Azərbaycan “Eurovision” tarixinin ən möhtəşəm səhifəsini yazdı

Kəmiyyətdə 57-ci, keyfiyyətdə birinci

Nəhayət, bütün dünyanın maraqla izlədiyi sayca 57-ci "Eurovision" mahnı müsabiqəsi başa çatdı. Odlar Yurdu Azərbaycan daha bir mötəbər beynəlxalq yarışmaya uğurla ev sahibliyi etdi. Mahnı müsabiqəsi dünyanın bir çox ölkəsində canlı yayımlandı. Bütün dünya mədəniyyətimizin, tariximizin, bir dövlət olaraq bu yarışmaya necə yüksək səviyyədə hazırlaşdığımızın şahidi oldu. Hər kəs Azərbaycan mədəniyyətinin olduqca inkişaf etdiyini, minlərlə qonağı bir anda qəbul edə bilən dövlət olduğunu bir daha gördü.

Müsabiqənin finalı öncəsi yarışmanın keçirildiyi "Crystal Hall"da olduğumuzdan burada baş verənləri daha aydın şəkildə izdəyirdik. Xəzərin sahilində büllur saray axşam düşdükcə işıq effektlərinin yandırılması ilə daha da möhtəşəm görünürdü. Yarışma başlamadan öncə yağan yaz yağmuru isə "Crystal Hall"a əlavə bir gözəllik bəxş edirdi. Diqqət ediləsi məqamlardan biri də təhlükəsizlik tədbirlərinin çox yüksək səviyyədə təşkil edilməsi idi. Müsabiqənin keçiriləcəyi məkanın ətrafında, müsabiqə iştirakçılarının, nümayəndə heyətlərinin işlədikləri, istirahət etdikləri, əyləndikləri və yaşadıqları yerlərdə ictimai asayiş çox yüksək səviyyədə qorunurdu. Bununla yanaşı, qonaqların ictimai nəqliyyatdan da istifadə edəcəyi nəzərə alınaraq metroda, marşrut avtobuslarında ictimai qaydanın və təhlükəsizliyin təmin edilməsi, cinayətlərin qarşısının alınması yönündə qabaqlayıcı tədbirlər həyata keçirilirdi.

Jurnalistlərin və fan klubların fəaliyyət göstərdiyi Mətbuat Mərkəzində isə adam əlindən yer tapmaq olmurdu. Hər kəs böyük finalı həyəcanla gözləyirdi. Öz ölkəsinin milli geyimlərində olan insanlar müxtəlif dillərdə mahnılar oxuyur, bu böyük bayramı yaşamağa çalışırdılar.

Final möhtəşəm şou ilə başladı

"Eurovision" mahnı müsabiqəsinin finalına saatlar qalmış, demək olar ki, bütün dünyanın qəlbi Bakı ilə döyünürdü. Dünyanın 50-dən çox ölkəsinə yayımlanan final mərhələsi öncəsi "Crystal Hall"da və eyni zamanda Mətbuat Mərkəzində böyük bir izdiham yaşanırdı. Hamı dəstəklədiyi ölkənin bayrağına bürünərək, final startını böyük həyəcanla gözləyirdi.

Beləliklə, "Eurovision-2012"nin finalı başladı. Finalın açılış mərasimi mahnı müsabiqəsinin tarixində dərin bir iz buraxacaq şou ilə yadda qaldı. Səhnəyə ilk olaraq Azərbaycanın dünya şöhrətli muğam ustası Alim Qasımov çıxdı. Xanəndənin ifasında muğam parçası hərarətlə qarşılandı. Daha sonra "Natiq" ritm qrupunun ifası və möhtəşəm rəqslər şouya xüsusi rəng qatdı. Bunun ardınca ənənəyə uyğun olaraq, final şousu ötənilki müsabiqənin qalibi Eldar Qasımov və Nigar Camalın ifasında "Running Scared" mahnısı ilə açıldı. Sonra "Eurovision-2012" mahnı müsabiqəsinin aparıcıları Nərgiz, Leyla və Eldar bu mötəbər layihənin tamaşaçılarını yenidən salamlayıb, iştirakçılara uğurlar arzuladılar. Beləliklə, "Eurovision-2012"nin final mərhələsinə start verildi. Hər bir iştirakçının çıxışından əvvəl Azərbaycanın bölgələrinə, xüsusilə, paytaxt Bakının tanıtımına həsr olunan videoçarxlar nümayiş etdirildi.

Finala vəsiqə qazanmış 26 ölkə təmsilçilərindən səhnəyə birinci olaraq britaniyalı müğənni Engelbert Hamperdink çıxdı. Müsabiqədə ölkəsini "Love Will Set You Free" mahnısı ilə təmsil edən əfsanəvi müğənninin çıxışı alqışlarla qarşılandı.

"Baku Crystal Hall"un səhnəsinə ikinci çıxan Macarıstanın "Eurovision-2012" mahnı müsabiqəsindəki təmsilçisi "Compact Disco" qrupu "Sound of Our Hearts" mahnısını ifa etdi. Evsiz insanın çətin həyatının canlandırıldığı mahnının səhnə quruluşu və işıq effektləri tamaşaçılarda fərqli əhval-ruhiyyə oyatdı. Mavi və yaşıl işıq effektləri ilə quruluş verilən səhnənin arxa fonunda əllərini göylərə açan insan kölgələri və ürək şəklində təsvirlər verilmişdi. Qırmızı işıq effektləri ilə diqqəti cəlb edən "ürəklər" mahnının sözlərinə uyğun olaraq döyüntülərlə müşayiət edildi.

Daha sonra səhnəyə ardıcıl olaraq, Albaniya (Rona Nişliu), Litva (Donny Montell), Bosniya və Herseqovina (Maya Sar), Rusiya ("Buranovskiye babuşki" qrupu), İslandiya (Qreta Salome & Yonsi dueti), Kipr (İvi Adamou), Fransa (Anggun), İtaliya (Nina Zilli), Estoniya (Ott Lepland), Norveç (Tooji), Azərbaycan (Səbinə Babayeva), Rumıniya ("Mandinga" qrupu), Danimarka (Soluna Samay), Yunanıstan (Eleftheria Eleftheriou), İsveç (Lorin), Türkiyə (Can Bonomo), İspaniya (Pastora Soler), Almaniya (Roman Lob), Malta (Kurt Kalleya), Makedoniya (Kaliopi), İrlandiya ("Jedward" qrupu), Serbiya (Zeljko Yoksimoviç), Ukrayna (Qaytana Essami) və Moldova (Paşa Parfeni) təmsilçiləri çıxdılar. Çıxışlar zamanı təmsilçilər canlı ifalarını, xoreoqrafiya da daxil olmaqla, səhnə şousunu mükəmməl şəkildə yerinə yetirdilər.

Final mərhələsində elə iştirakçılar oldu ki, onların ifa etdikləri mahnılar və səhnə performansları tamaşaçıların yaddaşında həkk olundu. Bunlardan biri də Odlar Yurdu Azərbaycanı "When The Music Dies" mahnısı ilə təmsil edən Səbinə Babayeva idi. Görkəmli xanəndə, xalq artisti Alim Qasımov ilə birlikdə səhnəyə çıxan təmsilçimiz geyimindən tutmuş səhnə tərtibatına qədər mükəmməl performans nümayiş etdirdi. Səbinə Babayevanın geyimində parıltıdan əlavə səhnədəki işıqları özündə əks etdirən xüsusi elementlər də vardı. Həzin səsi, gözəl ifa tərzi ilə seçilən Səbinə "Eurovision-2012" mahnı müsabiqəsinin favoritlərindən hesab olunurdu.

Maraqlı çıxışlar arasında Rusiyanı təmsil edən "Buranovskiye babuşki" qrupu da var idi. Rusiyanı müsabiqədə "Party for Everybody" mahnısı ilə təmsil edən nənələr ənənəvi udmurt geyimində səhnəyə daxil olaraq sobada kökə bişirərək, yaddaqalan ifa nümayiş etdirdilər. "Baku Crystal Hall"da rusiyalı nənələrin çıxışını Buranovo kəndindən gəlmiş qohumları, həmkəndliləri, jurnalistlər və minlərlə azarkeş böyük coşqu ilə izlədilər.

Möhtəşəm ifası ilə yarışmanın favoritləri sırasında ən öndə yer alan İsveç təmsilçisi Lorin "Euphoria" mahnısı ilə tamaşaçıların ən çox marağına səbəb oldu. Onu da qeyd edək ki, əslən Mərakeşdən olan Lorinin əsl adı Lorine Zineb Noka Talhaouidir.

Maraqlı çıxışlar arasında qardaş Türkiyəni təmsil edən Can Bonomo da olmuşdur. Müğənni ölkəsini "Eurovision-2012" mahnı müsabiqəsində "Love Me Back" mahnısı ilə təmsil edirdi. Onun ifasından sonra zalda "Türkiyə, Türkiyə" sədaları səngimək bilmirdi.

Emin Ağalarovdan mükəmməl səhnə performansı

Bütün çıxışlardan sonra "Eurovision-2012" mahnı müsabiqəsinin final mərhələsi böyük uğurla başa çatdı. Səsvermənin nəticələrinin gözlənildiyi bir vaxtda səhnədə uzun müddət yaddaşlardan silinməyəcək interval aktı şousu nümayiş etdirildi. "Öz məşəlini alovlandır!" şüarı Azərbaycan mədəniyyətinin keçmişi, bu günü və sabahının sintezi ilə səhnədə canlandırıldı. Şou tamaşaçılara tanınmış müğənni və bəstəkar Emin Ağalarovun təqdimatında çatdırıldı. Onu səhnədə 68 nəfərlik heyət, eləcə də Azərbaycan Kamera Orkestrinin 15 qadın skripkaçısı müşayiət etdi.

"Öz məşəlini alovlandır!" şousu Azərbaycanın qədim musiqi alətləri - kamançanın, balabanın və zurnanın müşayiəti ilə başladı. Bu performans skripkaçıların ifası ilə davam etdirildi. Daha sonra isə nağaraçalanlar şouya qoşuldular. Ardınca səhnədə alov püskürdü. Bu möhtəşəm bir görüntüdə Emin Ağalarov 20 metr hündürlükdən səhnəyə endi və "Never Enough" mahnısını ifa etdi. Bu çıxışın sonunda səhnədə Azərbaycanın bayrağı qaldırıldı.

"Eurovision-2013"ü Stokholm salamlayacaq

Möhtəşəm interval şousundan sonra final mərhələsində səsvermə başa çatdı. "Baku Crystal Hall"da 57-ci "Eurovision" mahnı müsabiqəsinin qalibi müəyyənləşdi.

Müsabiqənin final mərhələsində qələbə uğrunda 26 ölkənin mübarizəsində qalib adını 372 xal toplayan İsveç təmsilçisi Lorin qazandı. İkinci yerə 259 xalla Rusiyanın "Buranovskiye babuşki" qrupu, üçüncü yerə isə 214 xalla Serbiya təmsilçisi Zeljko Yoksimoviç çıxmışdır. Azərbaycanı bu yarışmada təmsil edən Səbinə Babayeva 150 xalla dördüncü, Albaniya təmsilçisi Rona Nişliu isə 146 xalla beşinci yerə layiq görülmüşdü.

Onu da xüsusilə vurğulamaq lazımdır ki, mahnı müsabiqəsində Səbinə Babayevanın ifa etdiyi mahnı dünyada ən çox sevilən musiqilər sırasında yer alır. Bununla da artıq bütün dünya növbəti dəfə Azərbaycan musiqisinin nəyə qadir olduğunun bir daha canlı şahidi oldu. İndi isə yalnız bir məqsəd var. Gələn il İsveçə 2014-cü ildə mahnı müsabiqəsini yenidən Bakıya qazandırmaq üçün getmək.

Məlumat üçün qeyd edək ki, bu, İsveçin "Eurovision" yarışması tarixində sayca 5-ci qələbəsidir. Mahnı müsabiqəsinin qalibi əslən Mərakeşdən olan Lorin İsveçin "İdol 2004" müsabiqəsindən sonra populyarlıq qazanmışdır. İlk mahnısını 2005-ci ildə təqdim edən xanım ifaçı bir müddət televiziyada aparıcı işləmişdir.

O, 2011-ci ildə "My Heart is Refusing Me" mahnısı ilə İsveçin milli seçimlərində iştirak etmişdir. İsveçi Avropanın ən nüfuzlu mahnı müsabiqəsində təmsil etmək arzusu isə bu il reallaşmışdır. "Melodifestivalen" yarışmasında iştirak edən Lorin rekord göstərici ilə qalib elan olunmuşdur. Onun həmin müsabiqədə oxuduğu "Euphoria" mahnısına 4 milyon 670 min tamaşaçı səs vermişdi.

Müsabiqədən sonra ənənəyə uyğun olaraq "Eurovision-2012"nin qalibi İsveç təmsilçisi Lorin mətbuat konfransında iştirak etdi. Jurnalistlərin suallarını cavablandıran Lorin "Eurovision-2012" mahnı müsabiqəsindən yalnız müsbət enerji aldığını bildirdi: "Mən Azərbaycandan vətənimə bu ölkənin qonaqpərvərliyini, insanlarla görüşlərimi və xatirələrimi aparmaq istərdim. Rusiyalı nənələri çox sevdim. Onlar mənə boyunbağı bağışladılar. Mən bu qələbəni öz tərzimdə qeyd edəcəyəm: yaxşı rəqs, yemək və istirahətlə. Məncə, müsabiqənin bütün iştirakçıları qələbəyə layiqdirlər. Qaldı ki mənim ifamı bəyənmək məsələsinə, bu, sadəcə, zövq məsələsi idi. Düşünürəm ki, bu dəfə bu, mənə nəsib oldu".

Mətbuat konfransından sonra "Eurovision" mahnı müsabiqəsinin rəhbəri Yan Ola Sand Lorinə təbriklərini çatdırdı, İsveçin nümayəndə heyətini Cenevrəyə (İsveçrə) dəvət etdi: "Sizi Cenevrədə Avropa Yayımları Birliyində məsləhətləşmələr aparmağa dəvət edir, hazırlıq prosesinə başlamaq üçün lazımi sənədlər toplusunu təqdim edirəm. Bu müsabiqəni İsveçdə keçirməkdən məmnun olardıq".

Teşekkürler, Türkiye!.. Grazzi, Malta!.. Aciu, Lietuva!.. Spasibi, Ukraйna!..

Müsabiqədən sonra Avropa Yayımları Birliyi (EBU) "Eurovision-2012"nin iki yarımfinal və final mərhələləri üzrə səsvermənin yekun nəticələrini açıqladı.

Azərbaycana "Eurovision-2012"də iştirak edən 42 ölkədən 21-i səs vermişdi. Ölkəmizə ən yüksək səsi verən ölkələr isə Türkiyə, Malta, Litva və Ukrayna olmuşdur.

Azərbaycana xal verən ölkələrin ardıcıllığı isə belədir:

Türkiyə - 12 xal

Ukrayna - 12 xal

Litva - 12 xal

Malta - 12 xal

Rusiya - 10 xal

Moldova - 10 xal

Bolqarıstan - 10 xal

Gürcüstan - 10 xal

Kipr - 8 xal

İsrail - 8 xal

Belarus - 7 xal

Bosniya və Herseqovina - 7 xal

Slovakiya - 6 xal

Yunanıstan - 5 xal

Monteneqro - 5 xal

Albaniya - 4 xal

San Marino - 4 xal

Serbiya - 3 xal

Makedoniya - 2 xal

Böyük Britaniya - 2 xal

İrlandiya - 1 xal

Favoritimiz dəyişməzdir: CAN-TÜRKİYƏ

Azərbaycan və Türkiyə dostluğunun, qardaşlığının nümunələri həm də mədəni tədbirlərdə özünü göstərir. "Eurovision" mahnı müsabiqəsinin finalında səs vermənin nəticələri də bunu bir daha təsdiq etdi. Azərbaycan həmişə olduğu kimi, 12 xalını qardaş Türkiyəyə verdi. İnanırıq ki, bundan sonra da "Eurovision" mahnı müsabiqəsinin növbəti finallarında bu qardaşlığın, dostluğun əbədi olduğu bir daha özünü doğruldacaq. Azərbaycan və Türkiyə Avropa və dünyaya bir millət, iki dövlət olduğunu hər zaman sübut edəcək.

Azərbaycanın xal verdiyi ölkələrin ardıcıllığı isə belədir:

Türkiyə - 12 xal

Rusiya - 10 xal

Malta - 8 xal

İsveç - 7 xal

Rumıniya - 6 xal

Yunanıstan - 5 xal

Litva - 4 xal

Ukrayna - 3 xal

Kipr - 2 xal

İrlandiya - 1 xal

Məlumat üçün onu da qeyd edək ki, müsabiqənin qalibi olan İsveçə İtaliyadan başqa bütün ölkələr səs vermişdilər. Müsabiqənin finalının ikincisi Rusiyaya isə İsveçrədən başqa bütün ölkələr səs vermişdilər. Yarışmanın final mərhələsinin sonuncusu olan Norveç isə 3 ölkədən - İslandiya, İsveç və Niderlanddan xal almışdır.

Avropa Yayımları Birliyi, həmçinin birinci və ikinci yarımfinalların səsverməsinin nəticələrini də açıqlamışdır. Bu nəticələrə görə, birinci yarımfinalın birincisi Rusiya (152 xal), ikinci yarımfinalın birincisi isə İsveç (181 xal) olmuşdur. Müsabiqənin final mərhələsinin 3-cüsü Serbiya 159 xalla ikinci yarımfinalda da ikinci yerdə qərarlaşmışdır.

Nağıllar dünyasından ayrılmaq istəmirik

Bütün dünyanın böyük maraqla izlədiyi daha bir "Eurovision" mahnı müsabisəqi başa çatdı. Bu müddət ərzində paytaxt Bakının gözəlliyinə heyran olan xaricdən gələn qonaqlar Azərbaycanı daha yaxından tanıdılar. Burada gördüklərinə heyran olan jurnalistlər mahnı müsabiqəsinin başa çatmasına üzüldüklərini hər görüşlərində dilə gətirdilər. Hətta bir neçəsi nağıllar dünyasından ayrılmaq istəmədiklərini bildirdilər. Mahnı müsabiqəsinin finalından sonra bəzi xarici KİV nümayəndələrinin müsabiqə barəsində fikirlərini öyrəndik.

İsveçdən olan jurnalist Yohan Olsson bildirdi ki, Azərbaycan bizim üçün düşərli ölkədir, çünki buradan qalib kimi ayrılırıq: "Yarışmanın keçirilməsi Azərbaycan üçün çox uğurlu oldu. Çünki ölkənizi tanımaq imkanı əldə etdik. Burada hər şey gözəldir. İnsanlar bayram əhval-ruhiyyəsindədirlər. Azərbaycanlılar çox mehribandırlar. Adama kömək etmək üçün əllərindən gələni edirlər. Bakıda vaxtım çox gözəl keçir. Mətbuat Mərkəzində çalışan könüllülər fəaldırlar. Azərbaycan, mən səndən ayrılmaq istəmirəm".

Almaniyalı jurnalist Bernhard Zuker dedi ki, müsabiqənin qalibi olan isveçli Lorin ən layiqli ifaçılardan biri idi. Biz çox sevinirik ki, "Eurovision-2012" çox yüksək səviyyədə təşkil olunmuşdu. Üzülürük ki, belə möhtəşəm bir şəhərdən ayrılıb, vətənə qayıdırıq. Nağıllar dünyasından ayrılmaq bizim üçün çox çətin olacaq. Ancaq vaxt tapdıqca Bakıya tez-tez gələcəyik.

İngiltərəli jurnalist Devid Kol isə qeyd etdi ki, bu mahnı müsabiqəsində bir çox ölkə qalib gəlməyə layiq idi. Bunlardan biri də İsveç idi. Təbrik edirik. Təkcə buradan ayrılacağımız üçün çox heyfsilənirik. Bakı çox gözəldir. İnsanın zövqünü oxşayan parklar, ümumiyyətlə, istirahət etməli yerlər çoxdur. "Baku Crystal Hall" isə bütün standartlara cavab verir. Mətbuat Mərkəzində jurnalistlər fanatlar üçün hər cür şərait yaradılmış, kompyuterlərdən, yüksək sürətli internetdən rahatlıqla istifadə etmək mümkündür. Yarışmadakı təmsilçiniz Səbinə Babayevanın səsinə valeh oldum. Çox gözəl vokalçıdır.

İspaniyadan olan jurnalist Serxio de Pedro vurğuladı ki, Bakı indiyə kimi gördüyüm şəhərlər içərisində ən modernidir. Yolları və meydanları geniş, küçələri təmizdir. Burada gəzməli və görməli yerlər çoxdur. Gündüzlər işgüzar həyatını yaşayan Bakı gecələri öz parlaq işıqları ilə insanı valeh edir. Azərbaycan xalqı çox qonaqpərvərdir. "Eurovision-2012" mahnı müsabiqəsindən danışan Serxio tədbirin yüksək səviyyədə təşkil olunduğunu qeyd etdi. Bildirdi ki, artıq müsabiqə başa çatsa da, şəhərdə bayram əhval-ruhiyyəsi duyulur. Hamı bu möhtəşəm tədbirdən danışır. Sonda onu demək istərdim ki, yarışmanın keçirildiyi "Baku Crystal Hall" isə çox gözəl, modern və unikal bir tikilidir.

Odlar Yurdu beynəlxalq mətbuatda

Azərbaycanın "Eurovision-2012" mahnı müsabiqəsinin yüksək səviyyədə təşkil olunması barədə bir neçə xarici KİV-lərdə geniş məqalələr dərc olunmuşdur. Türkiyənin "Hürriyət" qəzetinin köşə yazarı Ertuğrul Özkök "Sabahı gözləyə bilmədim" deyərək "Eurovision" müsabiqəsi davam edərkən Azərbaycanın təşkilatçılığı ilə bağlı məqalə yazmışdır. Özkök yazısında indiyədək izlədiyi "Eurovision" müsabiqələri arasında onu ən çox builki müsabiqənin həyəcanlandırdığını bildirmişdir: "Afərin, Azərbaycan, belə başlanğıc görmədik. Neçə illərdir "Eurovision"u izləyirəm. Zalların keyfiyyətinə, açılışlardakı yaradıcılığa baxdıq. Ölkələrin, sadəcə, musiqidə deyil, təşkilatçılıqdakı fərqini də görməyə başladıq. İllər ötdü, Avropanın sərhədlərinin genişləndiyini gördük. Bizim sərhədimizdə bitən mahnı coğrafiyası bizdən Şərqə keçdi. Bu günə qədər belə gözəl "Eurovision" açılışı görmədim". Müəllif eyni zamanda köşə yazısında "Avropanın sərhədləri Türkiyənin başladığı yerdə bitər" deyənlərə ismarıc da göndərmişdir: "Baxın görək, Avropanın estetik keyfiyyəti harada başlayırmış. Afərin, Azərbaycan. Əla başladın, əla da bitirdin".

Rusiya mətbuatı isə "Eurovision-2012"ni müsabiqənin tarixində unikal hadisə adlandırır. "Qolos Rossii" radiosunun saytında bununla bağlı bir məqalə yer almışdır: "İş təkcə müsabiqənin keçirildiyi yerdə deyil. Avropanın müxtəlif yerlərindən buraya gələn iştirakçıların, jurnalistlərin və tamaşaçıların sözlərinə görə, hər şey yüksək səviyyədə təşkil olunmuşdu. Hələ köhnə dünyanın sakinlərini heyrətləndirən ənənəvi Qafqaz qonaqpərvərliyindən danışmırıq". Məqalədə bildirilir ki, final iki həftəlik marafonun kulminasiya nöqtəsi olmuşdur.

Fransanın "France-3" televiziya kanalında isə canlı yayımlanan veriliş zamanı aparıcılar Mirey Düma və Siril Fero bildirmişlər ki, möhtəşəm Bakı Qafqazın Dubayıdır. Azərbaycan Qərb dünyası ilə Şərq aləmi arasında körpü rolu oynayır. Qədim "İpək yolu" üzərində yerləşdiyi, 20 il əvvəl müstəqilliyini bərpa etdiyi barədə ətraflı məlumat vermişlər. Azərbaycanın paytaxtı Bakının Xəzər dənizi sahilində yerləşdiyini xatırladan aparıcılar son bir neçə ildə şəhərin simasının tanınmaz dərəcədə dəyişdiyini, bir-birindən yaraşıqlı binaların tikildiyini, nəhəng körpülərin salındığını bildirmiş, Avropanın ən gözəl şəhərlərinin gecələr işıqlandırılmasının başdan-başa nura qərq olan Bakı ilə müqayisədə geri qaldığını, möcüzələr yaradılan möhtəşəm Bakının Qafqazın Dubayı olduğunu vurğulamışlar.

Elçin CƏFƏROV

Azərbaycan.- 2012.- 30 may.- S. 8-9.