Səfir Vladimir Doroxin: Moskva Azərbaycan kapitalının Rusiyanın cənub bölgəsinin iqtisadiyyatına sərmayə qoyulmasını alqışlayır

Ticari-iqtisadi münasibətlər Rusiya-Azərbaycan əlaqələrinin ən yaxşı sahəsidir.

AzərTAc xəbər verir ki, Rusiyanın Azərbaycandakı səfiri Vladimir Doroxin bu fikri 2011-ci ildə Azərbaycan-Rusiya iqtisadi əməkdaşlığı çərçivəsində ən fəal tərəfdaşlara "Proqress" mükafatının təqdim edilməsi mərasimində söyləmişdir.

Diplomat demişdir: "Bizim mükafat "Proqress" adlanır. Həqiqətən, qeyd etməyə çox şadam ki, bu mükafat hər dəfə bizim münasibətlərdə tərəqqi olmasını təcəssüm etdirir və sənədli şəkildə təsdiq edir. Ümumiyyətlə, 2011-ci ilin yekunlarına görə bu mükafatı "Triumf" mükafatı adlandırmaq olardı, çünki bu il biz Rusiya ilə Azərbaycan arasında ticari-iqtisadi münasibətlərin rekord səviyyəsinə nail olmuşuq".

Səfir iki dövlət arasında iqtisadiyyat sahəsində münasibətlərin inkişafının yaxşı səviyyədə olmasını vurğulayaraq demişdir: "Bizdə hər il iqtisadi əməkdaşlığın yeni istiqamətləri və iştirakçıları yaranır. Azərbaycan bazarına yeni firmalar çıxır. Bu il Rusiya ilk dəfə olaraq təbabət sahəsində öz xidmətlərini təklif edir. Regional əməkdaşlığın inkişaf etməsi, Azərbaycanın Rusiyaya sərmayə qoyuluşunun həcminin artması bizi çox sevindirir. Eşitdiyimə görə Azərbaycan Rusiya iqtisadiyyatına artıq 500 milyon dollar sərmayə qoymuşdur. Bu rəqəmin həqiqətə nə dərəcədə uyğun olduğunu bilmirəm, lakin fakt budur ki, Rusiyada Azərbaycan kapitalı yaranmışdır, bu kapital ölkənin cənubunda işləyir. Biz azərbaycanlı biznesmenlərin cəsarətini və riskə getməyə hazır olmasını alqışlayır və onları dəstəkləmək istəyirik".

V.Doroxin daha sonra demişdir: "Ticari-iqtisadi münasibətlər hamının xeyrinədir. Biznesmenlər pul qazanır, dövlət büdcəsinə vergi daxil olur, insanlar işləmək, sabit əməkhaqqı almaq imkanı əldə edirlər. Biz siyasətçilər isə, necə deyərlər, siyasi mənfəətimizi hesablayırıq, çünki bu, Rusiya-Azərbaycan münasibətlərinin möhkəmlənməsinin əsasıdır".

Azərbaycan.- 2012.- 31 may.- S. 10.