“Baku Crystal Hall” səhnəsində “Eurovision-2012” mahnı müsabiqəsi iştirakçılarının məşqləri başlamışdır

Müxtəlif ölkələrin təmsilçiləri Azərbaycanla bağlı fikirlərini bölüşmüşlər

Mayın 13-də "Eurovision-2012" mahnı müsabiqəsinin keçiriləcəyi "Baku Crystal Hall" və bu məkandakı Mətbuat Mərkəzi rəsmən fəaliyyətə başlamışlar. Həmin gün, həmçinin müsabiqə iştirakçılarının "Baku Crystal Hall"da ilk məşqlərinə də start verilmiş və məşqlərdən sonra ifaçılar Mətbuat Mərkəzində mətbuat konfransı keçirərək özlərinin ilkin təəssüratlarını bölüşmüşlər.

AzərTAc xəbər verir ki, 1500-dək jurnalistin izləyəcəyi müsabiqənin işıqlandırılması üçün ayrılan zalda 490 kompyuter, 160 əlavə kompyuterin internetə qoşulması üçün yerlər, 30 printer qurğusu və iri monitor quraşdırılmışdır.

"Salam, Avropa!",- deyə bütün iştirakçıları və qonaqları salamlayan "Eurovision" mahnı müsabiqəsinin rəhbəri Yan Ola Sand Azərbaycanın dördüncü cəhdindən sonra ötən il yarışmanın qalibi olduğunu diqqətə çatdırmışdır.

Yan Ola Sand bildirmişdir ki, Azərbaycan "Eurovision" arealının ən şərqində yerləşən ölkədir. Bütün Avropa üçün Azərbaycanı, onun mədəniyyətini və xalqını tanımaq, qonaqpərvərliyinin şahidi olmaq imkanı yaranmışdır. Bu məkan ta qədimdən "Odlar Yurdu" kimi tanınır. Azərbaycanın "Odlar diyarı" olduğunu əks etdirmək və "Eurovision" ab-havasını yaşatmaq üçün builki müsabiqə "Light Your Fire!" şüarı altında keçirilir.

Sonda "Eurovision"un rəhbəri 42 ölkənin bütün təmsilçilərinə uğurlar arzulamış və Bakı səhnəsinin səbirsizliklə onların gözəl çıxışlarını gözlədiyini bildirmişdir.

Həmin gün "Baku Crystal Hall"da məşqlərə ilk olaraq "Euro Neuro" mahnısı ilə Montoneqro təmsilçisi Rambo Amadeus başlamışdır.

İlk məşqdən sonra keçirdiyi mətbuat konfransında Monteneqro təmsilçisi demişdir: "Baku Crystal Hal"ın çox böyük səhnəsi vardır . Bu, "Eurovision" yarışmasının keçirilməsi üçün tam uyğun bir səhnədir. Bundan əlavə, zalın dəniz kənarında yerləşməsi də bu yerin böyük üstünlüyüdür".

Monteneqro təmsilçisindən sonra İslandiyadan olan iştirakçılar Qreta Salome & Yonsi səhnəyə çıxmışlar. Onlar yarışmada ölkələrini "Never Forget" mahnısı ilə təmsil edəcəklər.

İslandiyadan olan iştirakçı Qreta Salome demişdir ki, Azərbaycana ilk səfərim olsa da mən bu şəhəri və insanlarını çox sevdim.

İslandiyalı müğənni azərbaycanlıların çox qonaqpərvər və mehriban olduqlarını diqqətə çatdırmışdır. O, Bakının gözəl küçələri və yaraşıqlı binaları ilə diqqət çəkdiyini demişdir. "Adından göründüyü kimi, Azərbaycan "Odlar yurdu"dur deyə vurğulayan Qreta Salome müsabiqənin yüksək səviyyədə təşkil edildiyini xüsusi qeyd etmişdir. O, "Eurovision-2012" mahnı müsabiqəsinin istər təşkilatçılıq, istər də zal və səhnə baxımından indiyədək gördüklərinin arasında ən gözəl bir məkan olduğunu diqqətə çatdırmışdır.

"Eurovision-2012" mahnı müsabiqəsində bu il Azərbaycanı təmsil edəcək Səbinə Babayevanın səsini və ifasını bəyəndiyini vurğulayan islandiyalı qonaq, "When the Music Dies" mahnısının mükəmməl bir ifa və bəstənin vəhdəti olduğunu bildirmişdir.

Müsabiqədə ifa edəcəkləri "Never Forget" mahnısı ilə bağlı fikirlərini bölüşən duet qeyd etmişdir ki, mahnı qədim əfsanəyə əsaslanır.

Sonra "Baku Crystall Hall"ın səhnəsinə Yunanıstanın təmsilçisi Eleftheria Eleftheriou çıxmışdır. Yarışmada ölkəsini "Aphrodisiac" mahnısı ilə təmsil edəcək müğənni səhnədə vokal imkanları ilə yanaşı, maraqlı performans da nümayiş etdirmişdir.

Yunanıstan təmsilçisi həyatında ən yaddaqalan doğum gününü mayın 12-də Bakıda qeyd etdiyini bildirmişdir. Bakıda həqiqətən gözəl qonaqpərvərliyin şahidi oldum. İnanıram ki, bu çıxışım uğurlu olacaq, hər kəsi təəccübləndirə biləcəyəm.

Ölkəsini "Beautiful song" mahnısı ilə təmsil edəcək növbəti ifaçı Latviya təmsilçisi Anmari məşqindən sonra keçirdiyi mətbuat konfransında Azərbaycan dilində "Sarı gəlin" xalq mahnısını oxumuşdur. Əsl adı Linda Amantova olan rus əsilli müğənni qeyd etmişdir ki, onun mahnısı çox sevimlidir və tamaşaçıların zövqünü oxşayacaqdır.

Bakı səhnəsində ilk məşqini keçirən Albaniya təmsilçisi Rona Nişliu yarışmada ölkəsini "Soos" mahnısı ilə təmsil edəcəkdir. Müğənni paytaxtımıza gəlməmişdən əvvəl mətbuata bildirmişdir ki, Azərbaycanı muğam sayəsində tanımışdır.

"Baku Crystal Hall"da çıxış etmək mənə müsbət enerji verir. Performansımın yaxşı alınması üçün bütün hisslərimi ortaya qoyacağam". Bu sözləri Albaniya təmsilçisi Rona Nişliu ilk məşqindən sonra keçirdiyi mətbuat konfransında demişdir. Caz musiqisini sevdiyini vurğulayan müğənni azərbaycanlı caz ifaçısı Əzizə Mustafazadənin yaradıcılığını çox bəyəndiyini söyləmişdir.

Sonra Rona Nişliu "Bana-bana gəl" Azərbaycan xalq mahnısını ifa etmişdir.

Rumıniyanı təmsil edən "Mandinga" qrupunun da məşqləri yaddaqalan olmuşdur. Qrup səhnədə "Zaleilah" mahnısını ifa etmişdir.

Mahnılarının çox güclü olduğunu vurğulayan Rumıniyanın "Mandinga" qrupunun üzvləri onun hətta Bakıda çıxış etməzdən əvvəl belə çox populyar olduğunu söyləmişlər. Bildirmişlər ki, qrup yeddi nəfərdən ibarətdir. Qrupda yeganə xanım Yelenadır. "Bizim ölkədə gözəl qızlar vardır və qrupumuzda onlardan birini görə bilərsiniz", - deyə qrup üzvləri bildirmişlər. Onlar ifa etdikləri mahnıya çox güvəndiklərini və yüksək yerlərdən birini tutacaqlarına inandıqlarını vurğulamışlar.

İsveçrənin "Sinplus" qrupu isə səhnədə "Unbreakable" mahnısını ifa etmişdir. Rok üslubunda çıxış edən qrupun yaradıcıları İvan və Qabriel qardaşlarıdır.

İvan və Qabriel qardaşları demişlər: "Bakı çox gözəl və möhtəşəm şəhərdir. Xüsusilə "Baku Crystal Hall"ı qeyd etmək istərdik. Zal istər akustikası, istərsə də səs və işıq effekti ilə seçilir.

Qrup üzvləri qeyd etmişlər ki, onların bəstələdikləri mahnı 2009-cu ildə xokkey üzrə dünya çempionatının himni olmuşdur. Amma "Eurovision"da çıxış etmək daha həyəcanlıdır. Qardaşlar bildirmişlər ki, bu mötəbər yarışma vasitəsilə müsbət emosiyaları, enerjini ötürmək üçün gözəl şans əldə etmişlər. Onlar diqqətə çatdırmışlar ki, "Sinplus" rok-n-rol üslubda mahnılar ifa edir və rok-n-rol özündə pozitivliyi əks etdirir. Biz çalışacağıq ki, bu pozitivliyi səhnədə əks etdirək.

"Eurovision-2012" mahnı müsabiqəsinin ən gənc təmsilçisi olan Belçika ifaçısı Laura van den Bruel səhnədə "country pop" üslubunda "Would you" mahnısını ifa etmişdir. Səhnəyə Ayris təxəllüsü ilə çıxan müğənninin "Eurovision" mahnısı beş həftə Belçika çartlarında birinci yeri tutmuşdur.

Laura van den Bruel demişdir: "Bakıda çox isti qarşılandım, bu şəhər və onun əhalisi çox xoşuma gəldi. "Baku Crystal Hall"ın səhnəsi həqiqətən çox gözəldir, burada çıxış etmək mənim üçün böyük şansdır".

Laura van den Bruel bildirmişdir ki, bu yarışmanın özəlliyi burada hər yaşda iştirakçının olmasıdır. Mən həyatımın hər dəqiqəsindən zövq almağı xoşlayıram. Əminəm ki, yarışma müddətində keçirəcəyim vaxtdan da böyük zövq alacağam.

"Baku Crystal Hall"da Finlandiya təmsilçisi Pernilla Karlssonun ilk məşqi bu məkanda günün son ifası olmuşdur. Pernilla Karlsson səhnədə "Nar jag blundar" ("Gözlərimi yumarkən") mahnısını ifa etmişdir.

İyirmi iki yaşlı müğənni Finlandiyanın həndbol üzrə yığma komandasının üzvüdür. O, mətbuata açıqlamasında bildirmişdir ki, idman və musiqi onun həyatında vacib yer tutur. P.Karlsson "Eurovision" müsabiqəsindən başqa, Finlandiyanın həndbol üzrə çempionatında da iştirak edəcəkdir.

"Bakı çox gözəl şəhərdir, burada olmağımdan çox xoşbəxtəm"- deyən Finlandiya təmsilçisi bu yarışmada iştirakından məmnun olduğunu qeyd etmişdir. Pernilla Karlssonun sözlərinə görə, musiqi onun həyatını yaxşılığa doğru dəyişmişdir.

Mayın 14-də isə "Baku Crystal Hall"da İsrail, San Marino, Kipr, Danimarka, Rusiya, Macarıstan, Avstriya, Moldova və İrlandiya təmsilçiləri ilk məşqlərini keçirib, o cümlədən Azərbaycan ilə bağlı özlərinin ilkin təəssüratlarını bölüşüblər.

Azərbaycan.- 2012.- 15 may.- S. 3.