«012 Bakı Public Art Festivalı» başa çatmışdır

Noyabrın 10-da Nizami Kino Mərkəzində müasir Azərbaycan incəsənətinin inkişafı və təbliği ilə məşğul olan "YARAT!" qeyri-kommersiya təşkilatının birinci "012 Bakı Public Art Festivalı"nın bağlanış mərasimi keçirilmişdir.

AzərTAc xəbər verir ki, tədbiri açan "YARAT!" Müasir İncəsənət Məkanının rəhbəri Aida Mahmudova fevral ayından başlayaraq Azərbaycan paytaxtında "012 Bakı Public Art Festivalı" layihəsinin reallaşdırıldığını bildirmişdir.

Diqqətə çatdırılmışdır ki, layihədə iştirak edən rəssamlar festival zamanı əsərlərini müəyyən olunmuş ardıcıllıqla, şəhərin bu və ya digər məkanında ictimaiyyətin nəzərinə təqdim etmişlər.

Bir incəsənət layihəsi olaraq "012 Bakı Public Art Festivalı" əvvəllər müasir incəsənətlə heç bir əlaqəsi olmayan insanları cəlb etməyi bacarmışdır. Həm də axı, rəssamın yaradıcılıq "mətbəxi" ilə tanış olmaq, yaradıcılıq prosesini müşahidə etmək həddindən artıq maraqlıdır. Bu an müəlliflərə qulaq asmaq, onların öz əl işləri və festival haqqında söylədikləri fikirləri eşitmək tamaşaçıya zövq verən bir məqamdır. İncəsənət pərəstişkarlarının məhz bu marağını nəzərə alan festivalın təşkilatçıları gənc, istedadlı və perspektivli rejissor Rüfət Həsənov tərəfindən çəkilən festival haqqında sənədli filmin nümayişini təşkil etmişlər.

Aida Mahmudova nəzərə çatdırmışdır ki, həmçinin növbəti ilin fevral ayında "YARAT!" qeyri-kommersiya təşkilatı tərəfindən yeni bir layihənin həyata keçirilməsi nəzərdə tutulmuşdur. Həmin layihədə müəyyən qədər mövzu və ad dəyişikliyi ola bilər, lakin ideya dəyişməz qalacaqdır.

Sənətşünas və rəssam Teymur Daimi "012 Bakı Public Art Festivalı" haqqında geniş məlumat vermişdir.

Bildirilmişdir ki, festival çərçivəsində təqdim olunan əsərlər zamanla səsləşir. Layihə intellektuallıq baxımından da diqqəti cəlb edəndir. İştirakçı rəssamlar təkcə əsərlərinin təqdimi üçün məkanı seçməmiş, həm də bu məkanın tarixi ilə bağlı araşdırmalar aparmışlar. Nəhayət, festival çərçivəsində rəssamlar öz əsərlərini daha açıq məkanda, geniş şəkildə təqdim edərək, qalereyaların və muzeylərin müəyyən məhdudiyyətlərindən azad olaraq tam yaradıcılıq sərbəstliyi əldə etmişlər.

Teymur Daimi belə bir festivalın ənənəyə çevriləcəyi təqdirdə onun müasir incəsənətə töhfə vermək imkanını diqqətə çatdırmışdır.

Gənc rejissor Rüfət Həsənov bildirmişdir ki, filmin çəkilişi "012 Bakı Public Art Festivalı" eskizlərinin bu ilin fevral ayında keçirilən təqdimatından başlamışdır. Daha sonra çəkiliş incəsənət layihəsinin bütün mərhələlərini (rəssamlar tərəfindən incəsənət əsərlərinin yaradılması, əl işlərinin və festival barədə öz fikirlərini paylaşdıqları müsahibələr, nəhayət, ərsəyə gəlmiş əsərlərin təqdimatı) əhatə etmişdir. Canlı və eyni zamanda, sadə tərzdə çəkilmiş sənədli filmdə 2012-ci ildə Azərbaycanın əsas incəsənət hadisəsi sayılan festivalın mərhələli həyata keçirilməsinin yaradıcılıq prosesi əks olunmuşdur.

"012 Bakı Public Art Festivalı"nda həm tanınmış, həm də yeni fəaliyyətə başlayan 21 rəssam iştirak etmişdir.

Mərasimdə bir saat davam edən film böyük maraqla izlənilmiş və alqışlarla qarşılanmışdır.

Filmin nümayişindən sonra Baş nazirin müavini Elçin Əfəndiyev çıxış edərək "012 Bakı Public Art Festivalı"nın əhəmiyyətindən danışmışdır. Bildirmişdir ki, on ay ərzində təqdim olunan müasir incəsənət əsərləri nəinki mədəni həyatımızın tərkib hissəsinə, hətta mən deyərdim ki, milli faktorumuza, yəni, bizim üçün tamamilə doğma bir janra çevrilmişdir.

Elçin Əfəndiyev demişdir ki, festivalın üzərindəki aurada böyük bir gənclik, yenilik, yaradıcılıq ehtirası, sərbəstlik, sərhədsizlik, intəhasızlıq vardır. Sərbəstlik, müstəqillik, gənclik, istedad olan yerdə isə, şübhəsiz, müsbət emosiyalar aşılanır. Belə bir aura öz-özünə deyil, gərgin əməyin nəticəsində yaranmışdır. Bu məqamda "YARAT!" Müasir İncəsənət Məkanının rəhbəri Aida Mahmudovanın və bütün yaradıcı kollektivin əməyini xüsusi qeyd etmək yerinə düşər.

Baş nazirin müavini festivalda iştirak edən 21 rəssamın yaşından asılı olmayaraq hamısında gənclik ehtirası olduğunu qeyd edərək onlara uğurlar arzulamışdır.

Azərbaycan.-2012.- 11 noyabr.- S.8.