Sınaq fəslinə hərtərəfli hazırlıq görülür

Gədəbəyin yayı nə qədər xoş olsa da, payızı-qışı bir o qədər sərt keçir. Ona görə də icra orqanları qışın sərt sınağına hərtərəfli hazırlıq görürlər.

Bu barədə doqquz aylığın yekunları müzakirə olunarkən geniş söhbət getdi. İcra hakimiyyətinin başçısı Ramiz Yediyarov doqquz ayda görülən işlər barədə hesabat məruzəsi ilə çıxış etdi. Nazirlər Kabinetinin yığıncağının yekunlarına və həmin toplantıda Prezident İlham Əliyevin çıxışlarından irəli gələn tövsiyə və tapşırıqlara uyğun rayonda görülən işlər ətraflı təhlil olundu. Sonra ayrı-ayrı idarə və müəssisə rəhbərlərinin məlumatları dinlənildi. Qeyd edildi ki, Gədəbəy rayonunda regionların sosial-iqtisadi inkişafı Dövlət Proqramında nəzərdə tutulan tədbirlər uğurla yerinə yetirilir. Doqquz ay ərzində ümumi məhsul istehsalının həcmi 134,5 milyon manat olmuşdur ki, bu da ötən ilin müvafiq dövrünə nisbətən 24,6 faiz çoxdur.

Gədəbəyin iqtisadiyyatı əsasən kənd təsərrüfatı ilə bağlıdır. Kartofçuluq, taxılçılıq və maldarlıq burada aparıcı yerləri tutur. Hesabat dövründə ötən ilin müvafiq dövrü ilə müqayisədə 21,1 faiz çox kənd təsərrüfatı məhsulları istehsal edilmişdir. Bunun da böyük əksəriyyəti özəl bölmənin payına düşür.

İndi də rayon ən çox öz yüksək keyfiyyətli kartofu ilə tanınır. Cari il üçün 13 min hektar sahədə kartof əkilmiş, ilkin hesablamalara görə, məhsuldarlığın təqribən iki yüz min tona çatması gözlənilir. Rayonda mal-qaranın sayı getdikcə çoxalır. Ötən ilin müvafiq dövrü ilə müqayisədə 1293 baş qaramal, 375 min baş qoyun və quzu artmışdır. Bu müddət ərzində 93 min sentner ət, 50 min sentner süd, 9 min sentner yun və digər məhsullar istehsal olunmuşdur.

Rayon üzrə adambaşına düşən məhsulların miqdarı və pul gəliri xeyli çoxalmışdır. Yol, su, işıq və qazla bağlı problemlərin vaxtında həlli çox vacib məsələlərdəndir. Toplantıda bu barədə ətraflı danışıldı.

Qeyd edildi ki, hesabat dövrü ərzində rayonda qaz təminatı şəbəkəsi xeyli genişlənmiş, yüzlərlə abonentin mənzilinə təbii qaz verilməsi üçün tədbirlər görülmüşdür. Məsələn Söyüdlü kəndində 950 yaşayış evinin qazlaşdırılması üçün 9,5 min metr müxtəlif diametrli daşıyıcı və paylayıcı qaz xətləri istifadəyə verilmiş, Moruqlu, Çanaqlı, Nərimankənd, Qoşabulaq, Samanlıq, Pərizamanlı və Totuqlu kəndlərində üç min metr yeraltı polietilen daşıyıcı qaz xətləri çəkilmişdir.

Dövlət başçısı İlham Əliyevin Gədəbəyə səfəri zamanı sərhəd kəndlərinin qazlaşdırılması ilə bağlı verdiyi tapşırıq uğurla yerinə yetirilir. Gədəbəy-Novosaratovka-Şınıx magistral kəmərinin inşası başa çatmışdır. Sərhəd bölgəsində yerləşən Şınıx, Kollu, Hüseynqulular, Gərməşöylü, Təkyemişan və Rəhimli kəndlərinə daşıyıcı və paylayıcı qaz xətləri çəkilmişdir. Miskinli və Çalburun kəndlərinin qazlaşdırılması işləri davam edir.

Əhalinin elektrik enerjisi ilə fasiləsiz təmini sahəsində də sistemli surətdə xeyli işlər görülmüşdür. Köhnə xətlər təzələnmiş, yarımstansiyalar, transformatorlar təmir edilmiş, yararsız halda olan dayaqlar təzələnmişdir.

Rabitə xidmətinin müasir tələblər səviyyəsində qurulması üçün bütün elektron ATS-lərdə profilaktik işlər aparılmış, Zəhmətkənd-Qoşabulaq kəndləri arası 22 kilometr məsafədə FO-12 optik kabel çəkilərək Beynəlxalq "TAE" xəttinə qoşulmuşdur. Bundan əlavə, Arıqdam və Söyüdlü kənd elektron ATS-lərinə altı kilometrlik məsafədən FO-12 kabeli çəkilmiş, Hacılar, İsalı və Göyəlli kənd ATS-lərinə FO-12 xəttinin çəkilməsi işinə başlanılmışdır. Slavyanka, Novosaratovka və Zəhmətkənddəki elektron ATS-lərinə genişzolaqlı internet avadanlığı quraşdırılmışdır. Bununla da mərkəzi elektron ATS-də sürətli internet istifadəçilərinin sayı 237-yə çatmışdır.

Gədəbəyin kəndlərində evlər bir-birindən xeyli aralıdır. Yollar dərələrdən, təpələrdən keçir. Buna görə də rayonda yol təsərrüfatının nizamlanması üçün sistemli işlər görülür. 59 min nəfər əhalinin yaşadığı onlarca yaşayış məntəqəsini birləşdirən Gədəbəy-Novosaratovka-Qaravəlilər avtomobil yolunun tikintisi məqsədilə dövlət başçısı İlham Əliyevin sərəncamı ilə 3 milyon manat vəsait ayrılmışdır. Toplantıda minnətdarlıqla qeyd olundu ki, sərhəd bölgəsində yerləşən Gədəbəy üçün bu, çox böyük töhfədir. Dövlət başçısının tapşırığına əsasən çəkilən bu mühüm strateji yolun yüksək keyfiyyətli icrası üçün konkret tədbirlər görülür.

Hesabat dövrü ərzində Fındıqlı körpüsü bərpa edilmiş, Gərgər-Şəkərbəy yolu əsaslı təmir olunmuş, bir sıra yerlərdə bərpa işləri aparılmışdır. Arıqdam, Söyüdlü, Soyuqbulaq yolundakı körpünün təmirində son tamamlama işləri gedir. Bununla yanaşı, dağ şəraitinin mürəkkəbliyi nəzərə alınaraq hər ehtimala qarşı 1800 kubmetr qum, 20 ton duz tədarük edilmiş, mütəxəssislərdən ibarət operativ briqadalar yaradılmışdır.

Qış mövsümünə hazırlıqla əlaqədar olaraq rayonun təhsil, səhiyyə və mədəniyyət ocaqlarında, habelə qəza vəziyyətində olan yaşayış evlərində genişmiqyaslı abadlıq və təmir işləri görülmüşdür. Dövlət proqramına uyğun olaraq Qoşabulaq, Slavyanka, Novosaratovka kənd məktəbləri üçün münasib binalar tikilmiş, Samanlıq və Arıqdam kəndlərində təhsil ocaqları üçün təzə binaların inşasına hazırlıq işləri görülür. Yeni inşa olunan məktəblərin bir hissəsi müasir istilik sistemi ilə qızdırılır. Belə sistemlərin olmadığı yerlərdə isə xeyli miqdarda odun tədarük edilmişdir.

Toplantıda o da qeyd olundu ki, şəhərin girişində tikinti materiallarının satışı ilə məşğul olan yöndəmsiz ticarət obyektləri həmin ərazidən çıxarılmış, onların bir yerdə fəaliyyət göstərmələri üçün "inşaat bazarı" tikilmişdir. Bundan əlavə, şəhər ərazisində mal-qara bazarının, Arıqdam kəndində təzə yarmarkanın təşkilinə başlanılmışdır. Şəhərin mərkəzində Zərifə Əliyeva küçəsinə asfalt salınmışdır. Heydər Əliyev prospektinə qədər olan sahədə genişləndirmə işləri aparılmış, mədəniyyət və turizm şöbəsinin yerləşdiyi binanın fasadı yenidən qurulur. 20 Yanvar küçəsi əsaslı təmir olunmuş, M.Abbasov, İ.Aznaurov, M.Rəsulzadə, A.Məmmədov və C.Ağayev küçələrinə asfalt beton salınmışdır.

Bunlarla yanaşı, rayonda müasir quruluşlu binaların inşasına da xüsusi diqqət yetirilir. Aşıq musiqi məktəbinin, rayon məhkəməsinin, habelə statistika idarəsinin inzibati binalarında son tamamlama işləri görülür.

Bir sözlə, dağlar diyarı Gədəbəy əsl tikinti meydanına bənzəyir. Havaların xoş keçən hər günündən səmərəli istifadə olunur. Cari ildə nəzərdə tutulan bütün problemlərin uğurlu həlli üçün konkret işlər görülür. Hamı çalışır ki, soyuq qış aylarında məhsul bol, evlər isti, yollar rahat olsun.

Əhməd İSAYEV

Azərbaycan.-2012.-7 noyabr.- S.6.