Uğurların sayı artır

Yaşanan inkişaf respublikamızın şimal bölgəsinin sosial-iqtisadi həyatında özünəməxsus çəkiyə malik olan Xaçmazın da simasında aydın müşahidə olunur. Regionların inkişafına dair ikinci Dövlət Proqramının icrası çərçivəsində infrastruktur təminatının yaxşılaşdırılması, müasir tipli obyektlərin yaradılması, mövcud obyektlərin beynəlxalq standartlara uyğunlaşdırılması, ixracyönümlü məhsul istehsalının stimullaşdırılması istiqamətində tədbirlər davam edir. Həmçinin əhalinin kommunal xidmətlərlə təminatının yaxşılaşdırılması, məşğulluq səviyyəsinin artırılması, yoxsulluğun səviyyəsinin azaldılması xüsusi diqqət mərkəzində saxlanılır.

Xaçmazdakı tərəqqi çoxşaxəli xarakter daşıyır. Sənaye, digər profilli istehsal müəssisələri, sosial həyat, infrastruktur və başqa sahələrdəki inkişaf bir-birini tamamlayır. Onun özəl sektorda ixracın stimullaşdırılması və ixrac mallarının çeşidinin artırılması, ticarət, iaşə və məişət sahələrində xidmət səviyyəsinin daha da yüksəldilməsi, istehlak və ərzaq mallarının keyfiyyətinə və təhlükəsizliyinə nəzarətin gücləndirilməsi əsas fəaliyyət istiqamətləri sırasında yer alır. Qeyri-neft sektorunun genişləndirilməsi, rəqabətədavamlı sənaye məhsullarının istehsalının dəstəklənməsi qarşıya qoyulan əsas məqsədlərdən sayılır. Sahibkarlığın inkişafı, iş adamlarının hüquqlarının qorunması, onların normal fəaliyyəti üçün münbit şəraitin yaradılması istiqamətində ardıcıl tədbirlər görülür. Məhz bunun nəticəsidir ki, hazırda rayonda region üçün nümunə ola biləcək onlarca iri və kiçik sahibkarlıq müəssisələri fəaliyyət göstərir.

Sahibkarlığın inkişafı ümumi daxili məhsul istehsalının artım dinamikasında da özünü göstərir. 9 ay ərzində rayonun aqrar təsərrüfatlarında 6564 ton diri çəkidə ət, 28190,6 ton süd, 15,2 milyon ədəd yumurta, 188 ton yun istehsal olunmuşdur. Təsərrüfatlarda hazırda 58 min qaramal, 93 min baş davar var. Bu dövrdə rayon üzrə ümumilikdə 81149 ton kənd təsərrüfatı məhsulları istehsal edilmiş, hər hektarın məhsuldarlığı 22,7 sentner olmuşdur. Hazırda təsərrüfatlarda meyvə-tərəvəz yıgımı davam edir, şumlama işi aparılır.

Ölkəmizin ərzaq təhlükəsizliyinin təminatı birbaşa aqrar sahənin inkişafından asılıdır. Bunu yaxşı başa düşən xaçmazlılar, torpağın hər qarışından səmərəli istifadə etməyə çalışırlar. Yüksək dövlət qayğısı sayəsində kənd təsərrüfatının maddi texniki bazasının gücləndirilməsi istiqamətində xeyli iş görülmüşdür. Hər biri 2000 tonluq 5 və 500 tonluq 1 soyuducu anbarı tikilib istifadəyə verilmişdir. 6000 və 500 tonluq daha 2 anbarın tikintisi başa çatmaq üzrədir. Hazırda isə rayonda birinin sahəsi 4, digərinin 2 hektar olmaqla 2 istixana, 1 meyvə-tərəvəz qurudulması sexi də fəaliyyət göstərir.

Xaçmazda tikinti-quruculuq işləri də genişlənir - yaşayış məntəqələri abadlaşdırılır, yol infrastrukturunun inkişafı və bərpası istiqamətində genişmiqyaslı layihələr həyata keçirilir, müasir inzibati binalar və yaşayış binaları tikilir. Orijinallığı ilə seçilən "Heydər bulağı" və "İlham bulağı" kompleksləri arasında 4 hektar ərazidə müasir üslubda salınmış park da Xaçmaz şəhərinin simasını xeyli dəyişib. Burada hündürlüyü 12 metr olan samovar quraşdırılıb, şəlalələr, əhali üçün istirahət köşkləri qoyulub, yaşıllıq zolaqları arasında səkilər salınıb, müxtəlif ölkələrdən gətirilmiş yüzlərlə ağac, bəzək və gül kolu əkilib.

Rayonda əhaliyə göstərilən səhiyyə, kommunal xidmətləri barədə də xoş sözlər söyləmək olar. Son dövrlərdə mövcud səhiyyə ocaqlarının maddi-texniki bazası möhkəmləndirilmiş, bir çoxu əsaslı təmir olunmuş, yeni korpuslar tikilmişdir. Kommunal xidmətlərlə əhalinin daha geniş təbəqəsini əhatə etmək üçün isə ərazilər, yaşayış məntəqələri qazlaşdırılır, yeni elektrik, içməli su xətləri çəkilir, digər infrastruktur layihələr həyata keçirilir.

Akif ƏLİYEV

Azərbaycan.-2012.- 3 noyabr.- S.6.