İkinci Bakı Beynəlxalq Humanitar Forumu dünyada təhlükəsizliyin təmin olunması və xalqlar arasında dialoqun inkişafı baxımından mühüm əhəmiyyətə malikdir

Cari ilin oktyabrında keçirilmiş İkinci Bakı Beynəlxalq Humanitar Forumunun nəticələrini yüksək qiymətləndirən Yaponiyanın NHK kanalının beynəlxalq şərhçisi, forumun iştirakçısı İçiyo İşikava AzərTAc-ın xüsusi müxbirinə bildirmişdir ki, tədbir dünyada təhlükəsizliyin təmin olunması və xalqlar arasında dialoqun inkişafı baxımından mühüm əhəmiyyətə malikdir.

Forumun yüksək səviyyədə təşkil olunduğunu deyən İ.İşikava qeyd etmişdir ki, son illər Azərbaycanda çox mühüm beynəlxalq humanitar tədbirlər həyata keçirilir. Azərbaycanın coğrafi mövqeyini xüsusi vurğulayan İ.İşikava bildirmişdir ki, ölkəmiz Şərqlə Qərbin qovuşuğunda yerləşir.

Dünyanın görkəmli alimlərinin və ictimai xadimlərinin forumda iştirakı tədbirə olan beynəlxalq marağı ifadə edir. Bu, həm də Azərbaycanın hərtərəfli inkişafından xəbər verir. Azərbaycanın bu təşəbbüsü reallaşdırması isə çox təqdirəlayiq hadisədir. Xüsusən dünyada baş verən proseslər, qloballaşma dövründə meydana çıxan problemlər baxımından Azərbaycan Prezidenti İlham Əliyevin bu təşəbbüsü çox yüksək qiymətləndirilməlidir. Azərbaycan Prezidentinin təşəbbüsü ilə keçirilən forum dünyanın müxtəlif xalqlarının nümayəndələrinin bir yerə toplaşaraq dünyada təhlükəsizliyin təmin olunması və xalqlar arasında dialoqun inkişafı üçün müzakirələr aparmasına geniş imkan yaradır. Bu cür beynəlxalq tədbirin təşkili ilə Azərbaycan dünyada sülhə və əmin-amanlığa öz töhfəsini verir.

Cəmiyyətdə medianın rolunun günbəgün artdığını qeyd edən beynəlxalq şərhçi Bakı forumunda bu istiqamətdə aparılmış müzakirələrin əhəmiyyətini xüsusi vurğulamışdır. Xüsusən sosial medianın cəmiyyətdə daha geniş yayılması və inkişafı istiqamətində dünyanın aparıcı informasiya agentliklərinin nümayəndələrinin fikir mübadiləsi bu baxımdan çox əhəmiyyətlidir.

İ.İşikava bildirmişdir ki, Bakı forumunda müxtəlif ölkələrin çoxsaylı nüfuzlu şəxslərinin iştirakı onun uğurlu keçirilməsini təmin etmiş və nəticədə mühüm sənəd - Bakı Bəyannaməsi qəbul olunmuşdur. Azərbaycan rəhbərliyinin bu layihəni davam etdirmək arzusu xüsusən təqdirəlayiqdir və forum iştirakçıları tərəfindən birmənalı olaraq dəstəklənmişdir.

Bakıya son səfərinin altı il əvvəl olduğunu xatırladan İ.İşikava forumun Azərbaycanda aparılan böyük quruculuq işlərini izləmək baxımından da əhəmiyyətli olduğunu qeyd etmiş, ölkəmizin son 9 ildə böyük inkişaf yolu keçdiyini xüsusi vurğulamışdır. Azərbaycan sürətlə inkişaf edir və müasirləşir. Bakını Yaponiya paytaxtı ilə müqayisə edən İ.İşikava Azərbaycan paytaxtının ona 1964-cü il Olimpiya Oyunları ərəfəsindəki Tokionu xatırlatdığını qeyd etmişdir. Həmin vaxt Tokionun görkəminin sürətlə dəyişdiyini söyləyən İ.İşikava bu gün Azərbaycanın neft gəlirlərindən səmərəli istifadə etdiyini, yalnız Bakının deyil, regionların da sürətlə inkişaf etməsinin şahidi olduğunu bildirmişdir. Bakı sivilizasiyanın mühüm mərkəzlərindən biri olaraq hərtərəfli inkişaf edir, sürətlə öz görkəmini dəyişir.

Forum çərçivəsində bir qrup nümayəndə ilə Naxçıvan Muxtar Respublikasında olduqlarını qeyd edən İ.İşikava ümummilli lider Heydər Əliyev kimi görkəmli dövlət xadimini yetirmiş torpağın onlarda yüksək təəssürat yaratdığını vurğulamışdır. Naxçıvandakı tarixi abidələr buradakı insanların yüksək mədəniyyətindən xəbər verir. Ermənistan tərəfindən blokadaya alınmasına baxmayaraq, Azərbaycanın bu regionu da sürətlə inkişaf edir. Bu qədim Azərbaycan torpağı özünəməxsusluğu, yüksək qonaqpərvərliyi və mədəniyyəti ilə bizi heyran etdi.

Vüqar AĞAYEV,

AzərTAc-ın xüsusi müxbiri

Tokio

Azərbaycan.-2012.- 8 noyabr.- S.7.