Boz çöllərdə meşə massivləri və meyvə bağları salınır

Naxçıvan Muxtar Respublikasında 15 ildən artıqdır ki, yeni meyvə bağları və meşə massivləri salınır. Bu sahədə Babək rayonu xüsusilə fərqlənir. Rayon icra hakimiyyəti başçısının müavini Abbas Əliyevin sözlərinə görə, təkcə bu ilin ilk 9 ayı ərzində 13 hektar meyvə bağı salınıb, 1,3 hektar meşə massivləri artırılıb.

Cari ilin fevralında qəbul olunmuş "2012-2015-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı"nın icrası çərçivəsində Babək rayonunda da tədbirlər planı hazırlanaraq bir çox əməli tədbirlər görülüb. Tədbirlər planına əsasən, yeni bağların salınması üçün rayonun müxtəlif ərazilərində əkin atlası hazırlanıb. Həmin atlasa uyğun olaraq, Əshabü-Kəhf ziyarətgahına gedən yolun sağ tərəfində 3600 ərik tingindən ibarət 4 hektar yeni meyvə bağı salınıb. Bundan əlavə, həmin yolun yaxınlığında 10 hektar yararsız ərazidə bağ salınması məqsədilə 9 min müxtəlif meyvə ağacı əkilib.

Abbas Əliyev onu da bildirdi ki, Naxçıvan-Culfa avtomagistralının Babək rayonunun Şəkərabad kəndi ərazisindən keçən hissəsi boyunca 1,3 hektar ərazidə yeni yaşıllıq zolağı salınıb. Naxçıvan-Şahbuz avtomobil yolunun Babək rayonunun Didivar kəndi ərazisindən keçən hissəsinin sol tərəfindəki təpəliklərdə isə "terras" əkin üsulu ilə salınan yaşıllıq zolaqları muxtar respublikada ilkin təcrübə kimi təqdirəlayiqdir. İndi həmin ərazilərdə sıralanan meşə massivləri boz təpəciklərə yaşıl don geydirib.

Yaradılan yaşıllıqların, əkilən tinglərin suvarılmasına xüsusi nəzarət edilir. Damcı üsulu ilə suvarılan yaşıllıqlardakı hər ağacın dibinə çəkilmiş plastik borularla onlara su verilir. Ümumiyyətlə, ərazilərin suvarılması üçün rayonun ümumi ehtiyatından lazımi və səmərəli şəkildə istifadə olunur.

Yaşıllıq zolaqlarının salınması, artırılması işində rayon sakinləri köməklərini əsirgəmirlər. Yaşıllaşdırma İdarəsinin işçilərinin üzərinə də bu sahədə böyük iş düşür.

Bir məqamı qeyd edək ki, ötən il Babək rayonu üzrə 21,4 hektar ərazidə yaşıllıq zolaqları, meşə massivləri, meyvə bağları, güllüklər salınıb. Ötən il 20,7 hektar ərazidə isə meşəbərpa işləri həyata keçirilib. Nəticədə bu gün rayonun hər tərəfində yaşıllıqlar göz oxşayır, meyvə bağlarından bol məhsul yığılır.

Elxan MƏMMƏDOV

Azərbaycan.-2012.- 3 noyabr.- S.6.