəti olmasa da, ölkənin mədəniyyətinin, tarixinin nümayişi, tanıdılması üçün çox vacibdir. Yarışma təşkilatçılıq baxımından da çox yüksək səviyyədə təşkil olunub. Bütün hazırlıq işləri, şəhərimizə gələn əcnəbi vətəndaşların qonaqpərvərliklə qəbul olunmaları yüksək səviyyədə qiymətləndirilir. Hesab edirəm ki, Azərbaycanın beynəlxalq imicinə zərbə vurmaq istəyən erməni lobbisinin antitəbliğatı iflasa uğradı. Onlar Avropanın bir neçə qəzetində Azərbaycanla bağlı yalan məlumatlar yazdırmaqla elə bilirdilər ki, bütün Avropa və dünyanı öz iftiralarına inandıra biləcəklər. Əvvəla, qəzetlərinin tirajı çox aşağıdır, həmin mətbu orqanları oxuyanlar azlıq təşkil edir. İkincisi isə, Azərbaycanı bu həftə yüz milyonlarla insan canlı seyr edir. Bu, fərqli təsirdi. Yalan çox uzaq getmir. Gəlib Azərbaycanı görən insanlar və televiziyada ölkəmizi seyr edən dünya ictimaiyyəti Bakıda və digər şəhərlərimizdə olan inkişafın, Avropaya inteqrasiyanın canlı şahidi oldular. Artıq dünya bildi ki, Bakı böyük və mədəni Avropa şəhəridir. İndi Azərbaycanın inkişafını kölgədə saxlamaq, haqqında yalan məlumatlar yaymaq qeyri-mümkündür.

Qüdrət HƏSƏNQULİYEV,

Milli Məclisin deputatı, Bütöv Azərbaycan Xalq Cəbhəsi Partiyasının sədri

- Azərbaycan təmsilçilərinin "Eurovision-2011" mahnı müsabiqəsində qazandıqları qələbə və bu müsabiqənin ölkəmizdə keçirilməsi mədəniyyətimizin, tariximizin təbliği baxımından olduqca mühüm bir hadisədir. Müsabiqəyə hazırlıq prosesinin qısa bir zaman ərzində və yüksək səviyyədə başa çatdırılması, müsabiqə çərçivəsində həyata keçirilən tədbirlərin yüksək peşəkarlıqla gerçəkləşdirilməsi Azərbaycan xalqının böyük intellektual potensialının, işgüzarlığının göstəricisi kimi qiymətləndirilməlidir. Bu müsabiqə nəticəsində Azərbaycan öz mədəniyyətini dünyaya, Avropaya təqdim etmək üçün mühüm bir imkan əldə etdi və bundan yararlanmağı bacardı. Azərbaycan bu yarışmanı yüksək səviyyədə keçirməklə Cənubi Qafqazın lider ölkəsi olduğunu bir daha nümayiş etdirdi.

Fəzail AĞAMALI,

Milli Məclisin deputatı, Ana Vətən Partiyasının sədri

- Avropa məkanında, hətta artıq dünyada da populyarlıq qazanan və böyük maraq kəsb edən "Eurovision" mahnı festivalının Azərbaycanda keçirilməsi ciddi bir hadisə, əhəmiyyətli bir uğur kimi qiymətləndirilməlidir. Ötən il keçirilən "Eurovision" mahnı müsabiqəsində bizim qələbəmiz Azərbaycan mədəniyyətinin, xalqımızın istedadının ifadəsi kimi özünü göstərdi. Qısa zaman kəsiyində bu mahnı festivalında iştirak edən Azərbaycan 4 ildən sonra həmin yarışmanın Bakıda keçirilməsi zirvəsinə nail oldu. Mən hesab edirəm ki, "Eurovision" mahnı müsabiqəsi ölkəmizin dünya miqyasında tanınmasına öz müsbət töhfəsini verəcək. Artıq bir həftədir dünyanın diqqəti Azərbaycana yönəlib. Bu gün isə artıq final mərhələsidir. Ölkəmiz təkcə bu mahnı müsabiqəsini dünyaya təqdim etməklə kifayətlənməyəcək, həm də bu tədbiri keçirən ev sahibi kimi özünün təşkilatçılığını, yeniliklərini göstərmiş olacaq. Bu təqdimatla dünya Azərbaycan haqqında tam təsəvvür əldə edəcək. İnanıram ki, Azərbaycan sayca 57-ci "Eurovizion" mahnı müsabiqəsinə yeni çalarlar əlavə edəcək və onu daha da zənginləşdirəcək. Ölkəmizdə keçirilən bu festival hələ uzun illər həm iştirakçıların, həm də əcnəbi qonaqların yaddaşlarından silinməyəcək. Çox təəssüf edirəm ki, bu yarışmanın Azərbaycanda keçirilməsini istəməyən həm daxili, həm də xarici qüvvələr dövlətimizə qarşı çirkin kampaniya aparırlar. Bütün bu qüvvələr erməni lobbisinin diktəsi ilə bir koalisiya təşkil edərək bu mahnı müsabiqəsinin mahiyyətinə xələl gətirə biləcək hərəkətlər edirlər. Ancaq bütün cəhdlərə baxmayaraq, onların niyyətləri baş tutmadı və bundan sonra da həmin qüvvələr heç nəyə nail ola bilməyəcəklər. Azərbaycanda çox yüksək dəyərləndirilən "Eurovision-2012"nin Bakı festivalı bu yarışmanın tarixində yaddaqalan, silinməz iz qoyacaq.

Məlahət İBRAHİMQIZI,

Milli Məclisin deputatı

- Avropanın nüfuzlu mahnı yarışmasının ölkəmizdə keçirilməsi hər bir vətəndaşımızda fərəh hissi yaradır, çünki bu müsabiqədə iştirak etmək üçün xaricdən minlərlə insan Azərbaycana səfər edib ölkəmizdəki inkişafın şahidi oldu. Bu hadisə, həmçinin Azərbaycanın beynəlxalq müstəvidə təbliğ olunması baxımından da böyük əhəmiyyət daşıyır. Bütün dünya Azərbaycan mədəniyyətinin, zəngin təbiətinin və qonaqpərvərliyinin şahidi oldu. Ölkəmizə gələn hər bir turist Bakının qədimliyindən, tarixi abidələrimizdən danışır. Bir ölkənin dünyada tanıdılması istiqamətində bundan böyük təbliğat ola bilməz. Amma təəssüf ki, bəzi dairələr bu beynəlxalq səviyyəli tədbirin Bakıda keçirilməsindən sui-istifadə edərək ölkəmizin imicinə zərbə vurmağa cəhd göstərirlər. Bəzi beynəlxalq təşkilatlar, aqressiv müxalifət və bəzi QHT-lər "Eurovision" mahnı müsabiqəsini siyasiləşdirməyə cəhd etsələr də, istəklərinə nail olmadılar. Bütün bunların heç bir əsası yoxdur. Vətənpərvərlik hissi olan hər bir insan bu nüfuzlu tədbirin ölkəmizdə keçirilməsindən qürur duymalıdır. Çünki bu tədbirin yüksək səviyyədə keçirilməsi Azərbaycanın beynəlxalq imicini daha da yüksəldəcək. Məhz hər bir vətəndaş da bu nəticənin əldə olunması üçün töhfəsini verməlidir.

İzzət RÜSTƏMOV,

BDU-nun Sosiologiya kafedrasının müdiri, fəlsəfə elmləri doktoru, professor

- Azərbaycanda keçirilən "Eurovision-2012" mahnı müsabiqəsi nəinki mədəniyyətimizin bugününə, bütövlükdə xalqımızın tarixinə parlaq bir səhifə kimi daxil olacaqdır. Necə deyərlər, "dünya axışıb Azərbaycana gəlir", turistlər ölkəmizlə, onun iqtisadiyyatı, mədəniyyəti, hər sahədə qazandığı uğurları ilə, 9 iqlim qurşaqlı təbiətimizlə bilavasitə tanış olmaq imkanı əldə edirlər. Dünya musiqi və mahnı incilərinin pərvazlanması üçün Azərbaycan böyük bir səhnəyə çevrilib. Paytaxtımız Bakı qonaq qəbul edir. Müsabiqə öncəsi respublikamızda möhtəşəm quruculuq və abadlıq işləri aparılmış, müsabiqənin keçiriləcəyi Büllur saray nadir memarlıq incisi olaraq istifadəyə verilmiş, neçə-neçə möhtəşəm obyektlər qonaqların üzünə qapılarını taybatay açmışdır. "Eurovision" yarışında dünyanın musiqi mədəniyyətinin nadir inciləri ilə yaxından tanış olmaq, onlardan yetərincə bəhrələnmək imkanı əldə edirik. Bizim musiqiçilərimiz də öz mahnı incilərini dünya nümayəndələrinə uğurla təqdim edirlər. Biz respublika rəhbərliyinə bu sahəyə yetirdiyi böyük diqqətə görə öz minətdarlığımızı bildiririk. Müsabiqə qurtarandan hələ çox sonralar da yaradılmış yeni dənizkənarı bulvarımız, gözəl Büllur saray, digər möhtəşəm obyektlər özümüzün, balalarımızın daimi gəzinti və istirahət yeri olacaq.

"Eurovision" tədbirlərinə qarşı çevrilmiş, onun pozulmasına doğru yönəldilmiş istənilən müxalif addımları pisləyirik. Mən onlara müraciətlə deyirəm, dünyada hələ də qalmaqda olan bədxahlarımızı, birbaşa düşmənlərimizi sevindirməyə çalışmayın, bilin ki, bulanıq suda balıq ovlamaq heç də uğurlu olmur. Əminik ki, Azərbaycanımız "Eurovision"un keçirildiyi ölkə kimi daha böyük nailiyyətlərə imza atacaqdır.

Arzuman MURADLI,

iqtisad elmləri üzrə fəlsəfə doktoru

- Cəmi 20 il əvvəl dövlət müstəqilliyimizi bərpa edərkən Azərbaycanın çox qısa müddətdə hansı möhtəşəm uğurlara nail olacağını təsəvvür etmirdik. Hətta müstəqilliyimizin ilk illərində baş verən təbəddülatlar səbəbindən sabaha olan ümidlərimizi belə itirmişdik.

Lakin fəxarət hissi ilə deməliyik ki, 1993-cü ildən sonra məhz Heydər Əliyev siyasətinin bərqərar olması Azərbaycanın müstəqil dövlət kimi yaşamasını və sosial-iqtisadi inkişafını təmin etdi, ölkəmizi beynəlxalq birliyin tamhüquqlu üzvünə çevirdi, xalqımızın sabaha olan inamını bərpa etdi. Bu gün isə Heydər Əliyev siyasi kursunun Prezident İlham Əliyev tərəfindən layiqincə davam etdirilməsi Azərbaycanı dinamik və sürətli inkişaf yoluna çıxarmaqla bərabər, beynəlxalq nüfuzunu artırıb. Bunun nəticəsidir ki, Azərbaycan artıq BMT Təhlükəsilk Şurasına üzv seçilib və hazırda bu quruma sədrlik edir.

"Eurovision-2012" mahnı müsabiqəsinin Bakıda keçirilməsi isə Azərbaycanın beynəlxalq miqyasda nüfuzunun daha da yüksəlməsinə növbəti töhfə və dəstək oldu. Bugünlərdə bütün dünya Azərbaycandan danışır, Bakıdan yazır. Paytaxtımıza təşrif buyuran xarici vətəndaşlar, turistlər Azərbaycandakı inkişafı öz gözləri ilə görür, ölkəmizi daha yaxından tanımaq imkanı əldə edirlər.

Amma təəssüflə qeyd etməliyik ki, Azərbaycanın təbliğinə və imicinin daha da yüksəlməsinə xidmət edən bu möhtəşəm tədbirin Bakıda keçirilməsinə qısqanclıqla yanaşanlar da az deyil. Erməni lobbisi, İranın bəzi dairələri və daxilimizdə antiazərbaycançı şəbəkəyə xidmət edən bəzi insanlar "Eurovision-2012" mahnı müsabiqəsini siyasiləşdirməyə və bundan çıxış edərək Azərbaycanın uğurlarına kölgə salmağa cəhd göstərirlər. Lakin qətiyyətlə deyirik ki, heç bir məkrli təbliğat, təzyiq və təhdid Azərbaycanı öz inkişaf yolundan döndərə bilməz.

Rəşad BAXŞƏLİYEV

Azərbaycan.- 2012.- 26 may.- S. 10.