Azərbaycan Respublikası Prokurorluğunun Beynəlxalq Prokurorlar Assosiasiyası ilə əlaqələri uğurla davam etdirilir

Oktyabrın 27-də Tailand Krallığının Patayya şəhərində Beynəlxalq Prokurorlar Assosiasiyasının İcraiyyə Komitəsinin növbəti iclası keçirilmişdir.

Baş Prokurorluğun mətbuat xidmətindən bildirmişlər ki, tədbirdə Baş Katibliyin və assosiasiyanın fəaliyyətinə dair hesabat, təşkilati məsələlər, 2011-ci ilin maliyyə hesabatı, növbəti ilin büdcəsi və s. məsələlər müzakirə edilmişdir.

Tədbirdə ölkəmizi Beynəlxalq Prokurorlar Assosiasiyasının İcraiyyə Komitəsinin üzvü, Azərbaycan Respublikasının Baş Prokuroru yanında Korrupsiyaya Qarşı Mübarizə İdarəsinin rəisi Kamran Əliyevin rəhbərliyi ilə nümayəndə heyəti təmsil etmişdir.

Azərbaycan nümayəndə heyəti oktyabrın 29-dan noyabrın 1-dək Banqkok şəhərində Beynəlxalq Prokurorlar Assosiasiyasının ümumi yığıncağında və 17-ci illik konfransında iştirak etmişdir. Dünyanın 30-dan çox ölkəsindən və bir sıra nüfuzlu beynəlxalq təşkilatdan 400-dək nümayəndənin qatıldığı illik konfrans "Transmilli mütəşəkkil cinayətkarlıq: onun müxtəlif sahələrdə təzahürü və prokurorun rolu" mövzusuna həsr olunmuşdur.

Plenar iclas və seminarlarda mütəşəkkil cinayətkarlıqla mübarizənin aktual problemləri, müharibə, korrupsiya, maliyyə, terrorizm cinayətlərinin qarşılıqlı əlaqəsi, cinayət yolu ilə əldə edilmiş vəsaitlərin leqallaşdırılması, ekologiya cinayətləri, kibercinayətkarlıq mövzularında məruzələr dinlənilmişdir.

Azərbaycan nümayəndə heyətinin üzvləri - Baş Prokuror yanında Korrupsiyaya Qarşı Mübarizə İdarəsinin şöbə rəisi Vüqar Əliyev və Baş Prokurorluğun Beynəlxalq Əlaqələr İdarəsinin şöbə rəisi İsmayıl Qayıbov müzakirələrdə fəal iştirak edərək mütəşəkkil cinayətkarlığın müxtəlif təzahürləri ilə mübarizə sahəsində ölkə qanunvericiliyi, mövcud təcrübə, mübarizə üsullarına dair öz mülahizələrini, təcrübələrini bölüşmüşlər.

Beynəlxalq Prokurorlar Assosiasiyasının ümumi yığıncağında bir sıra təşkilati məsələlərə də baxılmış, xüsusi xidmətlərinə görə fərqlənmiş üzvlərə mükafatlar təqdim edilmişdir.

Qurumun növbəti illik yığıncağının 2013-cü il sentyabrın 8-dən 13-dək Moskvada keçirilməsi qərara alınmışdır.

Nümayəndə heyətinin üzvləri Tailand Krallığı, Rusiya Federasiyası, Ukrayna və digər ölkələrin prokurorluq əməkdaşları ilə keçirdiyi görüşlərdə Azərbaycan Respublikasının Prezidenti İlham Əliyevin rəhbərliyi ilə ölkəmizin dinamik inkişafı, həyata keçirilmiş məhkəmə-hüquq islahatlarının müsbət nəticələri, korrupsiya ilə mübarizə sahəsində görülmüş konkret tədbirlər barədə ətraflı məlumat vermiş, qarşılıqlı və səmərəli əməkdaşlığa dair fikir mübadiləsi aparmışlar.

Tədbirin sonunda ölkəmizdə korrupsiyaya qarşı mübarizə sahəsində fəaliyyəti əks etdirən kitabçalar, həmçinin Azərbaycan prokurorluğu tərəfindən rus dilində hazırlanmış Beynəlxalq Prokurorlar Assosiasiyasının fəaliyyət prinsiplərini özündə cəmləşdirən bukletlər konfrans iştirakçılarına təqdim edilmişdir.

AzərTAc

Azərbaycan.-2012.-7 noyabr.- S.3.