Vokalçıların Bülbül adına VI Beynəlxalq müsabiqəsi başa çatmışdır

Noyabrın 4-də Müslüm Maqomayev adına Azərbaycan Dövlət Filarmoniyasında vokalçıların Bülbül adına VI Beynəlxalq müsabiqəsinə yekun vurulmuşdur.

AzərTAc xəbər verir ki, tədbiri açan mədəniyyət və turizm nazirinin müavini, müsabiqənin təşkilat komitəsinin sədr müavini Ədalət Vəliyev son vaxtlar Azərbaycanın möhtəşəm mədəniyyət tədbirlərinə uğurla ev sahibliyi etdiyini bildirmişdir. O, yaxın günlərdə Bülbülün abidəsinin açılışı mərasimində Azərbaycan Prezidenti İlham Əliyevin şəxsən iştirak etdiyini vurğulayaraq, bunun xalqımızın milli mədəniyyətinə Prezident tərəfindən göstərilən böyük diqqət və qayğının daha bir bariz nümunəsi olduğunu bildirmişdir.

Ə.Vəliyev artıq ənənə halını almış müsabiqənin bu il 15 yaşına qədəm qoyduğunu, müsabiqənin həsr edildiyi Azərbaycanın böyük müğənnisi, milli vokal sənətinin banisi, SSRİ xalq artisti Bülbülün 115 illik yubileyinin qeyd olunduğunu vurğulamışdır.

O, müsabiqənin gənc istedadların üzə çıxmasına imkan yaratdığını, Bülbülün sənətinin hər zaman yaşayacağını bildirmiş və qaliblərə uğurlar arzulamışdır.

Sonra Bülbülün ifasında "Ölkəm" mahnısı, "Koroğlu" operasından Koroğlunun ariyası səslənmiş, videokadrlar nümayiş etdirilmiş, musiqili ədəbi-kompozisiya təqdim olunmuşdur.

Səhnəyə münsiflər heyəti və qaliblər dəvət olunmuşdur.

Bülbül Fondunun prezidenti, Azərbaycanın Rusiya Federasiyasındakı səfiri, xalq artisti, professor, müsabiqənin təşkilat komitəsinin sədr müavini Polad Bülbüloğlu bildirmişdir ki, vokalçıların Bülbül adına I Beynəlxalq müsabiqəsi görkəmli müğənninin anadan olmasının 100 illiyi ərəfəsində - 1997-ci ildə mədəniyyətimizin böyük təəssübkeşi, xalqımızın ümummilli lideri Heydər Əliyevin müvafiq sərəncamı ilə keçirilmiş və o vaxtdan bu müsabiqə ənənə halını almışdır.

P.Bülbüloğlu əvvəlki müsabiqələrdən fərqli olaraq budəfəki müsabiqə çərçivəsində ilk dəfə olaraq Vokalçıların yarmarkasının təşkil olunduğunu, müsabiqənin coğrafiyasının daha da genişləndiyini diqqətə çatdırmışdır.

Beynəlxalq münsiflər heyətinin sədri, Rusiya Federasiyasının xalq artisti, professor Sergey Leyferkus müsabiqənin təşkil olunmasını yüksək qiymətləndirmişdir. O, müsabiqənin əhəmiyyətini qeyd edərək, qaliblərin gələcəkdə böyük konsert salonlarında öz ifaları ilə insanlara sevinc bəxş edəcəklərinə inandığını bildirmişdir.

Vurğulamışdır ki, böyük musiqi tarixi yaratmış və bütün istedadını və zəhmətini həm Azərbaycanın, həm də dünya mədəniyyətinin inkişafına həsr etmiş Bülbülə həsr edilmiş müsabiqə nadir mədəniyyət hadisəsi hesab olunmalıdır. O, qalibləri musiqi bayramı münasibətilə təbrik edərək uğurlar arzulamışdır.

Müsabiqənin Qran-pri mükafatına Dəniz Yetim (Türkiyə) layiq görülmüşdür. Birinci yerə Yusif Eyvazov (Azərbaycan), ikinci yerə İrina Bojenko (Rusiya), üçüncü yerə Olqa Kulçinskaya (Ukrayna), dördüncü yerə Darya Knyazeva (Ukrayna) və Valentin Anekin (Rusiya) layiq görülmüşlər. Həmçinin müsabiqə iştirakçıları müxtəlif nominasiyalar üzrə diplom və prizlə təltif olunmuşlar.

Tədbir laureatların və Üzeyir Hacıbəyli adına Azərbaycan Dövlət Simfonik Orkestrinin birgə konserti ilə davam etmişdir.

Azərbaycan.-2012.- 6 noyabr.- S.7.