İnkişafın yeni mərhələsi

Hələ üç il əvvəl Ağsuya səfəri zamanı bir çox yeni obyektlərin təməlqoyma və açılış mərasimlərində iştirak edən Prezident İlham Əliyev ictimaiyyətin nümayəndələri ilə görüşündə rayonda görülən işlərdən razılığını bildirmişdi: "Mən rayonda gedən proseslərlə bu gün yaxından tanış olmuşam və sizi bütün bu gözəl nailiyyətlər münasibəti ilə ürəkdən təbrik etmək istəyirəm. Rayon rəhbərliyi çox səmərəli işləyir və nəticələr də göz qabağındadır. Bu nəticələri nə gizlətmək, nə də danmaq olar, hər şey göz qabağındadır. İş olan yerdə nəticə də vardır. 4 il bundan əvvəl Ağsuda olarkən mənzərə tam başqa idi. Amma bu gün Ağsu, deyə bilərəm ki, Azərbaycan rayonlarının arasında ən qabaqda gedən rayonlardan biridir. Çox böyük işlər görülür. İnsanların məşğulluğu üçün praktiki işlər aparılır".

Prezident İlham Əliyevin Ağsuda görülən işlərlə bağlı söylədiyi xoş sözlərdən, verdiyi tapşırıq və tövsiyələrdən sonra həyata keçirilən çoxsaylı layihələr, görülən abadlıq-quruculuq işləri rayonu tamamilə müasir diyara çevirib. Ağsulular bu gün də əzmlə çalışır, dövlətin diqqət və qayğısından bəhrələnərək rayonu daha da inkişaf etdirmək üçün bütün imkanlardan istifadə edirlər.

Odur ki, regionların sosial-iqtisadi inkişafına dair ikinci Dövlət Proqramında nəzərdə tutulan tədbirlər müvəffəqiyyətlə həyata keçirilir. Əhalinin həyat şəraitinin və sosial müdafiəsinin yaxşılaşdırılması, sahibkarlığın inkişaf etdirilməsi, yeni iş yerlərinin açılması istiqamətində xeyli iş görülüb. Rayona gələn hər kəs bunun şahidi olur.

RİH başçısı Ənvər Seyidəliyev söhbət əsnasında bildirdi ki, nəzərdə tutulan layihələrin icrasında heç bir ləngimə və ya çətinlik yoxdur. Yenidənqurma işləri Heydər Əliyev, Vidadi, Azərbaycan, Ü.Hacıbəyli və digər küçələrdə indi də davam etdirilir. Zövqlə, milli memarlıq üslubu ilə görülmüş işlər insanın gözünü-könlünü oxşayır.

Şəhərdə Dünya Bankının pilot layihəsi üzrə su və kanalizasiya xətləri dəyişdirilir. Dağlardan 25 kilometrlik məsafədən Ağsu şəhərinə və üç kəndə - Elabad, Pirhəsənli, Qaraqaşlı kəndlərinə içməli su çəkilib. Əlavə olaraq, Girdimançay hövzəsindən yeni su xəttinin çəkilişi üçün tamamlama işləri gedir.

Üç min yerlik şəhər stadionu, sutkada 800 ton istehsal gücünə malik çörək zavodu istifadəyə verilib. Rayonun Padar kəndində saatda 30 kubmetr qum-çınqıl istehsal edən karxana, Pirhəsənli kəndində kənd təsərrüfatı məhsullarının saxlanılması üçün 500 tonluq soyuducu anbar tikilir. Dövlət Miqrasiya Xidmətinin regional idarəsi üçün inzibati binanın, "Aqrolizinq" ASC-nin Ağsu rayon filialı üçün istehsalat bazasının, həmçinin onlarca ticarət, məişət və servis xidməti obyektlərinin də inşası davam edir. Xəstəxana kompleksinin tikinti işləri də öz qaydasındadır. Yaxınlarda idman sağlamlıq kompleksinin inşasına da başlanılacaq. Qarabağ müharibəsi əlilləri və şəhid ailələri üçün 54 mənzilli yeni yaşayış binasının, həmçinin baytarlıq idarəsinin yeni binasının layihə-smeta sənədləri hazırlanır. Ağsu şəhərində sahibkarlar tərəfindən ticarət mərkəzinin, bank və sığorta şirkətləri filialları üçün ofislərin, eləcə də bir sıra digər obyektlərin tikintisi davam edir.

Ölkə rəhbərinin sərəncamı ilə Ağsuda kənd yollarının tikintisi üçün Prezidentin Ehtiyat Fondundan 6 milyon manat vəsait ayrılıb. RİH başçısı Ə.Seyidəliyev bildirdi ki, həmin vəsait əsasında Ağsu-Gəgəli-Ləngəbiz-Göylər avtomobil yolunun yenidən qurulmasına başlanılıb. Həmin yolda inşa edilən 3 körpüdə son tamamlama işləri görülür.

"Yeniləşən Azərbaycana yeni məktəb" layihəsi çərçivəsində 2012-ci ildə tikilmiş 180 yerlik Ləngəbiz tam və 80 yerlik Nəmirli əsas məktəbləri dərs ilində qapılarını şagirdlərin üzünə açıb. Qəşəd, Rəhimli tam orta məktəbləri üçün 180 yerlik yeni binaların tikintisi davam edir.

Bəli, dövlətin və dövlət başçısının qayğısı sayəsində Ağsu inkişafın yeni mərhələsini yaşayır. Müasir dövrün tələblərinə uyğun tikinti-quruculuq, yenidənqurma işləri, yolların, küçələrin abadlaşdırılması, təhsil və tibb müəssisələrinin tikilib istifadəyə verilməsi, həmçinin genişmiqyaslı abadlıq tədbirləri yeniləşən Ağsunun reallıqlarıdır.

Telman NƏZƏRLİ

Azərbaycan.-2012.- 3 noyabr.- S.6.