Yeni Azərbaycan Partiyası tarixi zərurətdən yaranmışdır

Yeni Azərbaycan Partiyasının (YAP) yaradılmasının 20-ci ildönümü münasibətilə Bərdədə yubiley tədbiri keçirilmişdir. AzərTAc xəbər verir ki, tədbir iştirakçıları əvvəlcə ümummilli lider Heydər Əliyevin Bərdə şəhərindəki abidəsi önünə gül dəstələri qoymuş, xatirəsinə ehtiramlarını bildirmişlər.

Rayon mədəniyyət evində keçirilən tədbirdə görkəmli dövlət və siyasi xadim, YAP-ın qurucusu Heydər Əliyevin xatirəsi birdəqiqəlik sükutla yad edilmişdir.

YAP Bərdə rayon təşkilatının sədri Fəqət Şadlinskaya partiyanın yarandığı tarixi şəraitdən, keçdiyi şərəfli yoldan və qazanılan uğurlardan danışmışdır. Bildirmişdir ki, YAP Azərbaycan tarixinin son dərəcə ağır və kəşməkəşli günlərində, ölkənin ciddi sınaqlara məruz qaldığı bir dövrdə tarixi zərurətdən yaranmışdır. YAP-ın ölkəmizin ictimai-siyasi həyatında yeri və rolu müstəqil Azərbaycanımızın tarixinin şanlı səhifəsini təşkil edir.

Qeyd edilmişdir ki, dövlət müstəqilliyini yenicə bərpa etmiş Azərbaycanda ictimai-siyasi gərginlik, vətəndaş qarşıdurması, iqtisadi böhran getdikcə dərinləşir, hakimiyyət uğrunda mübarizə gedirdi. Azərbaycanın dövlət müstəqilliyinin itirilməsi təhlükəsi ilə üz-üzə qaldığı belə bir mürəkkəb dövrdə xalq yeganə xilas yolunu Heydər Əliyev dühasında, ulu öndərin böyük dövlətçilik təcrübəsində görürdü. Xalqın geniş təbəqəsinin istəyini ifadə edən 91 nəfər ziyalı 1992-ci il oktyabrın 16-da ümummilli lider Heydər Əliyevə müraciət etdi. Ulu öndər çox keçmədən dövlətçiliyimiz üçün "Yeni, müstəqil Azərbaycan uğrunda" adlı çox əhəmiyyətli cavab məktubunu xalqa ünvanladı. Dahi rəhbərin bu çağırışı YAP-ın, Heydər Əliyev ideyalarının ətrafında sıx birləşmiş yüz minlərlə insanın vahid siyasi məqsədinə, Azərbaycanın milli ideoloji məramına, onu ağır vəziyyətdən xilas etməyin ilk və həlledici proqramına çevrildi, müstəqil dövlət quruculuğunun ilk konsepsiyası oldu.

Vurğulanmışdır ki, 1993-cü il martın 13-də 185 nəfər təəssübkeşin iştirakı ilə təsis edilən YAP Bərdə rayon təşkilatı hazırda öz ətrafında 9985 nəfər partiya üzvünü birləşdirir. Onlardan 3818 nəfəri qadın, 2905 nəfəri isə gənclərdir. Bu ilin ötən 9 ayında 721 nəfər partiya sıralarına qəbul olunmuşdur.

Milli Məclisin Sədr müavini Bahar Muradova və Bərdə Rayon İcra Hakimiyyətinin başçısı Vidadi İsayev əlamətdar yubiley münasibətilə tədbir iştirakçılarını təbrik etmiş, Azərbaycanın bugünkü uğurlarında partiyanın tarixi xidmətlərindən danışmışlar.

Sonra YAP-ın sədri, Prezident İlham Əliyevə müraciət qəbul edilmişdir.

Tədbirdə YAP-ın 20 illiyi ilə bağlı keçirilmiş intellektual bilik və idman yarışlarının, inşa yazı müsabiqəsinin qaliblərinə fəxri fərman və hədiyyələr, partiya sıralarına yeni qəbul olunan üzvlərə üzvlük vəsiqələri təqdim edilmişdir.

Tədbir konsert proqramı ilə davam etmişdir.

Azərbaycan.-2012.- 8 noyabr.- S.4.