Azərbaycan və Ukrayna Müdafiə nazirlikləri arasında 2013-cü il üçün ikitərəfli əməkdaşlıq planı imzalanmışdır

Ölkəmizdə səfərdə olan Ukraynanın müdafiə naziri Dmitri Salamatin noyabrın 12-də Azərbaycanın müdafiə naziri, general-polkovnik Səfər Əbiyev ilə görüşmüşdür.

Müdafiə Nazirliyinin mətbuat xidmətindən AzərTAc-a bildirmişlər ki, ukraynalı nazir Fəxri xiyabanda xalqımızın ümummilli lideri, müasir müstəqil dövlətimizin memarı və qurucusu Heydər Əliyevin məzarını ziyarət etmiş, xatirəsini ehtiramla anmışdır.

Görkəmli oftalmoloq alim, akademik Zərifə xanım Əliyevanın da məzarı ziyarət olunmuşdur.

Sonra Şəhidlər xiyabanına gələn qonaq ölkəmizin azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmişdir.

Nazirlərin əvvəlcə geniştərkibli, sonra isə təkbətək görüşü olmuşdur.

Səfər Əbiyev Azərbaycan ilə Ukrayna arasında müxtəlif sahələr üzrə əlaqələrin inkişafından söhbət açaraq bildirmişdir ki, son illər bu əməkdaşlıq hərbi və hərbi sənaye kompleksində də özünü geniş şəkildə göstərir.

Görüş zamanı regionda hərbi-siyasi vəziyyət barədə də ətraflı fikir mübadiləsi aparılmışdır.

Müdafiə naziri Səfər Əbiyev qeyd etmişdir ki, Ermənistanın təcavüzkar siyasətini davam etdirməsi nəticəsində Dağlıq Qarabağ münaqişəsi bu günədək həll edilməmişdir. Onun sözlərinə görə, Minsk qrupunun fəaliyyəti də heç bir nəticə verməmişdir: "20 ilə yaxın işğal altında qalan torpaqlarda bütün infrastruktur, maddi mədəniyyət abidələri darmadağın edilmişdir. Ermənistan silahlı bölmələrinin Xocalı şəhərində təsəvvürə gətirilməyən qətliamı bütün dünyaya bəllidir".

Səfər Əbiyev bildirmişdir ki, Azərbaycan daha bundan sonra işğal faktının uzanmasına yol verə bilməz. O, münaqişənin sülh şəraitində həll edilmədiyi halda, torpaqların başqa vasitələrlə işğaldan azad ediləcəyini vurğulamışdır.

Görüşün sonunda Azərbaycan və Ukrayna Müdafiə nazirlikləri arasında 2013-cü il üçün ikitərəfli əməkdaşlıq planı imzalanmışdır.

Azərbaycan.-2012.- 13 noyabr.- S.4.