Nazir Əli Abbasov: Azərbaycan internetin inkişafında fəal iştirak edir

Azərbaycan internetin inkişafında fəal iştirak edir, respublikada internetdən istifadə sərbəstdir, "Facebook" sosial şəbəkəsinin istifadəçilərinin sayı isə bir milyon nəfərə yaxınlaşır.

Azərbaycan rabitə və informasiya texnologiyaları naziri Əli Abbasov bu sözləri Bakıda keçirilən İnternet idarəçiliyi problemləri üzrə forum (İGF) çərçivəsində nazirlərin "Sıx əlaqəli dünyada çağırışlar" mövzusunda görüşündə söyləmişdir.

Nazir vurğulamışdır ki, ölkəmizdə internet xidmətlərinin inkişafına xüsusi diqqət yetirilir. Ə.Abbasovun sözlərinə görə, internet hər kəs üçün əlyetərli, ondan istifadə sərbəst olmalıdır. Ə.Abbasov vurğulamışdır: "Bu baxımdan, Azərbaycanda internet dövlətin nəzarəti və idarəçiliyi altında deyildir, o, ölkənin hər bir vətəndaşı üçün tamamilə əlyetərlidir".

Müasir dünyanın fiziki və virtual hissələrə bölündüyünü qeyd edən nazir virtual məkanda da təhlükəsizliyin təmin edilməsinin vacibliyini vurğulamışdır. Onun sözlərinə görə, hazırda dünya ölkələri qarşısında duran ən mühüm vəzifələrdən biri məhz informasiya təhlükəsizliyi, virtual təhdidlərdən səmərəli müdafiə məsələsidir.

Nazirlərin görüşündə BMT Baş katibinin müavini, iqtisadi və sosial əlaqələr departamentinin rəhbəri Vu Honqbo, BMT Beynəlxalq Telekommunikasiya İttifaqının baş katibi Hamadun Ture, UNESCO-nun baş direktorunun kommunikasiya və informasiya məsələləri üzrə müavini Yanis Karklins, habelə Əfqanıstan, Albaniya, Misir, Sloveniya, Tunis, Rusiya, Ukrayna və digər ölkələrin nümayəndələri çıxış etmişlər.

Azərbaycan.-2012.- 6 noyabr.- S.2.