Parlamentlərarası İttifaqın toplantısı başa çatmışdır

2012-ci il oktyabrın 21-26-da Kanadanın Kvebek şəhərində Parlamentlərarası İttifaqın 127-ci Assambleyası keçirilmişdir. Assambleyada iştirak etmək üçün Azərbaycan Respublikası Milli Məclisinin deputatları İlham Əliyev, Əhliman Əmiraslanov, Sevinc Hüseynova və Fuad Muradovdan ibarət nümayəndə heyəti bu ölkəyə səfər etmişdir. Səfər çərçivəsində nümayəndə heyətimiz 26 ölkənin təmsilçiləri ilə görüşlər keçirmiş, Azərbaycan parlamenti ilə müvafiq ölkələrin qanunvericilik orqanları arasında ikitərəfli və çoxtərəfli əsasda, o cümlədən Parlamentlərarası İttifaq çərçivəsində əməkdaşlıq imkanlarını müzakirə etmişdir.

Azərbaycan Respublikası Milli Məclisinin Parlamentlərarası İttifaqda əsasən Avropa dövlətlərinin nümayəndələrini birləşdirən "12 Plyus" geosiyasi qrupuna üzvlüklə bağlı müraciətinə baxılması üçün Assambleya çərçivəsində qrupun xüsusi iclası keçirilmişdir. Azərbaycan nümayəndə heyətinin üzvləri ölkəmizdə mövcud olan ictimai-siyasi vəziyyət, həyata keçirilən islahatlar və atılan mütərəqqi addımlar barədə qrupun üzvlərinə ətraflı məlumat vermiş, onların suallarını cavablandırmışlar.

Daha sonra Azərbaycanın üzvlüyü ilə bağlı müzakirələr davam etdirilmiş və səsvermə keçirilmişdir. Təəssüf ki, Almaniya nümayəndə heyətinin rəhbəri cənab Norbert Lammert hələ iclasdan əvvəl Azərbaycanın üzvlüyünə qarşı açıq çıxış etmiş və bəzi digər deputatları da onunla eyni mövqe tutmağa sövq etmişdir. Narahatlıq doğuran bütün məqamlara aydınlıq gətirilməsinə baxmayaraq, Almaniya nümayəndə heyətinin rəhbəri iclas zamanı da Azərbaycana qarşı qərəzli hücumlarını davam etdirmişdir.

Bununla belə, səsvermədə Azərbaycanın qrupa daxil olmasının lehinə 29 səs, əleyhinə isə 25 səs verilmişdir. Üzvlüyə qəbul olunmaq üçün iclas zamanı 2/3 səs çoxluğu şərtinin irəli sürülməsi Azərbaycanın "12 Plyus" geosiyasi qrupunun üzvü olmasına imkan verməmişdir. Məsələyə Parlamentlərarası İttifaqın 2013-cü ildə keçiriləcək növbəti 128-ci Assambleyasında bir daha baxılması qərara alınmışdır.

Səsvermədən sonra qrupda təmsil olunan bir çox deputatlar Azərbaycan nümayəndələrinə yaxınlaşmış və səs çoxluğunu qazandığı halda qeyri-müəyyən prosedurların Azərbaycanın üzvlüyünə mane olmasından təəssüfləndiklərini bildirmişlər. Azərbaycan Respublikası Milli Məclisinin Parlamentlərarası İttifaqdakı nümayəndə heyəti "12 Plyus" geosiyasi qrupunun iclasında keçirilən səsvermədə ölkəmizin üzvlüyünü dəstəkləyən çoxluğa öz minnətdarlığını bildirmiş və Norbert Lambert (Almaniya), Filip Mao (Belçika), Klass Dijkof (Niderland) kimi deputatların tutduqları anlaşılmaz mövqenin təəssüf doğurduğunu bəyan etmişdir.

Bütün bunlara baxmayaraq, Azərbaycan Respublikası Milli Məclisinin Parlamentlərarası İttifaqdakı nümayəndə heyəti ümid edir ki, 2013-cü ildə Ekvadorda keçiriləcək 128-ci Assambleyada Azərbaycan "12 Plyus" geosiyasi qrupuna üzv qəbul olunacaqdır.

Məlum olduğu kimi, Parlamentlərarası İttifaq 1889-cu ildə yaradılmışdır və müxtəlif dövlətlərin parlamentlərini birləşdirir. Qərargahı Cenevrə şəhərində yerləşir. Azərbaycan Respublikasının Milli Məclisi 1993-cü ilin aprel ayından bu mötəbər beynəlxalq qurumun üzvüdür.

Parlamentlərarası İttifaqda siyasi, ictimai, mədəni və digər dəyərlərin ortaqlığı əsasında formalaşdırılan 6 geosiyasi qrup fəaliyyət göstərir. Bunlar Afrika, Asiya-Sakit Okeanı, Avrasiya, Ərəb, Latın Amerikası və "12 Plyus" geosiyasi qruplarıdır. İttifaqın üzvləri ortaq dəyərləri nəzərə almaqla, geosiyasi qruplardan hər hansı birinə üzv ola bilərlər.

Milli Məclisin mətbuat xidməti

Azərbaycan.-2012.- 3 noyabr.- S.3.