Azərbaycan ordusu Ali Baş Komandanın «İrəli!» əmrini yerinə yetirməyə tam hazırdır

"Hər bir ölkə üçün onun ordusu çox vacib bir atributdur, çox önəmli bir rəmzdir. O cümlədən Azərbaycan üçün. Xüsusilə nəzərə alsaq ki, Azərbaycan hələ də müharibə şəraitində yaşayır, orduya diqqət daim yüksək səviyyədə olmalıdır. Bu gün Azərbaycanın ordusu Cənubi Qafqazda ən güclü ordudur. Biz bu hərbi üstünlüyü əldə etmişik və gərək bunu möhkəmləndirək. Bu üstünlük daha da böyük olmalıdır və biz buna da nail olacağıq. Bu münaqişəni həll etmək üçün, işğala son qoymaq üçün həm siyasi-diplomatik səylər göstərilməlidir, həm də düşmən bilməlidir ki, Azərbaycan ordusu istənilən vaxtda öz doğma torpaqlarını azad edə bilər və lazım olan vaxtda bütün gücümüzü səfərbər edərək biz buna nail olacağıq. Ordunun bütün məsələləri müntəzəm qaydada həll edilir. Mən bunu daim diqqət mərkəzində saxlayıram. Azərbaycan Respublikasının Prezidenti və Silahlı Qüvvələrin Ali Baş Komandanı kimi bu mənim borcumdur. Mən bundan sonra da orduya böyük diqqətlə, böyük qayğı ilə yanaşacağam".

İlham ƏLİYEV

Ordu hər bir millətin güvənc yeri, qürur, ləyaqət rəmzi, şərəfi, özünütəsdiq imkanıdır. Ulularımızın "Ordum varsa, yurdum var" aforizmi azərbaycanlı milli düşüncəsində ordunun nə qədər ali, müqəddəs ucalıqda dayandığının, xalqın, dövlətin varlıq və mövcudluq, milli kimlik meyarına çevrildiyinin parlaq təcəssümüdür.

Tarix boyu qonşu ölkələrlə dinc yanaşı yaşamağın, sülh və barışın, sabitliyin tərəfdarı olan Azərbaycan xalqında özünümüdafiə əzmi, döyüş rəşadəti, qəsbkarlara qarşı mübarizə ruhu hər zaman yüksək olub. Müxtəlif zaman və məkanlarda dövlət qurmaq haqqını təmin etmiş xalqımız taleyini daim inandığı nizami orduya, cəsur, mübariz sərkərdələrə, vətənpərvər döyüşçülərə etibar edib!

Bu gün Azərbaycan Silahlı Qüvvələri dövlətimizin qüdrətinin nümunəsidir, xalqımızın iftixar yeridir və ölkəmizin ərazi bütövlüyünü təmin etmək iqtidarında olan yüksək hazırlığa sahibdir. Azərbaycan ordusu nəinki bölgədə, dünya miqyasında güclü orduların sırasındadır. Peşəkarlığı yüksək dərəcədə olan Azərbaycan ordusu həm dövlətin qoruyucusu, həm də Ermənistan-Azərbaycan, Dağlıq Qarabağ probleminin həllinin ən güclü faktorlarından biridir. Sabitlik, sürətli iqtisadi inkişafla yanaşı güclü ordu quruculuğu müasir Azərbaycanı xarakterizə edən əsas amillərdəndir. Günü-gündən daha qüdrətli ölkəyə çevrilən, beynəlxalq hüquq məkanında öz mövqeyini müstəqil və qətiyyətli şəkildə ifadə edən Azərbaycan həm də hər bir azərbaycanlının qürur mənbəyinə çevrilib. Ölkəmizin dinamik sosial-iqtisadi inkişafa malik olması, digər sahələrdə möhtəşəm nailiyyətlərə imza atması, mövcud olduğu regionun lideri statusunu daşıması və bu qəbildən olan digər amillərdən hər bir azərbaycanlı iftixarla bəhs edir. Bu gün öz inkişaf tempi ilə dünyanın modern ölkələrindən birinə çevrilməyi bacarmış Azərbaycan qarşısına qoyduğu hədəflərə uğurla çatır, bu istiqamətdə meydana çıxan problemləri müvəffəqiyyətlə həll edir. Sözügedən kontekstdə isə Azərbaycanın tezliklə ərazi bütövlüyünü də bərpa edəcəyi, üzləşdiyi təcavüzkarlığa birdəfəlik son qoyacağı heç bir şübhə doğurmur.

2013-cü ildə müdafiə xərclərinin 8,6 faiz artması Ermənistanı qorxuya salıb

Bu gün ordunun hərbi imkanlarını, potensialını genişləndirmək üçün Azərbaycan dövləti bütün lazımi tədbirləri görür. Ermənistanın işğal etdiyi torpaqları sülh yolu ilə qaytarmaqdan yayınması ölkəmizi digər prioritet fəaliyyət sahələri ilə yanaşı, ordu quruculuğuna da xüsusi diqqət yetirməyə vadar edir. Cəbhə xəttində atəşkəs rejiminin mövcudluğuna baxmayaraq, müharibə vəziyyəti davam edir. Bunu nəzərə alan Azərbaycan dövləti tamamilə haqlı olaraq öz ordusunun gücünü, hərbi kadrların peşəkarlıq səviyyəsini artırır, hərbi qüdrətini yüksəldir. Hazırda Azərbaycan ordusunun təchizatı həm də daxili istehsal hesabına formalaşır. Azərbaycanda müxtəlif növ silahlar, sursatlar, hərbi texnika istehsal olunur. Hərbi xərclərimiz isə ildən-ilə artır. 2003-cü ildə hərbi büdcəmiz 160 milyon dollar idisə, 2010-cu ildə bu rəqəm 2 milyard 150 milyon dollara, 2012-ci ildə isə 3 milyard 600 milyon dollara çatıb. Bu da Ermənistanın bütün dövlət xərclərindən 50 faiz çoxdur. 2013-cü ilin dövlət büdcəsində isə Azərbaycanın müdafiə xərclərinin 8,6 faiz artırılacağı nəzərdə tutulur.

Hər bir əsgərinin qayğısına qalan, onun döyüş ruhunu yüksəldən, ordunun maddi-texniki bazasını gündən-günə yaxşılaşdıran dövlət bütün imkanlarını bu istiqamətdə səfərbər edib. Həm Ali Baş Komandan, həm Müdafiə Nazirliyi, həm də digər dövlət strukturlarının rəhbərləri, nümayəndələri tərəfindən Azərbaycanın sərhədləri keşiyində dayanan əsgər və zabitlərlə mütəmadi görüşlərin keçirilməsi, onların qayğısı ilə maraqlanmaları hərbçilərimizdə döyüş, vətənpərvərlik ruhunu daha da artırır. İndi nəinki arxa cəbhədə, hətta düşmənlə üzbəüz təmas xəttində yerləşən hərbi hissələrdə özünü göstərən genişmiqyaslı hərbi quruculuq prosesi yalnız böyük qürur və sevinc hissi doğurur. Azərbaycan əsgərinin mənəvi-psixoloji durumu, hərbi və maddi-texniki təchizatı, döyüş hazırlığı, bir sözlə, ümumi vəziyyəti ilə əyani surətdə tanış olmaq, qazanılan uğurların canlı şahidlərinə çevrilmək üçün bir çox tədbirlər həyata keçirilir. Milli Məclis rəhbərliyinin Müdafiə Nazirliyi ilə bu istiqamətdə birgə həyata keçirdiyi növbəti layihə də hərbçilərimizin böyük sevincinə səbəb oldu.

Ən müasir standartlara uyğun hərbi qərargah

Oktyabrın 30-da Milli Məclisin deputatları, Müdafiə Nazirliyinin yüksək rübtəli zabitləri, hüquq müdafiəçiləri və media nümayəndələri Tərtər rayonunda düşmənlə təmas xəttində yerləşən "N" saylı hərbi hissəyə səfər edərək əsl reallıqla tanış oldular. Nümayəndə heyətinin tərkibinə Milli Məclis Sədrinin müavini Bahar Muradova, AMEA-nın vitse-prezidenti Akif Əlizadə, parlamentin Regional məsələlər komitəsinin sədri Arif Rəhimzadə, deputatlar Musa Quliyev, Bəxtiyar Sadıqov, Sahibə Qafarova, hüquq müdafiəçiləri Novella Cəfəroğlu, Səadət Bənənyarlı ilə yanaşı, Müdafiə Nazirliyi Şəxsi Heyət Baş İdarəsinin Tərbiyə İşləri İdarəsinin rəisi, general-mayor Vaqif Məmmədov, "N" saylı hərbi hissənin komandiri, general-mayor Nizam Osmanov və Müdafiə Nazirliyi Mətbuat Xidmətinin rəisi, polkovnik Eldar Sabiroğlu da daxil idi.

Bütün regionlarda olduğu kimi, Tərtərdə də böyük yenidənqurma, abadlıq-quruculuq işləri görülüb. Yolboyu gözəl mənzərələr, insanların istirahəti üçün salınmış parklar və tam yenilənmiş şəhər mərkəzi insanda xoş təəssürat yaradır. Ancaq "N" saylı hərbi hissənin yerləşdiyi Şıxarx kəndinə çatdıqda mənzərə və əhval-ruhiyyə tamamilə dəyişir. Vaxtilə qızğın döyüşlərin mərkəzi olmuş bu kənddə əksər evlər dağılmış, uçmuş və yaşayış üçün əlverişsiz vəziyyətə düşmüşdür. Lakin buna baxmayaraq, kənddə hələ də yaşayan insanlar var. Bu acınacanqlı durumu görüb qapandığımız qəmgin hisslər hərbi hissəyə çatanda bir anda yox olur. Qarşımızda müasir standartlara uyğun tikilmiş hərbi qərargah, ən son model hərbi avtomobillər və bizi qarşılayan igid Vətən keşikçiləri dayanmışdı. Düşmənin atəş mövqeyindən görünməyən, səngərdən bir qədər aralıda yerləşən hərbi hissənin sosial infrastrukturu, maddi və hərbi-texniki təchizatı, hərbi təyinatlı tikililəri səliqə-sahmanı, təmizliyi ilə diqqəti çəkir.

"İstiqlal" snayperi MDB və NATO-ya üzv ölkələrin ordularında istifadə olunan analoqlarından yüksəkdədir

Nümayəndə heyətinə hərbi formalar təqdim edilir. Tərxilibas olub hərbi maşınlara əyləşirik. Səfərimiz əsgərlərin atəş meydançasından (poliqon) başlayır. Burada hərbçilər hədəfi düzgün nişanalma təlimləri keçirlər.

Zabit Anar Tarverdiyev təlimlərdə istifadə olunan silah növlərini bir-bir təqdim edərək onların döyüş qabiliyyəti barədə məlumat verir. Silahlar arasında Azərbaycan Müdafiə Sənayesi Nazirliyinin (MSN) istehsal etdiyi "İstiqlal" snayper tüfəngi də var. Taktiki-texniki xüsusiyyətlərinə görə bu silah həm MDB ölkələrində, həm də NATO ordularında istifadə olunan analoqlarından yüksək səviyyədədir. Bu silahın optik nişangahı özəlliyi ilə analoqlarından fərqlənir. Hədəfi məhvetmə məsafəsi 3 min metr olan "İstiqlal" -50 və +50 dərəcə temperaturlarda belə rahat istifadə oluna bilir. Yağmur, palçıq, qar və toz təsirinə davamlı snayper tüfəngini iki hissəyə ayırmaqla çantada daşımaq mümkündür. Darağın tutumu 5 patron, 2 min metr məsafədə dəqiq vuruş və beton hasarı dəlibkeçmə qabiliyyətinə malikdir. Həmçinin zirehdeşən və yandıran patronları da bu tüfəng üçün nəzərdə tutulub. Kalibri 14,5 mm-dir.

Təqdimatdan sonra komandir atəş əmri verir və "İstiqlal"dan açılan atəş poliqonda sükutu pozur. Sonra əsgərlər digər silahlardan praktik atış nümayiş etdirirlər. Hiss olunur ki, artıq müasir hərbi silah-sursatla təmin olunan ordumuzun döyüş tapşırığını hər an yerinə yetirməsi üçün istifadəsində olan texnikadan yararlanma qabiliyyəti çox yüksəkdir.

Nümayəndə heyəti xoş əhval-ruhiyyə ilə Komanda Müşahidə Məntəqəsinə (KMM) yollanır. Bura döyüş zamanı böyük komandirin bütün hərbi hissənin şəxsi heyətini, zirehli texnikasını idarə etdiyi bir məntəqədir. KMM-də xidmət çəkən əsgər və zabitlərdən daha çox diqqət, ayıq-sayıqlıq tələb olunur. Çünki burada düşmənin istənilən canlı qüvvəsini, zirehli texnikasının hərəkət marşrutunu (gecə və gündüz) müəyyən edərək dəqiq koordinatları təyin edən müasir avadanlıqlar quraşdırılıb. Vaqif Məmmədov deyir ki, bu avadanlıqla düşmənin istənilən canlı qüvvəsinin yerini müəyyənləşdirərək həmin əraziyə dəqiq zərbələr endirmək mümkündür: "NATO standartlarına uyğun ən müasir texnika ilə təchiz olunmuş ordumuzun döyüş qabiliyyətini daha da artıran bu cür qurğular cəbhəyanı bütün hərbi hissələrin komanda müşahidə məntəqələrində mövcuddur".

Sonra nümayəndə heyətinin üzvləri müşahidə mövqelərindən müasir müşahidə aparatları vasitəsilə işğal altında olan Azərbaycan ərazilərinə və düşmən mövqelərinə baxırlar. Müşahidə aparatları vasitəsilə baxdıqda 11680 metr aralıda yerləşən Ağdərə, sağ tərəfdə isə (6620 metr aralıda) Ciləbürt kəndi görünür.

Hər an döyüşlərin bərpaolunma ehtimalı var

Tanışlıqdan sonra nümayəndə heyətinin rəhbəri, Milli Məclis Sədrinin müavini Bahar Muradova öz təəssüratlarını bölüşür:

- Cəbhə bölgəsinə bu cür səfərlər Azərbaycan ordusunun inkişaf səviyyəsini və onun nailiyyətləri barədə bilavasitə yerindəcə məlumat əldə etmək imkanı verir. Bu da bizim üçün çox vacibdir. Çünki hazırda Azərbaycan müharibə vəziyyətindədir və hər an döyüşlərin bərpaolunma ehtimalı var. Vəziyyətin isə bu şəkildə davam etməsi həmin ehtimalı artırır. Ona görə də həm ictimaiyyət nümayəndələri, həm Milli Məclisin deputatları Azərbaycan ordusunun nəyə qadir olduğuna əmin olmaq üçün daim onun yanında olmalıdır! Bu, ən azı bir vətəndaş, siyasətçi kimi bizim borcumuzdur! Bu səfər ərzində çox yüksək təəssüratlarımız yarandı. Hər səfərdən-səfərə biz çox böyük inkişafın şahidi oluruq. Ən əsası döyüşçülərimizin yüksək əhval-ruhiyyədə olması məni şad edir! Çünki kiminlə görüşürüksə, görürük ki, hər kəs öz vəzifəsinə böyük məsuliyyətlə yanaşır və bu, onların işində də aydın görünür.

Azərbaycanın öz istehsalı olan silahlardan istifadəsi qürur hissi yaradır. İnanıram ki, Azərbaycan ordusu öz üzərinə düşən vəzifəni yerinə yetirməyə qadirdir və bizim ordumuz Qafqazda ən qüdrətli ordudur.

Vitse-spiker Bahar Muradova Ermənistan rəsmilərinin "Azərbaycanın hərbi xərclərini ildən-ilə artırması Dağlıq Qarabağ münaqişəsinin həllinə mane olur" fikrinə də münasibət bildirdi. Onun sözlərinə görə, Azərbaycan inkişaf edir və bu inkişaf hər bir sahədə olduğu kimi, orduda da özünü göstərir:

- Azərbaycanda Silahlı Qüvvələrə ayrılan vəsait davamlı şəkildə artırılır. Lakin Azərbaycanın orduya ayırdığı vəsait digər ölkələrin orduya ayırdığı vəsaiti üstələmir. İndi biz neyləyək ki, Ermənistan rəhbərliyi özünün yeritdiyi qeyri-konstruktiv siyasətlə öz ölkəsini, xalqını problemlər məngənəsinə salır. Orada nəinki inkişaf getmir, əksinə, vəziyyət günbəgün pisləşir. Ona görə də bizə qarşı qeyri-obyektiv fikirlər səsləndirirlər. Bu, bizi qətiyyən narahat etmir.

KMM və müasir hərbi avadanlıqlarla tanışlıqdan sonra düşmənə bir qədər də yaxınlaşırıq. Biz yeni mövqelərə yaxınlaşanda hərbi hissənin Qapanlı kəndində yerləşən taburu naharda idi...

(Ardı var)

Rəşad BAXŞƏLİYEV

Azərbaycan.-2012.- 1 noyabr.- S.5.