Göyçayda keçirilən VII Nar bayramı möhtəşəmliyi ilə yerli və xarici qonaqlarda böyük maraq doğurmuşdur

Noyabrın 3-də Göyçay şəhərində VII Nar bayramı keçirilmişdir. AzərTAc xəbər verir ki, Göyçay Rayon İcra Hakimiyyətinin təşkilatçılığı ilə keçirilən bayram tədbirində Milli Məclisin deputatları, 15-ə yaxın ölkənin Azərbaycandakı səfirləri, beynəlxalq təşkilatların, "İrəli" İctimai Birliyinin və bir sıra gənclər təşkilatlarının təmsilçiləri, tanınmış elm və mədəniyyət xadimləri, ətraf rayonların icra hakimiyyətlərinin başçıları, yerli və əcnəbi iş adamları, Azərbaycanda təhsil alan xarici tələbələr, eləcə də Azərbaycan, Türkiyə və Rusiyanın aparıcı KİV-lərinin nümayəndələri iştirak etmişlər.

Əvvəlcə nar formasında hazırlanmış paltarlar geyinmiş məktəblilər qonaqları üç dildə salamlamış, milli geyimli oğlan və qızlar tədbir iştirakçılarına nar şirəsi və bayramın emblemi olan döş nişanlarını təqdim etmişlər.

Sonra qonaqlar və rayon ictimaiyyətinin nümayəndələri ulu öndər Heydər Əliyevin abidəsini ziyarət edərək önünə gül dəstələri düzmüşlər. Bayram iştirakçıları Heydər Əliyev Mərkəzinin fəaliyyəti ilə də yaxından tanış olmuşlar.

Tədbirdə rayon icra hakimiyyətinin başçısı Mənsur Məmmədov, BMT-nin Azərbaycandakı rezident-əlaqələndiricisi Antonius Broek, Milli Məclisin aqrar məsələlər, elm və təhsil komitələrinin sədrləri Eldar İbrahimov və Şəmsəddin Hacıyev məhsul bayramı münasibətilə göyçaylıları təbrik etmiş, narçılıqla məşğul olan insanlara cansağlığı, süfrələrinə ruzi-bərəkət arzulamışlar.

Qeyd edilmişdir ki, Azərbaycanın rayonlarının hər biri özünəməxsus meyvə-tərəvəzi ilə tanındığı kimi, Göyçay da qocaman çinarları və qeyri-adi dada malik narı ilə məşhurdur. Nar Azərbaycanda, İranda, Hindistanda, Türkiyədə, Özbəkistanda, ABŞ-da və Latın Amerikası ölkələrində yetişsə də, Göyçay yeganə rayondur ki, burada həmin meyvənin 67 sortu becərilir. Dünya bazarında çox böyük tələbat duyulan narın bir çox müalicəvi xüsusiyyətləri vardır. Nar cənnət meyvəsi sayılır və "Qurani-kərim"də onun adı çəkilir.

Bildirilmişdir ki, 2006-cı ilin noyabrından başlayaraq ənənəvi olaraq 7-ci dəfədir ki, keçirilən Nar bayramı rayonda bu sahənin inkişafına, məhsul istehsalının artımına və onun satış şəbəkəsinin genişlənməsinə səbəb olmuşdur. Ötən il rayonda 38 min ton nar tədarük edilmişdir. Cari ildə məhsuldarlığın daha çox olacağı gözlənilir.

Bildirilmişdir ki, bir çox rayonlarda məhsul bayramlarının, o cümlədən Göyçayda ənənəvi olaraq hər il Nar bayramının keçirilməsinin əsas məqsədi regionların təbliği, mədəni, sosial-iqtisadi potensialın nümayişi və turizmin inkişaf etdirilməsidir.

Mərasimdə qeyd olunmuşdur ki, nar bir meyvə olmaqla yanaşı, həm də cəmiyyətdə böyük mədəni hadisəyə çevrilmişdir. Narla bağlı bədii əsərlər, şeirlər yazılmış, bayatılar deyilmiş, bu ecazkar meyvənin şəninə mahnılar bəstələnmiş, festival təşkil edilmişdir. Narla bağlı xalqımızın zəngin adət-ənənələri vardır və onun beynəlxalq səviyyədə geniş təbliğinə ehtiyac duyulur.

Dünyanın müxtəlif ölkələrində meyvə-tərəvəz məhsulları ilə bağlı belə festivalların keçirildiyini qeyd edən natiqlər nar kimi dəyərli bir meyvənin şərəfinə Azərbaycanda beynəlxalq səviyyədə tədbirin keçirilməsini tədqirəlayiq hesab etmişlər. Vurğulanmışdır ki, ermənilər tarixən Azərbaycana və azərbaycanlılara məxsus olan bütün maddi mədəniyyət nümunələri kimi, nar meyvəsindən də təbliğat kimi istifadə edərək ölkələrini bu yolla tanıtmağa çalışırlar. Guya nar onların mədəniyyətində ən qədim bir meyvə olmuşdur. Göyçay Rayon İcra Hakimiyyəti ermənilərin bu yalanına cavab olaraq builki Nar bayramını daha çox xarici qonağın iştirakı ilə keçirməyə nail olmuş, təşkil edilən nar və nar məhsullarının sərgisi vasitəsilə dünyanın ən dadlı nar sortlarının məhz Göyçayda yetişdiyini sübut etmişdir.

Bildirilmişdir ki, xalqımızın öz qədim narçılıq ənənələrini təbliğ etməyə və min bir dərdin dərmanı olan bu meyvəni dünyada tanıtmağa mənəvi haqqı vardır. Azərbaycan Prezidenti İlham Əliyevin təşəbbüsü və xeyir-duası ilə keçirilən Nar bayramı ildən-ilə daha da genişlənərək beynəlxalq tədbirə çevrilir. Bu gün strateji məhsul sayılan narın və ondan hazırlanan məhsulların xarici ölkələrə ixrac edilməsi hamını sevindirir.

Tədbirdə məlumat verilmişdir ki, son 5 ildə Göyçayda nar bağlarının ümumi sahəsinin 3 dəfə artaraq 3200 hektara çatması, eləcə də fermerlərin ailə büdcəsinə hər il 8 milyon manata yaxın vəsaitin məhz nar məhsulunun satışından daxil olması bu sahənin perspektivliliyindən xəbər verir. Son vaxtlar iqtisadi cəhətdən gəlirli sahə olan narçılığın ölkədə, o cümlədən Göyçayda inkişafı geniş vüsət almışdır. Azərbaycan Elmi-Tədqiqat Bağçılıq və Subtropik Bitkilər İnstitutunun Göyçayın Şəhadət kəndindəki meyvəçilik dayaq məntəqəsində yeni nar sortları yetişdirilir və əkin üçün fermerlərə verilir.

Festivalda nara həsr olunmuş şeir və mahnılar səsləndirilmiş, bədii özfəaliyyət kollektivlərinin, aşıqların, meyxanaçıların, musiqi məktəbində təhsil alan şagirdlərin çıxışları alqışlarla qarşılanmışdır.

Qonaqlar nar sərgisində rayonun 32 kəndində bu sahə ilə məşğul olan insanların yetişdirdikləri müxtəlif sort nardan hazırlanmış məhsulların dadına baxmış, yerli müəssisələrdə istehsal edilmiş şirə və cövhərlərin keyfiyyəti ilə maraqlanmışlar. Heydər Əliyev parkında rəmzi olaraq nar ağacları əkilmiş, yeni ailə quran gənclərə, qızıl toylarını qeyd edən baba və nənəyə hədiyyələr verilmişdir.

Heydər Əliyev prospektində idmançıların, sehrbaz və kəndirbazların, mahnı-rəqs qruplarının çıxışları olmuş, müxtəlif mədəni-əyləncəli proqramlar təşkil edilmişdir. Tədbir iştirakçılarına bayram münasibətilə hazırlanmış milli xörəklər, şirniyyatlar da təqdim olunmuşdur.

Göyçay narını dünyaya tanıtmaq üçün budəfəki bayram bir çox yenilikləri ilə də yadda qalmışdır. Builki Nar bayramının xüsusi özəlliyindən biri də orada ilk dəfə olaraq İtaliyanın milli yeməyi sayılan pizza müsabiqəsinin keçirilməsi olmuşdur. Bayram tədbirində Bakının tanınmış mütəxəssisləri tərəfindən xüsusi hazırlanmış nar reseptindən pizzalar qonaqlara təqdim olunmuşdur.

Mərasimdə ən böyük pizza da nümayiş olunmuşdur. Bundan əlavə, İtaliyanın Patisseri şirniyyat şəbəkəsinin sahibi Gianni de Carlonun xüsusi olaraq Nar bayramı üçün hazırladığı nar şirəsi qatılmış dadlı və ləzzətli piroq və tortlar mərasim iştirakçılarının marağına səbəb olmuşdur.

Sonra folklor qrupları çıxış etmiş, məktəblilərin əl işlərindən ibarət sərgiyə baxış keçirilmişdir.

Tədbirdə qonaqlar əl ilə yüksək ustalıqla hazırlanmış nar şirəsinin, nar şərabının, nardançanın, gilələnmiş narın dadına baxmışlar. Nar məhsullarının istehsalı ilə məşğul olan müəssisələrin məhsullarından ibarət yarmarka, müxtəlif sort narlardan hazırlanan məhsulların sərgisi, eləcə də nar ilə bağlı müsabiqələr, oyunlar təşkil edilmişdir. Həkim-terapevt qonaqlara narın şirəsindən və qabığından 20-dək xəstəliyin müalicəsində istifadə olunması barədə geniş məlumat vermişdir.

Sonra şadlıq sarayında yerli və xarici qonaqların şərəfinə ziyafət verilmişdir.

Bayram tədbiri Azərbaycanın 30-a yaxın tanınmış incəsənət ustasının, istedadlı müğənnilərin iştirak etdikləri konsert proqramı ilə davam etmişdir.

Tanınmış şoumen Murad Dadaşovun aparıcılığı ilə davam edən möhtəşəm konsertdə səhnəyə hamının səbirsizliklə gözlədiyi Türkiyənin tanınmış müğənnisi Doğuş çıxmışdır. O öz möhtəşəm ifası ilə Nar bayramının iştirakçılarını sevindirmişdir.

Konsert atəşfəşanlıqla başa çatmışdır.

Azərbaycan.-2012.- 4 noyabr.- S.3.