Qədimliyin və müasirliyin qovuşduğu diyar

İlin elə fəsli olmaz ki, Şəkidə turistlə rastlaşmayasan. Azərbaycana gələn qonaqlar böyük həvəslə Şəkini görməyə can atır, qısa müddətə də olsa bu qədim və gözəl şəhəri görmək, onun küçələrini dolaşmaq, tarixi memarlıq abidələri ilə, həmçinin duzlu-məzəli söhbətləri, səmimiyyəti və mehribanlıqları ilə ilk ünsiyyətdəncə insanın qəlbində xoş duyğular oyadan sakinlərlə daha yaxından tanış olmaq istəyirlər.

Mübaliğəsiz demək olar ki, Şəki bu gün Azərbaycanda turizmin yüksək səviyyədə inkişaf etdiyi bölgələrdən biridir. Burada turizm infrastrukturunun yaradılması istiqamətində əhəmiyyətli işlər görülmüş, müasir istirahət mərkəzləri, yeni hotellər tikilib istifadəyə verilmişdir. Təsadüfi deyil ki, Prezident İlham Əliyev də Şəkinin potensialını yüksək qiymətləndirərək demişdir: "Şəki turizm mərkəzidir. Şəki nəinki Azərbaycanın, bölgənin və dünyanın turizm mərkəzinə çevrilməlidir".

Hazırda Şəkidə görülən abadlıq, tikinti-quruculuq və yenidənqurma işləri Şəki Şəhər İcra Hakimiyyəti və Arxitektura Şəhərsalma Komitəsi ilə birgə hazırlanmış "Şəki şəhərinin Baş Planı"na uyğun aparılır. Şəhərin milli memarlıq üslubunun qorunub saxlanmasına yüksək səviyyədə diqqət yetirilir. Ümumilikdə isə şəhər tanınmaz dərəcədə dəyişib, yeni görkəm alıb.

Bu il sentyabr ayının 9-da Şəkiyə səfəri çərçivəsində Heydər Əliyev Mərkəzinin təməlqoyma, 423 məcburi köçkün ailəsi üçün salınmış yeni qəsəbənin, Sahibkarlığa Kömək Milli Fondunun güzəştli krediti hesabına inşa olunmuş taxıl anbarı və dəyirman kompleksinin, dördulduzlu "Shaki Palace" hotelinin açılış mərasimlərində iştirak edib. M.F.Axundzadənin adını daşıyan mədəniyyət və istirahət parkındakı yenidənqurma işləri ilə tanış olan Prezident İlham Əliyev öz təəssüratları barədə məcburi köçkünlərlə və ictimaiyyətin nümayəndələri ilə görüşündə belə demişdir: "Şəki şəhərinin və rayonunun inkişafı ilə bağlı çox böyük işlər görülür. Mən dəfələrlə Şəkidə olmuşam, keçən il, bu il, ondan əvvəlki dövrdə. Böyük quruculuq, abadlıq işləri görülür. Bu gün Heydər Əliyev Mərkəzinin təməl daşını qoyduq. Şəkidə mədəniyyət, səhiyyə, təhsil sahəsində böyük işlər görülür, infrastruktur layihələri icra edilir. Şəki böyük mədəniyyət mərkəzidir, zəngin tarixə, mədəniyyətə malik olan bir diyardır. Rayonun və şəhərin kommunal infrastrukturunun yeniləşdirilməsi məsələləri də öz həllini tapır. Bir sözlə, Şəki çox dinamik inkişaf edir. Mən keçən dəfə Şəkidə ötən ilin payızında olmuşam. Heç bir il keçməyib, amma gördüyüm dəyişikliklər məni çox sevindirir".

Qeyd etmək lazımdır ki, sentyabr ayı şəkililər üçün dövlət başçısının səfərindən başqa, Mirzə Fətəli Axundzadənin 200 və Şəkinin 2700 illik yubileylərinə həsr olunmuş "Şəhər günü" bayram tədbirləri ilə də yaddaqalan olmuşdur. 2012-ci ilin TÜRKSOY tərəfindən "M.F.Axundzadə ili" elan olunması ilə əlaqədar yubiley tədbirlərində TÜRKSOY-un üzvü olan ölkələrdən, o cümlədən Türkiyədən, Qazaxıstandan, Başkortostandan da qonaqlar iştirak etmişlər. Həmin ərəfədə ölkə Prezidentinin tapşırığı əsasında inşa olunmuş 600 yerlik "Yay teatrı"nın da açılışı olmuşdur.

Şübhəsiz ki, xalqın zəngin mədəni irsinin qorunub saxlanmasında və təbliğ olunmasında dövlət başçısı İlham Əliyevin diqqət və qayğısı əvəzsizdir. Bu barədə minnətdarlıqla danışan Şəki fizika-riyaziyyat və humanitar təmayüllü liseyin tarix müəllimi, respublikanın əməkdar müəllimi Bəşarət Yusifov, Şəki Mərkəzi Rayon Xəstəxanasının həkimi Nəzakət Paşayeva, Şəki Musiqi Kollecinin müəllimi, tələbə gənclər təşkilatının sədri Elnarə Hümmətova və digər şəhər sakinləri xüsusi vurğuladılar ki, Prezident İlham Əliyevin bölgələrə səfəri, görülən işlərlə yerində tanış olması, insanlarla birbaşa ünsiyyəti, fikir və təklifləri dinləməsi, gərəkli tövsiyə və tapşırıqlarını verməsi, ən nəhayət, həyata keçirilən layihələrin daha əhatəli olması üçün əlavə vəsait ayrılması barədə müvafiq sərəncamlar imzalaması olduqca təqdirəlayiqdir. Bütün bunlar isə bölgələrin kompleks inkişafına əsaslı zəmin yaradır.

Yüksək dövlət qayğısının nəticəsidir ki, 2012-ci ilin doqquz ayı ərzində Şəki rayonunda hamısı daimi olmaqla 967 yeni iş yeri açılıb. Rayonda gedən abadlıq-quruculuq işlərində isə yüzlərlə insan mövsümi olaraq çalışıb. Onu da qeyd edək ki, 2012-ci ilin doqquz ayında əsas kapitala yönəldilmiş investisiyanın 88,8 faizi tikinti-quraşdırma işlərinə sərf edilib. Bu isə əvvəlki ilin müvafiq dövrü ilə müqayisədə 59 faiz çoxdur.

Şəki ölkənin iri kənd təsərrüfatı rayonlarından sayılır. Təsadüfi deyil ki, rayon bu il də taxıl istehsalına görə ölkədə ən yüksək göstəriciyə nail oldu. Bu baxımdan sentyabrın 9-da dövlət başçısının açılışında iştirak etdiyi taxıl anbarı və dəyirman kompleksi əsas ərzaq məhsullarına olan tələbatın təmin edilməsi istiqamətində mühüm rol oynayacaq. Regionların sosial-iqtisadi inkişafına dair Dövlət Proqramına uyğun olaraq Şəkinin Göybulaq kəndində üç hektar ərazidə taxıl məhsullarının tədarükü, saxlanması və emalı kompleksi də inşa edilib. Müasir texnologiya əsasında qurulmuş bu kompleks Şəki və ətraf rayonlarda fəaliyyət göstərən fermerlərin istehsal etdiyi taxıl məhsullarının uzun müddət itkisiz saxlanmasına imkan verəcək. Rayonda heyvandarlığın inkişafı, heyvandarlıq məhsulları istehsalının həcminin artırılması həmişə diqqətdə saxlanılır.

Ötən müddət ərzində təhsil sahəsində də xeyli iş görülüb. Şəki şəhər 5 nömrəli tam orta məktəb üçün 320 yerlik yeni tədris korpusunun, Şorsu kəndində 360 yerlik, Çələbi Xan qəsəbəsində 180 yerlik yeni məktəb binalarının tikintisi başa çatdırılıb. Bunlardan əlavə, Şəki Şəhər Təhsil Şöbəsinin yeni inzibati binasının, Əliyar kəndində 80 yerlik ümumi orta məktəbin, həmçinin şəhər 12, 14 və 17 nömrəli məktəblər üçün yeni binaların tikintisi davam edir. Bəzi məktəblərdə isə əsaslı təmir işləri görülür. Yaradılan şərait təhsilin keyfiyyətinə də təsir edir. Təsadüfi deyil ki, 2012-ci ildə Şəkinin ümumtəhsil məktəblərini bitirmiş məzunlardan 1166 nəfəri ali məktəbə daxil olmaq üçün sənəd vermiş, onlardan 587 nəfəri tələbə adını qazanmışdır. Uğur qazananlardan 112 nəfəri 500-dən, 35 nəfəri isə 600-dən yuxarı bal toplamışdır. Şəki Şəhər İcra Hakimiyyətinin başçısı Elxan Usubov deyir ki, hələ görüləsi işlər çoxdur. Yol təsərrüfatı və nəqliyyat infrastrukturunun möhkəmləndirilməsi, elektrik enerjisi, istilik və qaz təchizatının, rabitə xidmətinin yaxşılaşdırılması, su təchizatının və kanalizasiya sisteminin yenidən qurulması, yeni iş yerlərinin açılması, quşçuluq və baramaçılıq təsərrüfatlarının yaradılması, eləcə də digər məsələlərin həlli ümumi infrastrukturun yenidən qurulmasını təmin edə bilər. Şəkililər qarşıda duran bu vəzifələrin də öhdəsindən layiqincə gələcəklərinə əmindirlər.

Telman NƏZƏRLİ

Azərbaycan.-2012.-7 noyabr.- S.6.