Bakıda «Qloballaşma şəraitində insan və vətəndaş hüquq və azadlıqlarının mühafizəsinin aktual problemləri: nəzəriyyə və təcrübə» mövzusunda elmi-praktiki konfrans keçirilmişdir

Noyabrın 2-də Daxili İşlər Nazirliyinin Polis Akademiyasında "Qloballaşma şəraitində insan və vətəndaş hüquq və azadlıqlarının mühafizəsinin aktual problemləri: nəzəriyyə və təcrübə" mövzusunda elmi-praktiki konfrans keçirilmişdir. AzərTAc xəbər verir ki, Azərbaycan Respublikasının İnsan Hüquqları üzrə Müvəkkili (Ombudsman) Aparatının, Azərbaycan Hüquqşünasları Konfederasiyasının, AMEA-nın İnsan Hüquqları üzrə Elmi-Tədqiqat İnstitutunun və Polis Akademiyasının birgə təşkilatçılığı ilə keçirilən tədbirdə Milli Məclisin deputatları, Daxili İşlər, Milli Təhlükəsizlik, Ədliyyə, Fövqəladə Hallar nazirliklərinin akademiyalarının, Baş Prokurorluğun, Konstitusiya Məhkəməsinin və beynəlxalq təşkilatların nümayəndələri iştirak etmişlər.

Konfrans iştirakçıları əvvəlcə ümummilli lider Heydər Əliyevin büstü önünə əklil qoymuş, xatirəsini ehtiramla anmışlar.

Polis Akademiyasının rəisi, hüquq üzrə fəlsəfə doktoru, polis general-mayoru Nazim Əliyev tədbiri açaraq bildirmişdir ki, bu konfrans respublikamızda qloballaşma dövründə insan hüquqlarının müdafiəsi sahəsində bir sıra problemlərin həllində mühüm rol oynayacaqdır.

Nazim Əliyev vurğulamışdır ki, müasir dövrdə qloballaşma dövlət və cəmiyyət həyatının hər bir sahəsinə təsir göstərdiyi kimi, insan hüquqlarına da əsaslı təsir göstərən amillərdəndir. Ümummilli lider Heydər Əliyev xalqın təkidli tələbi ilə ikinci dəfə hakimiyyətə gəldikdən sonra demokratik, hüquqi və dünyəvi dövlət quruculuğunu respublikamız əsas inkişaf yolu seçmiş, insan hüquq və azadlıqlarının qorunmasını ön plana çəkmişdir. Ölkəmizdə demokratik cəmiyyətlərə xas olan institutların formalaşdırılması və azad siyasi fəaliyyət üçün hər cür şərait yaradılmışdır.

Polis Akademiyasının rəisi demişdir ki, ölkəmiz bu sahədəki uğurları ilə uzun illər demokratik yolla inkişaf etmiş Avropa dövlətləri ilə bir sıradadır. Azərbaycanın yaşadığı yeni inkişaf mərhələsi insan hüquqlarının müdafiəsi sahəsində aparılan ardıcıl islahatların davam etdirilməsini şərtləndirir.

Elmi-praktiki konfransda ombudsman Elmira Süleymanova çıxış edərək bildirmişdir ki, artıq dünyada insan hüquqlarının müdafiəsi sahəsində beynəlxalq standartlar tətbiq olunur. Ölkəmizdə də bu sahədə mühüm işlər görülür. Bu gün çox sevindirici haldır ki, insan hüquqlarının müdafiəsini həyata keçirmək üçün Polis Akademiyasında təcrübəli kadrlar hazırlanır.

İnsan hüquqlarının təmin olunması sahəsində birgə fəaliyyətin daha da təkmilləşdirilməsi ilə bağlı tövsiyələrini verən Elmira Süleymanova ombudsmanın insan hüquqlarının müdafiəsi üzrə fəaliyyətini Daxili İşlər Nazirliyi, o cümlədən Polis Akademiyası ilə sıx əməkdaşlıq əsasında qurduğunu vurğulamışdır.

Konfransın kifayət qədər aktual bir mövzunu əhatə etdiyini söyləyən Milli Məclisin Hüquq siyasəti və dövlət quruculuğu komitəsinin və Azərbaycan Hüquqşünasları Konfederasiyasının sədri Əli Hüseynli vurğulamışdır ki, qloballaşma şəraitində insan hüquqlarının qorunması təkcə keçmiş SSRİ respublikalarında deyil, həmçinin Avropanın aparıcı dövlətlərində də ciddi problemə çevrilmişdir. Bu konfrans ona görə əhəmiyyətlidir ki, insan hüquqları sahəsində nəzəri və praktiki baxışlar arasında çox böyük fərq vardır.

Əli Hüseynli qeyd etmişdir ki, Avropada başlamış iqtisadi böhran insan hüquqları məsələsinin nə dərəcədə həssas olduğunu nümayiş etdirmişdir. Azərbaycan insan hüquqlarının qorunması sahəsində nəzəri cəhətdən yüksək təcrübəyə malikdir. Bununla bağlı onlarla beynəlxalq konvensiyaları ratifikasiya etmişik. Eyni zamanda, son vaxtlar ölkəmizdə insan hüquqlarının müdafiəsi sahəsində bir neçə fundamental qanunlar qəbul edilmişdir.

Ölkəmizdə insan hüquqlarının qorunması sahəsində görülən işlərdən danışan AMEA-nın İnsan Hüquqları üzrə Elmi-Tədqiqat İnstitutunun direktoru, Milli Məclisin deputatı Aytən Mustafayeva bildirmişdir ki, Azərbaycanda əsas insan hüquqları və azadlıqları ölkə rəhbərliyi səviyyəsində qorunur. Demokratik dövlət quruculuğu yolu ilə irəliləyən respublikada bütün sahələrdə hüquqi bazanın möhkəmləndirilməsi və təkmilləşdirilməsi üçün müvafiq islahatlar aparılmaqdadır.

A.Mustafayeva Azərbaycanın insan hüquq və azadlıqlarının qorunması sahəsində əhəmiyyətli uğurlar əldə etdiyini də vurğulamışdır.

Konfransda "Azərbaycan Respublikası Konstitusiyasında insan və vətəndaş hüquqları, azadlıqları konsepsiyası", "Qloballaşma, insan və vətəndaş hüquq və azadlıqları, cinayətkarlıq: sosial- kriminoloji problemləri", "İnsan hüquqlarının təminatında məhkəmə konstitutsionalizmi", "DİO-nun fəaliyyətində insan hüquq və azadlıqlarının təminatı", "İnsan hüquqları və polis" və digər mövzularda çıxışlar dinlənilmiş, müzakirələr aparılmışdır.

Azərbaycan.-2012.- 3 noyabr.- S.3.