Neftçi məişəti

Neftçilər yerin təkindən və dənizin dibindən "qara qızıl" adlanan sərvəti üzə çıxaran fədakar insanlardır. Onlar ölkəmizin qüdrətini artırmaq, dünyada Azərbaycanın üzünü ağ etmək üçün var güc və bacarıqla çalışırlar. Bu hünərvər peşənin sahibləri həmişə hörmət-izzət yiyəsi olublar. Son illərdə onlara qayğı və diqqət daha da artırılıb. İnsan amili önə çəkilərək neftçilərin sağlamlığı, təhlükəsizliyi üçün ardıcıl tədbirlər görülür.

Sadə sözlərlə desək, neftçilər çətin, bəzən hətta ekstremal şəraitdə işləyirlər. Yayın qızmarı, yaxud qışın şaxtası, sıx buruqlar, yaxud açıq dəniz və ən mürəkkəb avadanlıqlar... Neftçi daim bunların əhatəsindədir. Odur ki, hər bir neftçinin səhhəti qorunmalı, o, evindən sağ-salamat çıxdığı kimi sağ-salamat da ailəsinin, övladlarının yanına qayıtmalıdır. Elə buna görə də neftçilərin səhhətinə qayğı göstərilməsi, onlar üçün təhlükəsiz əmək və rahat məişət şəraiti yaradılması, istirahətlərinin yaxşı təşkil edilməsi xüsusi önəm daşıyır. İstər quruda çalışan, istərsə də iş yeri dənizin qoynundakı estakadalarda, özüllərdə olan neftçilərə hərtərəfli qayğı göstərilir.

"Abşeronneft" Neft və Qazçıxarma İdarəsində bunun əyani şahidi olduq. Burada "Azərbaycan Respublikası Dövlət Neft Şirkətinin 2007-2010-cu illər üçün sosial-iqtisadi inkişaf proqramı"na müvafiq olaraq, 50 yerlik yeməkxana istifadəyə verilib və müasir avadanlıqla təchiz edilib. Şirkətin 2011-2015-ci illəri əhatə edən həmin məqsədli proqramına uyğun olaraq, hazırlanmış plan isə idarənin mədənləri ərazisində 100 nəfərlik yeməkxana binasının inşasını nəzərdə tutub.

İndi neftçinin bağlama düzəldib evindən işə azuqə gətirdiyi vaxtlar artıq arxada qalmaqdadır. Lakin dəniz obyektlərində, adalarda elə yerlər var ki, orada işləyənlər birbaşa yeməkxanaya gələ bilmirlər. Yaxud günlərlə əmək növbəsində olan neftçi könlünə düşən hansısa bir yeməyi özü hazırlamaq istəyir.

Qeyd edək ki, "Abşeronneft"in bir sıra sex və sahələri Pirallahı adasında yerləşir. İdarənin istismar etdiyi yataqların bir hissəsi isə dənizdədir. Odur ki, günlərlə Xəzərin qoynunda, özüllərdə qalan işçilər də az deyil.

Neftçinin məişəti təşkil olunarkən bütün bunlar nəzərə alınır. Məsələn, elə sözügedən "Abşeronneft"də dəniz özüllərində çalışanlar standart elektrik plitələri ilə təmin olunub. Soyuqdan qorunmaq üçün isə onlara qızdırıcı radiatorlar verilib. Bir çox yerlərdə soyuducular da var.

Neftçilərə iş yerlərində qablaşdırılmış saf su paylanır. Sudan söz düşmüşkən, son bir-iki ildə "ƏKS-OSMOS" qurğuları istər "Abşeronneft"in əməkçilərinin, istərsə də bütövlükdə ada sakinlərinin köməyinə gəlib. Bu qurğuların təmizləyib saf hala saldığı dəniz suyu məişətdə geniş istifadə olunur. Bu su içmək üçün də tam yararlıdır. Zərərli iş sahələrində çalışanlara isə üstəlik hər gün süd də verilir.

Neftçinin səhhətində bir problem yaranarsa, o, dərhal həkim təyinatı ilə müalicəyə göndərilir. Yay aylarında idarə bir çox əməkçilərinə Nabran, Balakən, Qusar bölgələrindəki istirahət zonalarına yollayışlar verir və əlbəttə ki, onların dəyərini ödəyir.

Neft Azərbaycan xalqının milli sərvətidir. O, ölkənin inkişafında, tərəqqisində mühüm rol oynayır. Müstəqil respublikamızda bütün sərvətlər insanların rifahına xidmət edir. Elə bu baxımdan da dövlətimiz bu sərvətləri üzə çıxaran, o cümlədən neft hasil edən insanların sağlamlığına böyük dəyər verir.

Flora SADIQLI

Azərbaycan.-2012.- 4 noyabr.- S.4.