ATƏT ilə Azərbaycan Respublikasının Daxili İşlər Nazirliyi arasında işgüzar əməkdaşlıq əlaqələri mövcuddur

Noyabrın 9-da daxili işlər naziri general-polkovnik Ramil Usubov ölkəmizdə səfərdə olan ATƏT-in media azadlığı üzrə nümayəndəsi xanım Dunya Miyatoviç ilə görüşmüşdür.

Daxili İşlər Nazirliyinin mətbuat xidmətindən AzərTAc-a bildirmişlər ki, qonağı salamlayan nazir noyabrın 9-nun ölkənin həyatında əlamətdar bir gün - Dövlət Bayrağı Günü olduğunu qeyd etmiş və bayram günündə bu görüşdən məmnunluğunu bildirmişdir.

Daha sonra ATƏT ilə Daxili İşlər Nazirliyi arasındakı işgüzar əməkdaşlıq əlaqələrinin mövcudluğu xatırladılmışdır. Qeyd olunmuşdur ki, təşkilatın Bakı ofisinin fəaliyyətə başladığı 2000-ci ildən etibarən nazirlik digər hüquq-mühafizə orqanları kimi, regionda və respublikada təhlükəsizliyin, insan hüquq və azadlıqlarının təmin edilməsi, ictimai asayişin qorunması, transmilli mütəşəkkil cinayətkarlıqla mübarizənin daha da səmərəli aparılması məqsədi ilə ATƏT-in Demokratik Təsisatlar və İnsan Hüquqları Bürosu, Bakı ofisi və qonşu ölkələrdə yerləşən missiyaları, onların rəhbərləri ilə sıx əməkdaşlıq və dostluq əlaqələri yaratmış, aparılan islahatlar nəticəsində polis orqanlarının fəaliyyətinin təkmilləşdirilməsi sahəsində bir çox layihələr həyata keçirilmişdir. Respublikada və xarici dövlətlərdə təşkil olunan təlim və seminarlarda iştirak etmiş əməkdaşlarımız əldə edilmiş təcrübənin praktiki fəaliyyətdə tətbiq olunması istiqamətində işləri davam etdirirlər.

ATƏT-in Bakı ofisinin dəstəyi ilə müxtəlif istiqamətlərdə həyata keçirilən layihələrin hər biri polisin fəaliyyətinin təkmilləşdirilməsində önəmli rol oynayır. Ümumiyyətlə, ATƏT-in təşkilatçılığı ilə keçirilən tədbirlərdə nazirliyin 2000-ə yaxın əməkdaşı iştirak etmişdir.

Daha sonra qonağa polis-media münasibətlərinin və ictimaiyyətlə əlaqələrin daha da genişləndirilməsi ilə bağlı ətraflı məlumat verilmişdir.

Daxili işlər naziri onu da qeyd etmişdir ki, orqan və hissələrdə qanunçuluğun vəziyyəti mütəmadi olaraq təhlil edilir, ümumiləşdirilir, hüquqazidd hərəkətlərə, polisin adına ləkə gətirən əməkdaşlara qarşı daxili işlər orqanlarında xidmətdən xaric edilməyə, hətta cinayət məsuliyyətinə cəlb olunmağadək prinsipial tədbirlər götürülür.

Daxili İşlər Nazirliyi hər cür mənfi təzahürlərə qarşı mübarizəni davam etdirir və hər belə fakt üzrə qanunla müəyyən edilmiş ən ciddi tədbirlərin görülməsində maraqlıdır.

Qonağa hüquq-mühafizə sahəsində həyata keçirilən tədbirlər, insan və vətəndaş hüquq və azadlıqlarının qorunması, demokratik prinsiplərin önə çəkildiyi yeni qanunların qəbulu sahəsində görülmüş işlər və mövcud kriminogen durum barədə də məlumat verilmişdir.

Səmimi görüşə və ətraflı məlumata görə minnətdarlığını bildirən xanım Dunya Miyatoviç Dövlət Bayrağı Günü münasibətilə təbriklərini çatdırmışdır. Bütövlükdə Azərbaycanda görülmüş işləri müsbət qiymətləndirərək polis-media münasibətlərinə toxunan qonaq jurnalistlərin normal və təhlükəsiz şəraitdə fəaliyyət göstərmələrinin vacibliyini vurğulamış, bu istiqamətdə həyata keçirilən tədbirlərdən razı qaldığını bildirmişdir. O, qeyd etmişdir ki, ATƏT vahid bir ailədir, hər bir ailənin isə öz qayğıları, problemləri vardır. Biz birlikdə çalışaraq bu problemləri həll etməliyik.

ATƏT-in Bakı ofisinin rəhbəri səfir Koray Tarqayın da iştirak etdiyi görüşdə tərəfləri maraqlandıran bir sıra digər məsələlər müzakirə olunmuşdur.

Azərbaycan.-2012.- 11 noyabr.- S.5.