Dahi Nizami Gəncəvinin orijinal əlyazmalarından ibarət sərgi açılmışdır

Noyabrın 3-də Nizami Gəncəvi Beynəlxalq Mərkəzi və AMEA-nın Milli Azərbaycan Tarixi Muzeyinin birgə təşkilatçılığı ilə bu muzeydə dahi Nizami Gəncəvinin və Şərqin inciləri sayılan digər əsərlərin orijinal əlyazmalarından ibarət sərgi açılmışdır.

AzərTAc xəbər verir ki, Nizami Gəncəvinin 870 illiyi ilə bağlı keçirilən tədbirlər çərçivəsində təşkil olunan sərgidə 40-dan çox ölkədən toplanılmış misilsiz əlyazmalar ilk dəfə nümayiş etdirilmişdir. Sərgidə, həmçinin XII əsrə aid "İncil", müxtəlif dövrlər və mədəniyyətlərin "Qurani-kərim"i, dahi Nizaminin "Xəmsə"sinə Hindistan, Misir, İran, Mərkəzi Asiya xalqlarının yazdıqları əlyazmalar, qızıl işləməli illüstrasiyalar nümayiş olunmuşdur.

Sərginin açılışında ABŞ Dövlət Departamentinin qadın məsələləri üzrə əlaqələndiricisi xanım Melanne Verveyer, ABŞ Dövlət Departamentinin beynəlxalq kommunikasiya və informasiya siyasəti üzrə əlaqələndiricisi Filip Verveyer, ABŞ, Misir, Qırğız Respublikasının Azərbaycandakı səfirləri və bir sıra dövlət qurumlarının nümayəndələri iştirak etmişlər.

Qonaqlara əlyazmalar barəsində ətraflı məlumat verilmişdir.

Nizami Gəncəvi Beynəlxalq Mərkəzinin qısa müddətdə gördüyü işlərlə bağlı videofilm nümayiş etdirilmişdir.

Mərkəzin himayədarlar şurasının xüsusi qərarı ilə xanım Melanne Verveyer dünyada qadın problemlərinin həllində, yoxsul ölkələrdə gənc qızların maarifləndirilməsi istiqamətində fəaliyyətinə görə Nizami Gəncəvi Beynəlxalq Mükafatı ilə təltif olunmuşdur.

Xanım Melanne Verveyer onun fəaliyyətinə belə böyük dəyər verildiyinə görə minnətdarlığını bildirmiş və Nizami Gəncəvinin əlyazmaları ilə tanışlığın onun üçün böyük şərəf olduğunu qeyd etmişdir.

Azərbaycan.-2012.- 4 noyabr.- S.5.