Savaş Azərbaycan əsgərinin qələbəsi ilə başa çatacaq

"Mən hərbi hissələrdə tez-tez oluram. Cəbhə xəttində də tez-tez oluram. Döyüşçülərlə səngərlərdə görüşürəm, söhbət aparıram. Görürəm ki, həqiqətən, Azərbaycan əsgərinin Vətənə çox böyük bağlılığı vardır. Vətən sevgisi, vətənpərvərlik ruhu bizdə çox yüksəkdir. Əminəm ki, dediyim bütün bu amillər - bizim siyasi gücümüz, iqtisadi inkişafımız, hərbi gücümüz, Vətənə olan sevgimiz məsələnin həllinə gətirib çıxaracaq, Azərbaycan öz ərazi bütövlüyünü bərpa edəcək, Azərbaycan bayrağı Şuşada, Xankəndidə, Dağlıq Qarabağda dalğalanacaqdır".

İlham ƏLİYEV

Düşmənlə üz-üzə dayanan qürurlu Azərbaycan əsgəri

...Deyirlər Vətən səngərdən başlayır. Bu səngərdə Vətənin keşiyində duranlar isə ən şərəfli vəzifənin daşıyıcılarıdır. Cəbhə bölgəsində düşmənlə gecə-gündüz üz-üzə dayanan Azərbaycan əsgəri hər an ayıq-sayıqdır. Çünki erməni səngəri cəmi 50-250 metr aralıdadır.

Tərtərin "N" saylı hərbi hissəsinə səfər edən Milli Məclis Sədrinin müavini Bahar Muradova, AMEA-nın vitse-prezidenti Akif Əlizadə, parlamentin Regional məsələlər komitəsinin sədri Arif Rəhimzadə, deputatlar Musa Quliyev, Bəxtiyar Sadıqov, Sahibə Qafarova, hüquq müdafiəçiləri Novella Cəfəroğlu, Səadət Bənənyarlı və Müdafiə Nazirliyinin Şəxsi Heyət Baş İdarəsinin Tərbiyə İşləri İdarəsinin rəisi, general mayor Vaqif Məmmədov, general mayor Nizam Osmanov, Müdafiə Nazirliyinin mətbuat xidmətinin rəisi, polkovnik Eldar Sabiroğlunun daxil olduğu nümayəndə heyəti və media nümayəndələrilə səngərə daxil oluruq.

Bölük komandiri bizi qarşılayır. Zabit böyük komandirlərə məruzə etdikdən sonra postdakı döyüş mövqeyində dayanan əsgərlərə baş çəkirik. Ordunun qarşısında duran vəzifələri uğurla yerinə yetirməsi üçün ən əsas şərtlərdən biri şəxsi heyətin mənəvi-psixoloji vəziyyətidir. Əgər əsgərin psixoloji durumu yüksək səviyyədə olarsa, ən müasir texnika ilə təchiz olunmuş düşmənə belə qalib gələ bilər. Fərəhli haldır ki, bu gün ölkəmizdə həyata keçirilən uğurlu sosial-iqtisadi siyasət nəticəsində xalqımızın maddi rifahına təsir edən bütün tədbirlər, Azərbaycan Silahlı Qüvvələrinin şəxsi heyətində də böyük ruh yüksəkliyi yaradıb. Növbədə duran əsgərlərin də mənəvi-psixoloji vəziyyəti ürəkaçan idi.

Həmsöhbət olduğumuz əsgərlər və zabitlər ciddi nizam-intizamı qorumaqla yanaşı, onlara daim diqqət və qayğı göstərildiyini də xüsusi qeyd etdilər.

Əsgər Fuad Quluzadə 13 aydır ki, burada qulluq edir. Tərxis olunmasına cəmi 5 ay qalıb. Hərbi xidmətə başlamağından qürur hissi duyan əsgər zabitlərdən razılıq edir: "Zabitlərimizin bizlərə hərb elminin sirlərini öyrətmələri ilə barəbər, mənəvi dəstəklərini də qeyd etmək istəyirəm. Biz öz həyatları ilə daim orduya bağlı olan zabitlərimizdən ilhamlanırıq. Fürsətdən istifadə edib öz yaxınlarıma, ailəmə, dostlarıma salamlar göndərirəm. Narahat olmasınlar, bir əsgər kimi dövlətimizin daimi qayğısını hiss edirik. Qidalanmağımız, geyimimiz yüksək səviyyədədir. İnşallah, hərbi xidməti layiqincə başa vuraraq alnıaçıq, başıuca onların yanına qayıdacağıq. Amma bizim üçün fəxr olardı ki, ordudan qələbə müjdəsi ilə tərxis olunaq! Biz gənc əsgərlər müharibə başladığı təqdirdə döyüşə atılmağa və lazım gələrsə, canımızı belə fəda etməyə hazırıq. Çünki Vətən bizə arxalanır! Bu gün biz onu göz bəbəyimiz kimi qoruya bilməsək, işğal altında olan torpaqlarımızı azad edə bilməsək, gələcək nəsil bunu bağışlamaz".

Qalib əsgər kimi ailəmizin yanına dönmək hər birimiz üçün ən böyük şərəf olardı

Əsgər Rüfət Dadaşov da deyir ki, onlar səngərdə xidmət etməyi özləri üçün şərəf bilirlər: "Çünki vətən səngərdən başlanır. Hərbi xidmətə gələnə qədər əsgər həyatının özəllikləri barədə müəyyən məlumatım olsa da, ümumilikdə təsəvvürüm az idi. Bu hərbi hissədəki vəziyyəti, əsgərlər üçün yaradılan şəraiti görəndə həqiqətən də qüdrətli dövlətin vətəndaşı olduğumu özüm üçün bir daha yəqin etdim. Ordumuzun günbəgün qüdrətlənməsi, əsgərə olan xüsusi diqqət və qayğı bizim hamımızın mənəvi-psixoloji vəziyyətimizə də birbaşa təsir edən amildir. Arxamızda güclü dövlətin durduğunu hiss edəndə daha mübariz olur, torpaqlarımızın işğaldan azad edilməsi üçün alışıb-yanırıq. Bütün əsgərlərin arzusu budur ki, torpaqlarımızın düşməndən azad edilməsi bizim hərbi xidmət dövrümüzə təsadüf etsin! Qalib əsgər kimi ailəmizin yanına dönmək hər birimiz üçün ən böyük şərəf olardı".

Əsgərlərlə söhbət etdikdən sonra onların istirahət etdiyi "blindaj"a daxil oluruq. Hər bir əsgər iki saat döyüş növbəsində olduqdan sonra burada dincəlir. Onun rahatlığı üçün hər cür şərait var. Bir vaxtlar torpaqdan qurulan "blindaj"larda əsgərlər bir nəfərlik yataq xurcununda yatırdısa, indi müasir Azərbaycan Ordusunda "blindaj"lar taburda xidmət çəkən əsgərlərin yataqxanasından fərqlənmir. İstirahət üçün bütün şərait var. Soyuq qış aylarında isə "blindaj" dizel yanacağı ilə işləyən soba ilə qızdırılır. Bir sözlə, burada əsgər heç nədən korluq çəkmir. Gördüyümüz mənzərə bizi çox fərəhləndirir. Eyni zamanda, Azərbaycan əsgərinin hərbi xidməti ilə bağlı söylədiyi fikirlər qürur yaradır. Bu, həm də silahlı qüvvələrdə aparılan uğurlu hərbi islahatların real nəticələri, bəhrələridir.

Beləcə, görüşdən doğan yüksək-əhval ruhiyyə ilə geiryə - hərbi hissəyə dönürük. Şıxarx kəndində yerləşən qərargahda bizi hərbi hissənin şəxsi heyəti qarşılayır. General-mayor Vaqif Məmmədov şəxsi heyətə nümayəndə heyətinin üzvlərini təqdim edir.

Silahlı Qüvvələrimizin maddi-texniki bazası yüksək səviyyədə möhkəmlənib

Şəxsi heyət qarşısında çıxış edən Milli Məclis Sədrinin müavini Bahar Muradova isə bildirdi ki, müstəqil Azərbaycanın ümid, pənah yeri onun Milli Ordusudur. Düşmən torpaqlarımızın bir hissəsini işğal altında saxlasa da, bu gün Azərbaycanın yüksələn iqtisadi potensialı, əldə etdiyi nailiyyətlər, bütün sahədəki inkişaf Silahlı Qüvvələrin yüksək səviyyədə maddi-texniki bazasının möhkəmlənməsinə, onun döyüş texnikası ilə təmin olunmasına çox böyük şərait yaradıb və bu gün ordumuz bölgədə ən güclü ordu hesab olunur: "Biz bu sözü qətiyyətlə söyləyirik. Çünki biz bunu sizin xidmətinizdən, davranışınızdan hiss edirik. Qüdrətli ordu qüdrətli dövlət deməkdir. Azərbaycanın da bu gün buna ehtiyacı var. Bizim ordumuz qarşısında dayanan bütün hədəflərə çatmağa imkan verən bir silahlı birləşmədir. Onun gücü yetər ki, əmr olduğu təqdirdə ildırım sürəti ilə düşməni geri oturtsun.

Hazırda Azərbaycan Prezidentinin yürütdüyü siyasət ondan ibarətdir ki, biz torpaqlarımızı sülh yolu ilə geri qaytaraq. Ancaq bizim də səbrimiz tükənə bilər. Azərbaycan Ordusu bütün mənalarda qüdrətli olduğunu sübut etməyə hazırdır! Ali Baş Komandan İlham Əliyev sizlərə güvənir. Sizin də hazırlığınız bizi çox sevindirir və bundan qürur duyuruq".

Dinamik inkişaf edən Azərbaycanın dinamik ordusu

AMEA-nın vitse-prezidenti Akif Əlizadə isə bildirdi ki, bu səfərə gələrkən böyük həyəcan keçirib: "Ancaq öz gözlərimlə gördüklərim məni çox sevindirdi! Düşünürəm ki, dinamik inkişaf edən Azərbaycanın dinamik ordusu bu gün göz qabağındadır. Burada silahlar, cihazlar və bəzi hərbi avadanlıqları gördüm və onları elmi baxımdan təhlil etdim. Azərbaycan Ordusunun ən müasir ordu olduğunu gözlərimlə gördüm. Bu ordu istənilən tapşırığı yerinə yetirməyə qadirdir və tam hazırdır".

Deputat Musa Quliyev isə bildirdi ki, Azərbaycan xalqı bu gün öz ordusuna güvənir. Çünki ordu xalqın qürur, güvənc yeridir: "Bizim qüdrətli ordumuz var və inanıram ki, Silahlı Qüvvələrimiz işğal altında olan torpaqlarımızı azad edəcək. Həqiqətən, Vətən səngərdən başlayır. Qapanlı kəndinin bir tərəfində insanlar təsərrüfatla məşğul olurlar, digər tərəfində isə əsgərlər bu insanları qoruyurlar. Ona görə də deyirəm ki, bu Vətən onu qoruyan əsgərindir". M.Quliyev şəxsi heyət qarşısında vətənpərvərlik ruhlu şeirlər də söylədi.

Son çıxışı edən Vaqif Məmmədov isə bütün şəxsi heyət adından söz verdi:

- Biz dövlətimizin göstərdiyi qayğını hiss edirik və söz veririk ki, bundan da yaxşı xidmət edəcəyik, bundan da güclü hazırlıqlar keçəcəyik, verilən ən müasir texnikaları daha da yaxşı öyrənəcəyik və silahlarımızı daim döyüşə hazır saxlayacağıq. Yaşasın Azərbaycan Ordusu!

Yaxın vaxtlarda torpaqlarımızın işğaldan azad edilməsinin şahidi olacağıq

Səfərin sonunda isə Müdafiə Nazirliyinin mətbuat xidmətinin rəisi, polkovnik Eldar Sabiroğlu mətbuat konfransı keçirdi.

2012-ci ilin 10 ayı ərzində atəşkəsin 1178 dəfə pozulduğunu deyən mətbuat xidmətnin rəisi ən çox gərginliyin Füzuli, Tərtər və Ağdam istiqamətində yaşandığını bildirdi. Hər iki tərəfdən itkilər olduğunu diqqətə çatdıran Eldar Sabiroğlu atəşkəsin pozulması nəticəsində Azərbaycan Ordusunun ötən 10 ay müddətində 12, qarşı tərəfin isə 32 döyüş itkisi verdiyini söylədi: "Qoşunların təmas xəttində ən gərgin vəziyyət iyun ayında yaşanıb. Ötən ay ərzində qoşunların təmas xəttində 19 monitorinq keçirilib və insidentsiz başa çatıb. Adətən, monitorinq iştirakçıları yerlərini dəyişən kimi həmin ərazidə ermənilər atəşkəsi pozurlar. Biz əsgərik və birinci vəzifəmiz müharibə vasitəsilə də olsa, torpağımızı işğaldan azad etməkdir. İkinci savaş regionda bütövlükdə böyük alovun yaranmasına səbəb olacaq. Savaş Azərbaycan əsgərinin qələbəsi ilə başa çatacaq!".

Eldar Sabiroğlunun sözlərinə görə 10 ay ərzində müdafiə naziri, general-polkovnik Səfər Əbiyevin başçılığı altında bütün hərbi birləşmələrdə genişmiqyaslı təlimlər keçirilib. Bu sınaqlardan ordumuz pis çıxmayıb: "Hərdən eşidirik ki, ermənilər də bizim işğal altında olan zonalarda həftədə bir-iki dəfə təlim keçirirlər. Təlimi hazırlamaq, həyata keçirmək elə də asan deyil. Bunun üçün ciddi hazırlıq və böyük maliyyə mənbəyi lazımdır. Ermənilər iki-üç tank, bir artilleriya qurğusu çıxarıb adını qoyurlar ki, təlim keçirirlər. Bunlar uydurmadır və Azərbaycana heç cür təsir edə bilməz. Bu gün Azərbaycan Ordusunun təmas xəttində ən müasir silahlar yerləşdirilib. Ermənistan silahlı qüvvələrinin təcavüzünü dəf etmək qarşıda duran əsas vəzifələrdəndir. Bu an uzaqda deyil. Daha dözüm də qalmayıb. Düşünürəm ki, yaxın vaxtlarda torpaqlarımızın işğaldan azad edilməsinin şahidi olacağıq".

Onun sözlərinə görə, Azərbaycanda son illər ordu quruculuğu istiqamətində böyük işlər aparılıb. Bunun birincisi silahlanma, ikincisi isə şəxsi heyətin döyüş ruhunun yüksəldilməsidir. Polkovnik, həmçinin qeyd etdi ki, 45 hərbi şəhərcikdə təmir, quruculuq işləri aparılıb.

Azərbaycan Silahlı Qüvvələrinin bütün ştat struktrunun NATO standartlarına uğunlaşdırıldığını deyən Eldar Sabiroğlu, həmcinin bildirdi ki, NATO-nun mənzil qərargahlarında Silahlı Qüvvələrimizin zabitləri NATO zabitləri kimi xidmət edirlər: "Bu gün NATO qərargahlarında xidmət edən zabitlərimizin sayı artır. İngiltərənin Norfuld şəhərindəki Hərbi Dəniz Qüvvələrinin qərargahına Azərbaycan HDQ-nin zabiti göndəriləcək və hazırda buna hazırlıq işləri gedir". Polkovnik vurğuladı ki, Azərbaycanın 21 ölkədə hərbi attaşesi və nümayəndəsi var və 53 ölkə ilə hərbi əməkdaşlıq edir. "Azərbaycanda ali hərbi məktəblər o dərəcədə inkişaf edib ki, hazırda burada Qazaxıstan, Qırğızıstan və Tacikistandan təhsil alanlar var. Daha bir neçə ölkə də təhsil üçün müraciət edib". Ordumuzun düşmən ordusu ilə müqayisəsinə gəlincə, Eldar Sabiroglu dedi: "Elə radar sistemimiz var ki, düşmənin atdığı raketi yerindəcə təsbit edib, onu anında zərərsizləşdirə bilirik".

Jurnalistlərin suallarını da cavablandıran Eldar Sabiroğlu sonda qeyd etdi ki, cəbhə bölgəsində yerləşən hərbi hissələrə bu cür səfərlər davam edəcək.

Beləliklə, nümayəndə heyətinin Tərtərdə yerləşən "N" saylı hərbi hissəsinə səfəri başa çatdı.

Rəşad BAXŞƏLİYEV

Azərbaycan.-2012.- 3 noyabr.- S.4.