Bakı Dövlət Universiteti ilə Türk Dünyası Araşdırmaları Beynəlxalq Elmlər Akademiyası arasında əməkdaşlığa dair müqavilə bağlanmışdır

Noyabrın 8-də Türk Dünyası Araşdırmaları Beynəlxalq Elmlər Akademiyasının Ankara şəhərində başqanı professor Hayrettin İvgin Bakı Dövlət Universitetində (BDU) olmuşdur.

Alim və təhsil işçilərinin iştirak etdikləri görüşdə Bakı Dövlət Universitetinin rektoru, Milli Məclisin deputatı, akademik Abel Məhərrəmov Azərbaycan ilə Türkiyənin tarixi birliyi, mehriban qardaşlıq münasibətlərindən danışmışdır.

Azərbaycan Prezidenti İlham Əliyevin apardığı siyasətin əhəmiyyətini vurğulayan rektor ölkəmizin dinamik inkişaf etdiyini bildirmişdir.

Müasir dünyada elmin, təhsilin önəmli rolunu xatırladan akademik A.Məhərrəmov BDU-nun beynəlxalq əlaqələrindən bəhs etmişdir.

H.İvgin Türk Dünyası Araşdırmaları Beynəlxalq Elmlər Akademiyası qurumun fəaliyyəti barədə məlumat vermişdir. Qeyd etmişdir ki, akademiya türk dünyasında və türklərin yaşadıqları ölkələrdə türk dilini, mədəniyyətini, tarixini və ədəbiyyatını araşdırmaq məqsədilə yaradılmışdır. Bu beynəlxalq elm təşkilatı dünyanın 30-dan çox ölkəsinin tanınmış universitetləri, tədqiqat institutları, akademiyaları, bioqrafiya mərkəzləri, vəqfləri və digər qurumları ilə qarşılıqlı əməkdaşlıq edir. Ayrı-ayrı ölkələrdə təmsilçiləri olan bu akademiya tərəfindən indiyədək 100-dən çox beynəlxalq konqres, simpozium, konfrans və digər tədbirlər keçirilmişdir.

Görüşdə Bakı Dövlət Universiteti ilə Türk Dünyası Araşdırmaları Beynəlxalq Elmlər Akademiyası arasında əməkdaşlığa dair müqavilə imzalanmışdır.

Sənədi akademik A.Məhərrəmov və professor H.İvgin imzalamışlar. Sonra H.İvgin akademik Abel Məhərrəmovun Türk Dünyası Araşdırmaları Beynəlxalq Elmlər Akademiyasının həqiqi üzvü seçildiyini bildirmiş və quruma üzv seçilməsi barədə diplomu rektora təqdim etmişdir.

AzərTAc

Azərbaycan.-2012.- 9 noyabr.- S.10.