Azərbaycan ilə Malayziya arasında əlaqələrin inkişaf perspektivləri müzakirə olunmuşdur

Azərbaycan Respublikası Milli Məclisinin Sədri Oqtay Əsədovun başçılıq etdiyi nümayəndə heyəti noyabrın 6-dan 8-dək Malayziyada rəsmi səfərdə olmuşdur. Nümayəndə heyətinin tərkibinə parlamentin İnsan hüquqları komitəsinin sədri Rəbiyyət Aslanova, deputatlar Bəxtiyar Əliyev, Çingiz Əsədullayev, Mirkazım Kazımov, Milli Məclis Aparatının rəhbəri Səfa Mirzəyev və digər rəsmi şəxslər daxildirlər.

Azərbaycanın bu ölkədəki səfirliyindən bildirmişlər ki, səfər Malayziya Parlamentinin Nümayəndələr Palatasının sədri Tan Sri Pandikar Amin Haji Mulianın dəvəti ilə həyata keçirilmişdir.

Oqtay Əsədov noyabrın 6-da Tan Sri Pandikar Amin Haji Mulia, Senatın sədri Tan Sri Abu Zahar bin Ujanq və Malayziya Baş nazirinin ofisində nazir Dato Sri Mohamed Nazri bin Əbdül Əziz ilə görüşmüş, parlamentin plenar sessiyasını müşahidə etmişdir.

Malayziya-Azərbaycan parlamentlərarası dostluq qrupunun üzvlərinin, parlament aparatının rəhbərinin, Malayziya Xarici İşlər Nazirliyinin Qərbi Asiya İdarəsi rəisinin və əməkdaşlarının da iştirak etdiyi görüşlərdə hər iki ölkənin qanunvericilik orqanları arasında əlaqələrin inkişafı, təcrübə mübadiləsi, qarşılıqlı səfərlərin təşkili və digər məsələlər ətrafında fikir mübadiləsi aparılmışdır.

Noyabrın 7-də isə Oqtay Əsədov Malayziyanın Baş naziri Dato Sri Mohd Najib Tun Abdul Razaq, sabiq Baş nazir, Perdana Liderlik Fondunun rəhbəri və ölkə iqtidarının siyasi liderlərindən olan Tun dr.Mahathir bin Muhamad ilə görüşmüşdür. Bu görüşlərdə Azərbaycan ilə Malayziya arasında dostluq münasibətlərinin qədim tarixi, ölkələrimiz arasında siyasi, iqtisadi, ticari, humanitar və digər sahələrdə əməkdaşlıq məsələləri müzakirə olunmuşdur.

Azərbaycan parlament nümayəndə heyəti Malayziyanın Kuala Lumpu və Putrajaya şəhərlərinin görməli yerləri ilə tanış olmuşdur.

Səfər çərçivəsində Milli Məclisin nümayəndə heyətini Azərbaycanın Malayziyadakı səfiri Tahir Kərimov və səfirliyin əməkdaşları müşayiət etmişlər.

Azərbaycan nümayəndə heyətinin Malayziyaya səfəri ilə bağlı bu ölkənin "Bernama" Milli Xəbər Agentliyi, "Utusan Melayu", "Malaysiazoom" və digər xəbər portallarında məlumatlar dərc edilmişdir. Bu məlumatlarda səfərin hər iki ölkə arasında ikitərəfli münasibətlərin və parlamentlərarası əlaqələrin möhkəmləndirilməsi məqsədi ilə həyata keçirildiyi və Senat sədrinin sitatları ilə Azərbaycanın siyasi iqtisadi vəziyyəti haqqında xəbərlər yer almışdır.

Noyabrın 8-də Azərbaycan parlament nümayəndə heyəti xüsusi təyyarə ilə İndoneziyanın Cakarta şəhərinə yola düşmüşdür.

AzərTAc

Azərbaycan.-2012.- 9 noyabr.- S.3.